Filipi 2 - Testamenta Áre 1983 (Toaripi PNG)

Keriso ve haiiri‐ipi aeata areve rovaeka soa

¹ E Keriso voa foreraita rofo la ore lei, aea areve haikakare sa ero lei vovoro leitita, e Arahoha ita fareho lei, elore elore haiiri mafu aeata maeaforoe ita lōri leitita,

² a—, araro lei hailareva foromai leitia, mōfeare, e haiiri usoso lei, elore elore haikakare usoso lei, eve haiiri ita ove ita ta farakeka leitia.

³ E etau farakeka aea la faeafaea oita haiiri ita ō eite auke maeamarōva ita levi leitia; a—, e elore elore haiiri‐ipi lei, eve maeapavora karu sa eve lareva la sapataita lōfeare haiiri la ovaia.

⁴ E karu farafarapo eve elore elore lareva la haria levi elia, a—, eve maeapavora karu ve lareva ta reha.

⁵ Keriso Iesu voa eaeiape mea haiiri e voa ta ovaia.

⁶ Mōfeare, are Ualare ve opape lei, lei vovo meiape, a—, are Ualare ita usoso meita mai la mai kere paeai haikaeai auke lei,

⁷ are kofa lea mai la kiripi kalei, are fasaita sarufa karu ve opape la ovi meiape. Arero karu ve maea voa epi,

⁸ are karu ve soso la ovi meiape. Are elore maea la ipikao lei, soa tetete opai voa ta kakeva leipe, eite lea opai satauro voa.

⁹ Lea vei Ualare arero arori kofa voa moravi, aea rare ta arero miōri la eaea, rare foromai ve arori kofa voa eaeita lea rare farakeka reha;

¹⁰ Iesu ve rare vei kauri voa aea mearovaeka voa aeata mearovaeka ve ora voa pepeita arihau foromai sukakoka avai vei,

¹¹ aea Iesu Keriso are Papuvita lea o ape foromai sa meimei, Ualare Oa la lei sosorusosoru leiti veia.

¹² Soka haikakare leita paumarehari e, e soa foromai arave soso voa araro kakeva leiape; faitora ara maria voa peipeta soa voa, e kakeva kofa leitia. Ero lei makuri leita soa la lei kekese leiti vei, tore ita maea oriri‐oriri ita heafo lei vovo roroava.

¹³ Ipi Ualare sa haikaeaita lea lareva la leiti vei are e voa tivi lei vovea, ero lei haikaeai vei aeata siahu ta ero miarai vei.

¹⁴ E etau foromai la o vituvitu auke ita, aeata o serea elore elore ari auke ita leitia.

¹⁵ Lōfeare voa e Ualare ve atutemori, kaiae auke aeata maea vevete‐pota, aeata maita maealolo auke ita lei roroai vei, kaiae lei aeata ōvafae kere leita taotao ve aru voa; aea e ovava ta lei haeai vei usoso mearovaeka voa ovava haeaita koru fefeare,

¹⁶ ipi e makuri ve o la eve mai sa ovi muiaita lea vei. E lōfeare leitit’ oria, ara e vei hiva arita ore Keriso ve sare voa, ipi ara auraka auea loreape ari kao, a—, arave tivi heafo eite ia.

¹⁷ A—, arave ovo la eve sukaerereaita haiiri voa usoso maso etau voa feare sisōvai vei leitita varo, Ualare voa omopa posaseai vei. Lōfeare leitita, a—, ara hailareva lei, aea e ita farehoria ta hailareva leiti roi.

¹⁸ E ta hailareva lei ara ita farehoria hailareva leitia.

Timoteo auka Epafrodito ia

¹⁹ Ara Papuvita Iesu voa hai mō kaeaipea Timoteo ero tai soa haekao itapai vei la roi, ara eve fari la mapi ore lei, haiiri rofo lōfeare leiti vei.

²⁰ Arave itai voa karu aea are feare kasirau ero kiva kofa leiti vei.

²¹ Ipi ere foromai ve haiiri rovaea ereve elore elore etau vei, a—, Iesu Keriso ve tivi vei ere haiiri kasirau.

²² Timoteo ve leita mai leafeare e lea la ore; etau meha, are oa la toaraita atute feare, Ovoro Lareva la fafarapi ara ita fareho tivi lei vovea.

²³ Soka, etau ara vei leafeare leitita varo, ara lea la ore leita soa ara arero utohoa ero tai au itapai roi.

²⁴ A—, ara Papuvita la sukaererea pea, ara ta mea savori kao ero tai forerai roi.

²⁵ Arave haiiri Epafrodito ta ero tai itapaita lareva reha. Are arave marehari feare lei, tivi voa fareho lei aea ara ita mare fareho haukaita vita aeata e sa itapi meita meu karu araro toarai vei.

²⁶ A—, are ero foromai la ofae eavai vei haikaeai rovaea, aea are haieae rovaea kofa e sa areve eka fari la mapōpe lea vei.

²⁷ Okofa are eka lei opai vei leipe; a—, Ualare sa arero maeaforoe leipe; eite arero haria kao, araro ta reha ara haisora farakeka voa haisora maea aeata topiari levi ovai veia.

²⁸ Lea vei arave haiiri rovaea arero itapai vei. E arero ata ofae eovi, hailareva leiti roi, aea arave elore haiiri eae ta kaleiti roi.

²⁹ Soka Papuvita voa hailareva foromai ita arero maeafukapaia; aea lōfeare mai leitita karu la taivotaia.

³⁰ Ipi Keriso ve tivi vei are areve makuri voa heafo lei opai vei leipe, e sa leiti vei ore auke leitita lea tivi ara vei leiti vei.