Filipi 1 - Testamenta Áre 1983 (Toaripi PNG)

¹ Paulo auka Timoteo ita, elaka Keriso Iesu ve sarufa karu oraka sa ukaita karoro meha; Filipi voa pepeita Ualare ve karu foromai vei, aea ekalesia la kiva leita harofave karu aeata diakono ita vei ta reha:

² Ualare ereitave Oa voa aeata Papuvita Iesu Keriso voa foreraita haiforoe aea tairu ita e voa lei pepeava.

Paulo ve loki o karoro mutita karu vei

³ Ara ero haikaea vo meita lea meamea, ara arave Ualare la maeati vovea;

⁴ aea ara e foromai vei Ualare la loki leita lea soasoa foromai voa, ara hailareva ita loki lei vovea,

⁵ ipi omopa kofa soa itiiti faitora, e sa Ovoro Lareva ve tivi voa araro toaraita lea mai veia.

⁶ Ara ore kofa loita meha, tivi lareva e voa fapōpe lea Ualare sa lea la ata lei lei, tetete are lea tivi la lei roroka leiti roi Keriso Iesu ve sare voa.

⁷ Ara e foromai vei hai lōri seseōvaita lea haura, ipi arave haiiri sa ero kaea vovea. Ara dibura voa peipeta soa aea ara kōto soa voa Ovoro Lareva vei o maealolo la sukavutea, arero okofa lei moita soa voa, e ara ita farehoria haiforoe ta la leipea.

⁸ Araro lei okofa moita Ualare mea etau ore, ara Keriso Iesu ve haiiri ita ero haikakare rovaea araitore.

⁹ Arave loki o meha, eve haikakare maea ata topiari haiore ita, etau la seseōvi ore leita haiiri ita rovaea kofa leiti veia.

¹⁰ Lōfeare voa e leita mai lareva kofa la seseōvi muia ore leiti roi, aea e maea vevete‐pota, maita maealolo auke leiti roi Keriso ve sare vei;

¹¹ e Iesu sa lei foreraita haura ve fare foromai rauapo la tai roi, Ualare la lei sosorusosoru lei maeati vei.

Makuri ve eite Keriso reha

¹² Paumarehari e, ara haikaeai e ore leiti vei; ara voa lei foreraia mea etau voa Ovoro Lareva la lei la fafarapaipea.

¹³ Kaisara ve uvi kiva karu firu foromai aeata karu hariaharia foromai ita, ere ore ara dibura uvi voa fasi peipeta ipi Keriso vei;

¹⁴ aea arave paumarehari rauapo Papuvita voa ara dibura voa fasi peipeta lea vei haiiri rofo lei, ere ape karōva ita Ualare ve o la tore auke ita sukōvō vovea.

¹⁵ Okofa karu hea hilisi ita aea sosori ita Keriso vei itoro aritore; a—, karu hea haiiri lareva ita itoro aritore.

¹⁶ Lōfeare karu ere araro haiforoe lei itoro aritore; ere ore araro mōvoa itapi laipea ara Ovoro Lareva ve okofa la muiai vei.

¹⁷ Lea karu haria hea, ere Keriso la faeafaea arita haiiri ita itoro aritore, okofa ita haiiri kao, a—, ara dibura voa peipeta mea soa voa araro hasiavai vei.

¹⁸ Soka lea etau eite kao. Mai hariaharia voa, lohalai ita varo okofa ita varo, Keriso la itoro ō vovea, aea lea vei ara hailareva. Aeata ara hailareva lei vovo meava roi,

¹⁹ ipi ara ore mea etau voa araro lei paraea ara makuri leita soa la ovai roi, eve loki o vei aea ipi Iesu Keriso ve Arahoha sa araro toaraita eavia.

²⁰ Ara sa haikaea taita haiiri rovaea meha, ara etau farakeka aea voa maeamariti levi leiti vei, a—, usoso soa foromai voa leita feare, ara faitora ta ivara lei, Keriso ve fari la arave maea voa moravi rovaea leiti roi, ara makuri leita varo, opaita varo.

²¹ Ipi ara vei makuri ve eite Keriso reha, aeata opai voa ara etau lareva kofa la sukaeai roi.

²² A—, ara arave maea voa makuri lei pōvi, ara arave tivi ve eite ita la ofae eavaita, a—, ara etau lekōru la haikaeai ovai vei ara lea ore kasirau.

²³ Ara haikaeaita haiiri orakoria ia, arave horahora lōfeare voa. Ara haikaeai rovaea mea makuri kiripi Keriso ita fareho pavai vei; lōfeare foromai lareva kofa.

²⁴ A—, ipi e vei ara maea voa makuri lei pavaita, lea ta lareva ia.

²⁵ Ara lea etau haiiri kekese loita lea vei, ara ore ara pōvi e ita farehoria tivi leiti roi, sukaerereaita haiiri voa ero lei asi aeata lei hailareva leiti vei.

²⁶ Lōfeare vei Keriso Iesu voa eve arita hiva ara vei rovaea leiti roi, ipi ara sa ero tai foreri e ita farehoria ata pavaita lea vei.

²⁷ Soka etau rovaea meha, e makuri lei pepeita lea mai la lei usoso Keriso ve Ovoro Lareva ve mai feare leitia; lea vei ara ero ofae eavai vei foreraita varo, a—, ára‐ita peita varo, ara mea fari e vei mapai roi, e arahoha farakeka ita kere soi laepepea, aea haiiri farakeka ita Ovoro Lareva la sukaerereaita mai vei farehoria ivara lei,

²⁸ ero sukavuteaita karu vei tore auke ita roroa. Ere Ualare la sukavuteaita lea vei erero saroroapai vei leitita peise etau reha, a—, e vei Ualare voa foreri fareōvi makuri leita peise reha.

²⁹ Ero miaraita maeaforoe ve meru meha, Keriso la sukaerereaita lea sa haria kasirau, a—, are vei hehea ta lei vovo roroai vei.

³⁰ E maola ta la toaipea, usoso e ara sa evera toōpe la ofae eavōpe lea maola feare, aeata e ara vei faitora mapaipeta mea fari feare.