Efeso 6 - Testamenta Áre 1983 (Toaripi PNG)

Atutemori aea oalou‐ita vei

¹ Atutemori e, eve oalou‐ita la kakeva leitia Papuvita voa, ipi lea mai haura.

² Ave oalou‐ita la maeaforoe lei taivotaia, otoare etau ita topiari miarōpe omopa safu o reha.

³ Lea otoare mōfeare, A lareva ita lei aea a mearovaeka voa sare sare rauapo pei vei.

⁴ Oa‐ita e, eve atutemori la lei kitou leiti vei levi leitia, a—, Papuvita sa satiriaraita o aea kureaita mai ita voa erero lariōvi kiva leitia.

⁵ Fasaita sarufa karu e, eve mearovaeka papukaru ve o tore ita maea oriri ita aea haiiri farakeka ita, kakeva lei lei vovo roroava, e sa Keriso vei tivi la leitita feare.

⁶ Papukaru ve ofae sa eovi, ere sa maeati vei lea tivi feare levi leitia; a—, usoso Keriso ve fasaita sarufa feare, kakeva leita haiiri foromai ita Ualare sa haikaeaita etau lei pepeava.

⁷ Eve tivi hailareva ita leitia, karu vei leita feare kao, a—, Papuvita vei leita lōfeare.

⁸ Mea la ore leitia, karu foromai sa leita lea etau lareva vei Papuvita sa tava aite miarai roi, ere fasaita sarufa karu varo, pisiri voa roroaita karu varo.

⁹ Papukaru e, e ta lōfeare mai eve sarufa karu la leitia; erero levi toa vuvuiavaia. Mea la ore leitia, ereve Papuvita kauri voa laipea, are ta eve Papuvita, aea are sa seseōvaita mai farakeka, are karu ve soso o ari sore.

Ualare ve maola etau

¹⁰ Soka laua sarapaita o meha: Papuvita ve siahu voa siahu ovi, aea areve rofo rovaea soa voa rofo lei roroava.

¹¹ E Ualare ve marehaukaita etau foromai la maravi eve maea voa mopaia, e Diabolo ve maeahahauhahau la sukavutea soi popōvai vei.

¹² Ipi ereita maola maeasarōva ovo ita karu ita toai sore, a—, harofave soa ve siahu ita karisu hariaharia, aea mearovaeka ve murumuru ve lohio karu aea arori ve soasoa voa popōvi kaiae leitita arahoha rauapo ita ta reha.

¹³ Lea vei Ualare ve marehaukaita etau foromai la mai paeaia, e sare maealolo voa erero sukelapi, etau foromai kekese lei lōri soi pepei veia.

¹⁴ Okofa la ovi kava feare eve sofa la suka, aea haura leita mai haiposa la sasaukaita auri feare aieri,

¹⁵ tairu ve Ovoro Lareva la ovi mora ikuku feare eve mora voa mopaia.

¹⁶ Soa foromai voa sukaerereaita haiiri la, laua feare, mai sa ovaia e Maealolo Vita ve a ita saita farisa la lea laua sa sasauka futaita ore leiti roi.

¹⁷ Fareōvi makuri leita siahu la maola auri kepakepa feare topaia; aea Arahoha ve marehaukaita soi feare la ta ovaia, Ualare ve O reha.

¹⁸ Soa foromai voa Arahoha ita veveu lei loki taupi lei vovo roroava. Ovoako lei haiiri rofo ita Ualare ve karu vei loki poetapai auke ita lei vovo roroava.

¹⁹ Ara vei ta reha, ara itoro arita soasoa voa arave ape la fapi, Ualare sa o haura araro miōri Ovoro Lareva ve hohore etau la ape karōva ita itoro ari vei.

²⁰ Ipi lea Ovoro Lareva vei ara Keriso ve ipaisa karu lei, auri horou sa fasi pea. Ara vei loki leitia, ara lea Ovoro ape karōva ita haikaeaita mai kofa feare itoro ari veia.

Sisa o

²¹ E arave fari la ore leiti vei, arave meita mai leafeare, ereitave haikakare leita marehari, aea Papuvita voa toaraita tivi karu kofa, Tukiko sa lea etau foromai ero omoi roi.

²² Ara arero ero tai lea vei la itapai reha, e elave fari la ore lei, aea are sa eve haiiri la rofo leiti vei kureai veia.

²³ Ualare Oa voa aea Papuvita Iesu Keriso voa foreraita tairu aea haikakare aea sukaerereaita haiiri ita topiari, paumarehari voa lei peava.

²⁴ Haiforoe leita meru ereitave Papuvita Iesu Keriso la poetapai auke ita haikakare araita karu foromai ita lei peava.