Efeso 4 - Testamenta Áre 1983 (Toaripi PNG)

Makuri áre ekalesia voa

¹ Soka arao, Papuvita ve dibura karu, ero la kureaipea, ero isaita lea mai voa, lareva ita kerori vovo roroava.

² Haiiri‐ipi ita, haiiri mafu ita, kitou auke haiiri ita mea savori lei vovo roroava; haikakare lei elore elore moraria.

³ Tairu ve totoeaita haiiri ita, Arahoha sa miaraita haiiri farakeka la kiva lei vovo roroava.

⁴ Ipi maea are farakeka, Arahoha ta farakeka; usoso e etau farakeka la au tai vovo roroai vei ero isōpe lōfeare.

⁵ Papuvita are farakeka; sukaerereaita haiiri ta farakeka; bapatiso ta farakeka.

⁶ Ualare ta farakeka, are karu foromai ve Oa; are etau foromai ve arori voa, are etau foromai voa tivi leititore, aea are etau foromai ve iri voa peitore.

⁷ Usoso Keriso sa meru la seseōvi miaraita soa feare, ereitaro farafarapo elore elore maeaforoe ve meru la miōri la roroa.

⁸ Lea vei Safu Buka voa o mō uka sisea, Are arori voa patei, are fasi roroaiape karu rauapo la fasi lariōvōpe, aea are meru etau rauapo karu la miaraiape.

⁹ Are sa pataipe lea o ve eite lekōru? Eite meha: are mearovaeka ve toru iri voa omopa faukōpe eavia.

¹⁰ Faukōpe lea Vita, are ta kauri foromai ve arori voa pataipe, are etau foromai la arori ita ipi ita voa lei soari vei.

¹¹ Are ta meru etau rauapo karu la aioraiape; karu hea la lei ere aposetolo karu leiti vei; hea ta peroveta karu leiti vei; hea ta Ovoro Lareva la itoro ari vei; hea ta ekalesia la kiva karu aea satiriaraita papukaru leiti vei.

¹² Are mai lōfeare leipe ipi Ualare ve karu foromai la satiriōri satiriōri kekese leiti vei, ere sa toaraita tivi lei lei, Keriso ve maea la turi moravai vei;

¹³ tetete ereita foromai totoea sukaerereaita mai farakeka la ovi roroka lei, aea Ualare ve Atute la ore kofa leita soa ta foreri, karu sora lei, Keriso ve rovaea kofa soa feare lōri leiti roi.

¹⁴ Lōfeare vei ereita irave kaekae ata levi leiti vei, satiriaraita o hariaharia sa lei, mea sa toa fareōvi aea aroaro sa lei lō patai lō fauka leitita feare lei, karu ve maeahahauhahau aea ereve apeva sa kurea kaiae voa levi lariōvai roi.

¹⁵ A—, ereita okofa la haikakare ita moita, etau foromai voa are voa topiari, asi asi rovaea lei, ereita Keriso tai forerai roi; ereitave harofave Vita are reha.

¹⁶ Are voa maea foromai asi asi etau foromai lareva ita mopi mopi kere lei, maea voa toepi siseita etau ve elore elore tivi lōri lei, haikakare ita rovaea lei asaitore.

Makuri áre Keriso voa

¹⁷ Soka Papuvita ve rare ita ara ero la kureaipea, e faitora usoso toru hariaharia karu sa leita lea mai feare voa ata kerori vovo levi roroava. Ere ereve ivavu leita haiiri voa roroa vovea;

¹⁸ aea ereve haiiri ta murumuru. Ere Ualare sa miaraita makuri voa soa ovai kasirau ipi ere haiivavu kofa, aeata haiiri kere leitita eavia.

¹⁹ Ere maeamariti haveva kofa karu; ere herei mai la lei, etau maravai vei liri a’, sirisiri mai hariaharia la leiti vei ereve haiiri la miōri la roroa.

²⁰ A—, e lōfeare mai Keriso voa satiriōri ore leiti sore,

²¹ e areve ape o la etakofa mapi, aea are sa ero satiriaraiape lea okofa ve eite la ore leitit’ oria.

²² E evera haikaeaiape haiiri, e sa leiape mai ita la fari mutatapaia; lōfeare mai maealolo leita ipi are maeahahauhahau la liri aritore.

²³ Eve haikaeaita aeata eve seseōvaita haiiri ita la lei áre leitia,

²⁴ aea karu áre puta feare eve maea voa mopaia, usoso Ualare ve opape feare lei, mai haura aeata okofa ita la lei muiai vei.

²⁵ Lea vei apeva o la fari mutatapi, karu foromai elore elore maeapavora karu ita okofa la laua sukōvō vovo roroava, ipi ereita Keriso ve maea voa elore elore topiari siseita etau fefeare eavia.

²⁶ E kitou leitit’ oria, a—, kaiae levi lei foreraia; sare eve irifei meita mai voa levi sukopaia.

²⁷ Peita oti Diabolo la levi miaraia.

²⁸ Torea karu, torea ata levi leitia, a—, mai oraka sa tivi lareva leitia; lōfeare lei moni la ovi merava karu la aiorai vei.

²⁹ O maealolo eve ape poe voa levi mei foreraia; o lareva la moia, karu ve haiiri la lei ovava lei, mapaita karu la lei haiforoe leiti vei.

³⁰ Ualare ve Safu Arahoha Lareva la lei haiiri eae levi leitia; ipi lea Arahoha are Ualare sa sasarōpe rare peise e voa reha, soa are sa ero lei paparaea ero lei makuri leita lea sare voa.

³¹ Haiiri eokere aea kitou hehea, aea irifae aea heohea e voa fari mutatapaia, aea hasiavaita haiiri foromai ta reha.

³² Elore elore maeaforoe lei, haiiri mafu ita elore elore kaiae la sasuka pepeava, usoso Ualare sa Keriso voa eve kaiae la sasukōpe lōfeare.