Filipi 3 - Testamenta Áre 1983 (Toaripi PNG)

Ualare ita haura leita mai kofa

¹ Soka, arave paumarehari e, Papuvita voa hailareva lei pepeava. Ara e vei evera ukōpe lea o la ata ukai vei, araro lei haisora leitita etau kao, aeata ara eve makuri ta lōri toari lei pepei veia.

² Lea kaiae leita karu, lea ave maealolo maealolo, maea ruru la sarapaita lea karu vei, kiva kofa lei pepeava.

³ Ara erero rare lōri aravaipeta ipi peritome karu kofa ereita meha. Ipi ereita Ualare la areve Arahoha ita maso toaita karu, aea Keriso Iesu voa hiva ō vovea. Ereita maeasarōva voa leitita peise la sesearai sore.

⁴ Eite ara sa maeasarōva voa leitita peise voa sesearaita ore. Karu aea maeasarōva voa leitita peise voa sesearaita ore, hai lōri kaeait’ oria, ara sa lōfeare etau voa arero sapatai.

⁵ Araro epi eight sare voa peritome leipe, ara Israela karu kofa, Beniamina ve toruipi karu aea, arave papa ta Heberu karu. Iuda Safu leita Mai voa ara Farisea karu.

⁶ Ara arave haihahari lea mai voa mōfeare muiaiape, ara ekalesia la hasiavaiape. Mose ve Safu la kakeva lei, Ualare ita haura lōri leiti vei, ara lea mai voa kaiae kakaeite.

⁷ A—, araro everori lōfeare lei lareva leiape lea etau foromai la ara faitora Keriso vei eite auke etau feare seseōvaitore.

⁸ Okofa, ara etau foromai la eite auke etau feare seseōvai, ipi etau larevaeiteapo meha, Keriso Iesu, arave Papuvita la ore leiti vei. Ipi are vei ara arave etau foromai la lei veverapi kalei la mea, ara lea etau la usoso roro feare seseōvi, ara Keriso la ovi

⁹ are ita topiari totoeai vei. Ara faitora arave elore leitita haura, Safu Mai la kakeva leitita lea mai haura kasirau; a—, Keriso la sukaerereai voa foreraita lea mai sa haura, Ualare sa ereita sukaerereaita lea vei ereitaro miaraita lea mai haura.

¹⁰ Arave haikaeaita haiiri meha, Keriso la malasa lei, are opi ata itoipe siahu ta ore lei, areve hehea are ita fareho leiti vei, aea are opōpe lea mai feare voa ta opai vei.

¹¹ Lōfeare voa ara ta opi ata itoita soa voa foreraita ore.

¹² Ara faitora lea etau la ovi roroka varo, araro lei ovava lei kekese loita varo, arave o lōfeare kao; a—, ara loreape serea ita ō vovea, lea etau la aite soa voa ovi arave elore vei, usoso Keriso Iesu sa araro ovi ara areve tivi karu lei mea vovea.

¹³ Paumarehari e, arave o mōfeare kao, ara lea etau la faitora ovi mea, a—, mea etau farakeka la ara lei vovea, ara aite voa siseita etau foromai la haisafi kalei, omopa voa siseita etau voa saurapi soea,

¹⁴ ara soa itua‐tao kofa vei loreape ō vovea sapatai tava ovai vei, Ualare sa Keriso Iesu voa ereitaro isa papatavi maravai ve tava reha.

¹⁵ Ereita haiiri sora karu foromai haiiri lōfeare kaeaia; a—, e etau aea voa haiiri haria leitita, a—, Ualare lea etau ve eite ta ero muiai roi.

¹⁶ Etau farakeka ereita ore lei roroka leitita lea okofa feare la ovi lōri roroava.

¹⁷ Paumarehari e, e farehoria arave leita mai la ruruiaia, aea elave mai feare lei vovo roroaita karu la ofae fofoisaia.

¹⁸ Ipi usoso ara ero evera moiape, aea faitora ovororo ita ero ata la moipea, karu rauapo Keriso ve satauro la sukavutea ote karu feare lei roroa vovea.

¹⁹ Ereve sisa soa saroroapaita oti voa, ipi ereve ére ereve ualare reha. Ere ereve maeamariti leita mai vei hiva ō vovea, aea ere mearovaeka etau vei haria haikaea vovo roroa vovea.

²⁰ A—, ereitave karikara kofa kauri voa, aea ereita ereitaro fareōvi makuri leita Vita la kauri voa forerai vei au tai vovea, Papuvita Iesu Keriso reha.

²¹ Are ereitave maeapatoita maea la toarōrisa, areve sosorusosoru ve maea feare lei are leiti roi; ipi are siahu ia, are etau foromai la lei areve siahu ve ipi voa leitita ore.