Filipi 4 - Testamenta Áre 1983 (Toaripi PNG)

Kureaita ovoro

¹ Lea vei arave paumarehari e, haikakare lei liri oita karu e, araro lei hailareva leita karu aeata ara sa hiva arita kekeva; haikakare e, Papuvita voa kere ita soi pepeava.

² Ara Euodia auke Sunutuke ita la kureai, ereuka Papuvita voa haiiri farakeka leiti vei.

³ Aeata ao, ara ita tivi fareho leita vita kofa e, ara aro loki lea uamori oraka la toaraia, ipi ereuka ara ita Ovoro Lareva la fafarapi tivi fareho leiape, Kelementa ita aea ara ita tivi fareho leiape karu firu ta reha, ereve rare makuri buka voa uka siseita lea karu.

⁴ Soa foromai Papuvita voa hailareva lei pepeava. Ara lea o ata la moi, hailareva lei pepeava.

⁵ Eve haimafu karu foromai la muia ere ore leiti vei. Papuvita forerai vei la leipea.

⁶ Etau hariaharia vei haikavora levi leitia; a—, etau foromai vei veveu lei loki ita maeatita o ita eve haikaeaita haiiri Ualare la lei ore leitia.

⁷ Soka Ualare ve tairu, karu sa seseōvi ore auke leita lea tairu, eve haiiri aea eve haikaeaita la Keriso Iesu voa kiva lei meava roi.

⁸ Paumarehari e, laua sarapaita o meha: okofa ita etau, taivotaita etau, haura ita etau, ovava ita etau, haiforoe leita etau, maeati o ita etau, o foroe lōvoa eaei oria, aeata arita o lareva lōvoa eaei oria, lōfeare etau foromai vei haikaeakaea aria.

⁹ E ara voa satiriōri aea maravi aea mapi mapi aeata ofae eavaiape lea etau la leitia; lōfeare voa tairu ve Ualare e ita farehoria lei peava roi.

Paulo ve maeatita o meru vei

¹⁰ Ara Papuvita voa hailareva rovaea la leipea, e sa araro hai ata kaeaita lea vei. Ara ore e mea savori hai ara vei kaeaiape, a—, e etau leiti vei otiharo kasirau.

¹¹ Ara arave merava vei o levi moi roi; ipi ara leafeare meitore ara lea mai voa haiiri lareva leiti vei malasa.

¹² Ara merava ita meita lōfeare mai ara ore; etau rauapo ovi meita lōfeare mai ta ore. Soasoa foromai voa, etau etau foromai voa, ere popaita varo, eroa sarita varo, etau rauapo ovi meita varo, merava ita meita varo, ara lōfefeare mai hariaharia ita meita malasa kofa.

¹³ Araro lei rofo leitita lea Ualare voa, ara etau foromai la leitita ore.

¹⁴ Etau farakeka e sa arave heafo soa voa araro toaraita, mai lareva reha.

¹⁵ E Filipi karu ore, Ovoro Lareva la oarehōva soa voa itoro a’ ara Makedonia kiripōpe soa ve aite voa, ekalesia firu farakeka aea ara ita fareho etau miōri aeata ovaita mai la leiti sore, e sa haria reha.

¹⁶ Ipi ara Tesalonika voa peiape lea mea, e soa farakeka aeata soa aeata etau araro tai itapaiape arave merava soa la toarai vei.

¹⁷ Ara meru etau la elia kao; a—, ero lei lareva lei taita fare feare la topiari rauapo leiti vei.

¹⁸ Soka etau foromai la araro miōri roroka; ara etau rauapo kofa ia. Ipi e sa Epafrodito ita itapaia lea meru etau la ara ovaia eavia; muforoe etau Ualare voa omopa posasea arero lei haiforoe leita etau reha.

¹⁹ Arave Ualare sa eve haikaeaita etau foromai la toari, areve sosorusosoru ve pisoso etau Keriso Iesu voa ero lōfeare miarai roi.

²⁰ Ereitave Oa Ualare soa sarapai auke leita sosorusosoru lei peava. Amene.

Sisa o foroe

²¹ Maeaforoe o Keriso Iesu voa pepeita Ualare ve karu foromai la moia. Ara ita fareho pepeita paumarehari ta maeaforoe o ero la moipea.

²² Ualare ve karu foromai, hea ta Kaisara ve uvi voa pepeita karu, ere maeaforoe o ero ta la moipea.

²³ Papuvita Iesu Keriso ve haiforoe leita meru eve arahoha ita peava.