Galatia 1 - Testamenta Áre 1983 (Toaripi PNG)

¹ Paulo, aposetolo karu leiti vei lea siahu karu sa miarai kao aea karu voa forerai kao; a—, Iesu Keriso aeata opai voa arero ata lei itoipe lea Ualare Oa ita sa miarōpe.

² Arao aea ara ita fareho pepeita paumarehari foromai ita mea foforoe o Galatia voa pepeita ekalesia foromai tai la itapai meha.

³ Haiforoe leita meru aeata tairu Ualare ereitave Oa aeata Papuvita Iesu Keriso voa ovi e voa lei peava.

⁴ Mea makuri pepeita taotao maealolo voa ereitaro fareōvi lei makuri leiti vei, Keriso areve elore maea la ereitave iri kaiae la sasukai vei miarōpe, ereitave Ualare Oa sa haikaeaita haiiri lōfeare.

⁵ Sosorusosoru Ualare voa lei peava. Amene.

Ovoro Lareva farakeka haria

⁶ Ara haihava la leipea, ipi Keriso ve maeaforoe sa ero isōpe lea vita la e sa utohoa haiarara lei kiripi, ovoro haria la haikaeaita lea vei.

⁷ Eite Ovoro Lareva haria aea kasirau, a—, karu hea sa eve haiiri la lei kapekapea Keriso ve Ovoro Lareva la lei kaiae lei sukavuteai vei hai la kaeaipea.

⁸ A—, ela varo, kauri voa foreraita aneru farakeka aea varo, ero itoro ōpe lea Ovoro Lareva la lei toarōrisa ovoro haria la itoro arita, a—, Ualare arero etakofa saroroapai roi.

⁹ Ela sa evera moiape lea o la ara faitora ta ata la moi; karu aea e sa evera ovi sukaerereōpe lea Ovoro Lareva la lei toarōrisa ovoro haria la itoro arita, a—, Ualare arero saroroapai roi.

¹⁰ Ara faitora karu la kurea ere sa araro maeati vei ei? Kakaeite kofa! Ualare sa araro maeatita, arave haiiri reha. Ara karu la lei hailareva leiti vei la elipea ei? Kakaeite! Lōfeare oria, ara Keriso ve fasaita sarufa levi leiti lare.

Paulo la lei aposetolo karu leipe mai

¹¹ Paumarehari e, ara ero lei ore leiti vei, ara itoro arita mea Ovoro Lareva ve ipi karu voa kasirau.

¹² Ara arero karu voa ovai kasirau, aea karu sa arero araro satiriarai kasirau; a—, Iesu Keriso are kofa sa arave haiiri voa lea Ovoro la satiriōri muiōpe.

¹³ Arave omopa soa voa leiape mai ve fari la e mapi ore lei roroka, ara Iuda karu ve maso mai la sukaererea peiape lea mea, ara Ualare ve ekalesia la irori ita hasiōvi, toa foforukai vei seseōvaiape.

¹⁴ Ara Iuda karu ve maso toaita mai voa arave toruipi voa arave heatao la sapataipe, ara sa arave papa mai la haihahari kofa lei meiape lea vei.

¹⁵ A—, Ualare arave lou ve ére voa araro haikaea ovi, areve maeaforoe sa araro areve tivi leiti vei isōpe.

¹⁶ Are areve Atute la arave haiiri voa muiōpe, toru hariaharia karu ve aru voa areve Ovoro Lareva la itoro ari vei; lea mea ara karu farakeka aea ita laua sukōvi lōri terai kao;

¹⁷ aea ara Ierusalema voa arave omopa soa voa leiape aposetolo karu la ofae eavai vei patai kao; a—, ara Arabia mea voa utohoa kei pōvi, aea aite ara ata kerori Damasko karikara voa koti forerōpe.

¹⁸ Soka sisoro oroisoria kaleipe soa ara Petero la ofae eovi ore leiti vei Ierusalema voa patei, sare fifteen are ita fareho peiape.

¹⁹ Ara aposetolo karu haria hea la ofae eavai kasirau, a—, Iakobo, ereitave Papuvita ve marehari haria.

²⁰ Ara sa ero ukaita mea o okofa; Ualare sa ore ara apeva o la ukai kao.

²¹ Lea ve aite voa ara Suria aea Kilikia ita ve soasoa voa kavaiape.

²² Lea soa voa Keriso ita pepeiape Iudea soa ve ekalesia firufiru ve karu ere arave soso la ofae eovi ore leiti kao.

²³ Ereve ore karu haria sa moiape mōfeare fari, Evera soa voa ereitaro hasiavaiape lea vita, are evera toa foforukai vei seseōvaiape lea sukaerereaita o la are faitora itoro la aipea meha.

²⁴ Soka ere Ualare la maeatipe ipi are sa ara voa leipe lea etau veia.