Filemona 1 - Testamenta Áre 1983 (Toaripi PNG)

¹ Paulo, Keriso Iesu ve dibura karu, auka ereitave marehari Timoteo ita ve karoro meha; elaka haikakare lei, tivi farehoria leita vita Filemona,

² aea elakave uaroa Afia, aeata elaka ita mare fareho haukaita vita Akipo, aeata ave lea uvi voa kokorukaita ekalesia firu ita veia:

³ Ualare ereitave Oa aea Papuvita Iesu Keriso ita sa haiforoe leita meru aea tairu ita la ero miarai peava.

⁴ Ara arave Ualare la maso toaia soasoa voa ara aro haikaeaita lea meamea, ara Ualare la maeati vovea;

⁵ ipi a sa Papuvita Iesu Keriso aea Ualare ve karu foromai ita la haikakare lei, aeata sukaerereaita lea fari la ara mapi ore lei roroka.

⁶ Ara Ualare la loki lei, a ita fareho Keriso la sukaerereaita lea karu ere ta lōfeare vei ereita Keriso sa miōri maravaita lea etau foromai la ore leiti vei.

⁷ Ipi, arave marehari e, ara ave haikakare voa hailareva rovaea aea haiiri rofo lei mea, ipi a sa Ualare ve karu ve haiiri la lei ata áre lei roroaipeta lea vei.

⁸ Lea vei ara Keriso ve rare voa haikaeaita mai la a sa leiti vei aro haisa moi vei ape karōva ia,

⁹ a—, ipi ave lea haikakare vei, ara aro loki la leipea. Eite arao, Paulo, oasora, aea faitora Keriso Iesu vei dibura lei meita,

¹⁰ a—, ara arave mea atute, Onesimo vei aro loki la leipea. Ara araro fasi peita soa voa areve oa lei laipea.

¹¹ Evera soa voa areve sarufa tivi voa are aro etakofa toarai kao, a—, faitora are eite ia, a vei aeata ara vei.

¹² Ara arero aro tai ata la itapai, aea arave haiiri kofa are ita farehoria la terai reha.

¹³ Arave haiiri are ara ita fareho pei vei, are sa ave ipaisa lei, araro toarai vei araro Ovoro Lareva vei dibura voa fasi peipeta mea soa voa.

¹⁴ A—, ara ave haiiri ore auke ita etau aea la levi leiti roi, ipi ave maeaforoe vei haisa moita feare levi leiti vei, a—, ave elore haiiri sa haikaeaita eavia.

¹⁵ Auvaro arero a voa fareōvi soa taheka oti haria voa peavōta, a eite arero ata ovi lōri peava roi;

¹⁶ fasaita sarufa feare kao, a—, are sa sarufa ve arori vita leiti vei, haikakare sa leitita marehari. Are lōfeare ara vei, aea lea ve arori voa a vei ta reha, areve maea voa aeata Papuvita voa.

¹⁷ A araro ave tivi maeapavora vita o ari haikaeaita, a—, arero ta araro feare maeafukapaia.

¹⁸ Are aro kaiae lei aea ave moni la ovait’ oria, a—, lea la miarai vita arave rare la ukaia.

¹⁹ Arao, Paulo, arave elore mai sa lea o ukai, ara sa lea moni aro ata miarai roi. Eite, ara o kao, a—, a ave elore ove vei abitorea ia ara voa.

²⁰ Soka, marehari e, araro lei hailareva leitia Papuvita voa; arave haiiri la Keriso voa lei áre leitia.

²¹ Arave sukaerereaita haiiri meha, a arave o la kakeva leiti roi, lea vei ara a voa o la ukaipea; ara ore ara aro loki lei moipeta lea etau voa, a sa maea aeata topiari lei arori voa leiti roi.

²² O aeata meha, pavai lalava aea la ara vei everori kekese leitia, ipi arave taipeta haiiri meha, e sa Ualare la leitita lea loki vei, araro lei paraea ero tai itapai vei.

²³ Epafara, ara ita fareho dibura voa fasi peipeta vita, maeaforoe o aro ta la moipea.

²⁴ Mareko, Aristareko, Demasi aeata Luka ita, ara ita fareho tivi leitita maeapavora karu reha.

²⁵ Papuvita Iesu Keriso ve haiforoe leita meru eve arahoha ita peava.