Efeso 5 - Testamenta Áre 1983 (Toaripi PNG)

Ovava voa roroava

¹ E Ualare sa leita mai la ruruiaia, usoso areve haikakare leita atutemori fefeare;

² aea haikakare ita lei vovo roroava, usoso Keriso ereitaro haikakare leipe lōfeare, aea areve elore maea la ereita vei au miarōpe, Ualare voa omopa posaseōpe muforoe leita maso etau reha.

³ A—, herei aeata sirisiri mai, aea etau maravai vei liri arita lea mai ita vei eve aru voa o levi moia, ipi e Ualare ve karu eavia.

⁴ O maeamariti aea maeakakare laua, aea opasea laua maealolo ita la levi sukavaia, a—, Ualare la marase o aria.

⁵ Mea la ore kofa leitia, herei leita, aea sirisiri mai la leita, aeata etau maravai vei liri arita karu, ipi lea mai usoso apeva ualare ve ove la maso toaita feare, lōfeare mai la leita karu foromai ere Keriso aea Ualare ita ve basileia voa soa levi ovai roi.

⁶ Karu ero o maeakakare sa apeva levi vuteaia; ipi lōfeare mai hariaharia vei Ualare ve kitou kaeava arita karu ve arori voa fauka forerai roi.

⁷ Soka e lōfeare leita karu ita farehoria levi lei vovo roroava.

⁸ Ipi e evera soa murumuru leipe, a—, faitora e Papuvita voa ovava lei laepepea. Lea vei e ovava ve atutemori fefeare kerori vovo roroava.

⁹ Ipi ovava ve fare mai lareva foromai, aea mai haura aea okofa ita voa tei asi ofae eavai vovea.

¹⁰ Papuvita sa maeatita lea etau hariaharia la malasa leiti vei seseōvaia.

¹¹ Eite auke murumuru leita lea mai la leita karu ita farehoria levi roroava, a—, erero pisiri voa lei foreraia.

¹² Eite ere murufa leita lea mai vei laua haria sukavaita maeamariti reha.

¹³ A—, etau foromai la ovava voa lei foreraita lea mea ereve eite kofa la pisiri muiaita reha; ipi pisiri lei ofae eovi ore leita lea etau foromai ovava loita reha.

¹⁴ Lea vei o mō aritore, Ivutu iavaita karu e, ovoako lei, opai voa eaea kiripi itoia, aea Keriso sa aro haea ovava leiti roi.

¹⁵ Soka eve lei vovo roroaita mai vei, kiva kofa leitia; haiivavu karu feare kao, a—, haiore karu feare.

¹⁶ Leita soa lareva la ovai peava, ipi mea soa sare maealolo ia.

¹⁷ Lea vei maeakakare levi leitia, a—, Papuvita sa e leiti vei haikaeaita lea haiiri la seseōvi ore leitia.

¹⁸ Ma maealolo la la’ maeakakare levi leitia, ero lei kaiae leitita mai reha; a—, Arahoha sa soaria.

¹⁹ E salamo o, fara o, aeata ove ve aua ita elore elore mei fara feraia, haiforoe leita fara eve haiiri voa feri Papuvita la maeatia.

²⁰ Ereitave Papuvita Iesu Keriso ve rare la ovi etau foromai vei Ualare Oa la meavea maeati peava.

Uamori ita vita heaea ita vei

²¹ E Keriso la taivotaita lea vei, e elore elore kakeva lei pepeava.

²² Uamori e, e eve elore elore vita heaea la mapi kakeva lei roroava, e sa Papuvita la kakeva leitita lōfeare.

²³ Ipi vita areve ua ve harofave vita are reha, Keriso sa ekalesia ve harofave leitita lōfeare; ekalesia areve maea reha, are ta ekalesia la lei makuri leitita Vita.

²⁴ Soka ekalesia sa Keriso la kakeva lei roroaita lōfeare, uamori ta ereve elore elore vita heaea la kakeva kofa lei roroava.

²⁵ Vita heaea e, e eve uamori la haikakare araia, usoso Keriso sa ekalesia la haikakare araita lōfeare. Are areve elore maea la ekalesia vei miarōpe;

²⁶ are arero bapatiso ma aea omoita o ita sa lei ovava lei, arero lōri lei safu leiti vei,

²⁷ ekalesia sosorusosoru ita, maea horarave aea kikiteōva kikiteōva aeata maita maealolo auke aea lōfeare etau auke ita, arero areve elore vei omopa posasea ovai veia.

²⁸ Heavita foromai ereve uamori la lōfeare haikakare leiti vei, ere elore elore maea la haikakare leita lōfeare.

²⁹ Ipi areve elore maeasarōva la kaifa leita karu kasirau, a—, are arero savua kiva lei vovea; usoso Keriso sa ekalesia la leitita mai feare;

³⁰ ipi areve maea voa toepi siseita etau ereita meha.

³¹ Usoso Safu Buka ve mea o feare: Lea vei karu areve oa aea areve lou ita la kiripi areve ua la pasaeai roi, aea ereuka sarōva farakeka leiti roi.

³² Mea o hohore etau rovaea; eite ara Keriso aeata ekalesia ita vei laua sukavaipea.

³³ Soka e vita heaea eve elore elore ua la haikakare araia, eve haria maea la leita lōfeare, aea ua ta areve vita la taivotaia.