Galatia 2 - Testamenta Áre 1983 (Toaripi PNG)

Paulo aea aposetolo karu hariaharia ita

¹ Soka sisoro fourteen ve aite voa, ara Banabasi ita fareho Ierusalema voa ata pataipe, aea Tito ta elaka ita fareho meiape.

² Ara pataipe ipi Ualare sa araro muiōpe lea o vei. Ara fari metameta karu ita hariakao kokoruka, ara toru hariaharia karu voa itoro oita lea Ovoro Lareva la erero muia satiriarōpe, ara leiape lea tivi aea ara lei vovo meita mea tivi eite auke leiti ave.

³ Arave maeapavora Tito, are Helene karu, ere arero peritome leiti vei haisa moi kasirau.

⁴ A—, karu hea arero peritome leiti vei haikaeōpe; ere apeva paumarehari hea, elave kokorukai voa murufa oropōpe, ela Keriso Iesu ita fareho leita lea pisiri lei roroaita mai la ofae koko fofoisa elaro lei fasaita sarufa leiti vei.

⁵ A—, eite ela maeapatoita leiti kao, aea ora farakeka aea voa erero mapi kakeva leiti kasirau kofa, ipi Ovoro Lareva ve okofa la lei e voa pei veia.

⁶ A—, lea fari metameta karu (ere leafeare karu ara lea la levi seseōvai roi, ipi Ualare karu ve soso o ari sore), lea fari metameta karu sa etau áre araro omoi kasirau.

⁷ A—, ere ore loita reha Ualare sa tivi araro miarōpe Ovoro Lareva toru hariaharia karu la itoro ari vei, usoso are sa Petero la tivi miarōpe feare Ovoro Lareva la Iuda karu la itoro ari vei.

⁸ Ipi Ualare ve siahu sa araro lei ara toru hariaharia karu ve aposetolo leipe reha, usoso are sa Petero la lei Iuda karu ve aposetolo leipe lōfeare.

⁹ Ere Ualare sa araro miarōpe lea haiforoe leita meru la ofae eovi ore leipe lea mea, Iakobo aea Petero aeata Ioane ita, lea ekalesia ve rare savoro o oita karu, mai toare elakaro Banabasi ita la maeapavora leiti vei muia pailalaeōpe, elaka sa toru hariaharia karu voa tivi leiti vei, ere ta Iuda karu voa.

¹⁰ Etau farakeka haria, ela ereve karu merava la maeaforoe lei haikaeai vei. Eite ara haihahari rovaea lea etau kofa la leiti vei.

¹¹ A—, Petero Antioka karikara voa kei forerōpe soa, ara areve soso voa arero sasauka o kere moipe, areve kaiae sa pisiri kofa leipe lea vei.

¹² Ipi Iakobo sa itapōpe lea karu hea sa forerai auke soa voa, are larietau toru haria ita farehoria lalape; a—, ere sa forerōpe lea mea are haiiri ata kerori, lea mai la kiripōpe, ipi are peritome haikaeaita lea karu firu la tore leipe eavia.

¹³ Iuda karu hohoi ta are ita farehoria haiiri aiera‐aiera a’, Banabasi ta ereve aiera‐aiera haiiri lei safosafoa putoipe.

¹⁴ A—, ara ere Ovoro Lareva ve okofa voa haurakao terai auke leipe la ofae eavōpe lea mea, ara ere foromai ve omopa voa Petero la mō ōpe, A Iuda karu, a—, a toru haria karu feare peavota, Iuda karu feare kasirau. Soka a toru hariaharia karu la Iuda ve mai leiti vei serea leipeta ipi levea?

¹⁵ Ela Iuda karu kofa, kaiae o oita lea toru hariaharia karu kao.

¹⁶ A—, ela ore, karu Ualare ita haura leita mai farakeka meha, Iesu Keriso la sukaerereai vei, Mose ve Safu Mai la leita lōvoa kao. Lea vei ereita Keriso Iesu la sukaererea, aea ereita sa Keriso la sukaerereaita lōfeare voa ereita Ualare ita haura loita reha, Safu Mai la leitita lea vei kao; ipi karu farakeka aea Safu Mai la haria leitita, a—, are Ualare ita haura levi leiti roi.

¹⁷ A—, ela Iuda karu Keriso voa Ualare ita haura leita mai la elita soa, ela ta toru hariaharia karu feare lei iri kaiae karu leitita, a—, Keriso iri kaiae la toaraita vita lea vei leititore ei? Kakaeite kofa!

¹⁸ A—, ara toa foforukōpe lea Safu Mai la ara ata turaita, a—, ara Safu miroapaita karu loita reha.

¹⁹ Ipi ara Safu Mai voa, Safu sa lei opōpe, ara Ualare voa lōri makuri leiti vei.

²⁰ Araro Keriso ita satauro sa paeōpe, aea makuri ata leita lea karu ara kao, a—, Keriso reha, arave iri voa makuri lei vovo meita lea Vita, aea ara maeasarōva voa leita lea makuri, ara Ualare ve Atute la sukaerereaita haiiri voa makuri lei vovo mea vovea, araro haikakare lei, areve maea la ara vei au miarōpe lea Vita voa.

²¹ Ara Ualare ve maeaforoe ve meru la sukavuteai vei haiarara kofa. A—, karu Ualare ita haura leita soa Safu Mai voa leitita, a—, Keriso ve opai eite kasirau.