Efeso 3 - Testamenta Áre 1983 (Toaripi PNG)

Toru hariaharia karu ve aposetolo

¹ Ipi lea etau vei ara Paulo, Keriso Iesu ve dibura karu, e toru hariaharia karu vei fasi laipea.

² E mea o la mapaia varo, Ualare areve maeaforoe vei mea tivi eve lareva vei araro miarōpe.

³ Ualare areve murufa haiiri la araro muia lei ore leipe, usoso ara lea etau vei o harua evera ukōpe lōfeare.

⁴ E lea o la mutita lea mea, e Keriso ve murufa haiiri voa arave haiore la ofae eovi ore leiti roi.

⁵ Evera taotao asease voa karu sa lea etau la lei ore leiti vei miarai kasirau, a—, faitora Ualare are Arahoha sa areve safu aposetolo aea peroveta karu ita la lea etau muiai roroka.

⁶ Lea murufa haiiri ve eite meha, Ovoro Lareva sa lei toru hariaharia karu ere Iuda karu ita farehoria Ualare voa hasu maravi, ere maea farakeka voa toepi sisea, Ualare sa Iesu Keriso voa otoare ōpe etau la farehoria maravaita karu.

⁷ Areve maeaforoe ve meru vei Ualare areve siahu sa araro lei ara Ovoro Lareva ve toaraita tivi karu ta leipe.

⁸ Ara Ualare ve karu foromai voa eite auke kofa lei meiape. A—, Ualare maeaforoe lei meru araro miarōpe, ara toruipi hariaharia karu ve omopa voa karu sa muti ore auke lei, Keriso ve lea pisoso etau rauapo la itoro ari vei,

⁹ aea etau foromai la pisosipe Ualare are evera soa itiiti faitora arorisaita lea haiiri ve eite la ara sa karu foromai la muiai vei.

¹⁰ Ipi mea faitora soa voa Ualare ve haiovoro mai hariaharia rauapo la, kauri soasoa ve harofave karu, siahu karu ita la lei, ekalesia voa ofae eovi ore leiti veia.

¹¹ Ualare mai lōfeare leipe usoso are sa soa foromai voa haikaeata lea haiiri feare, are ereitave Papuvita Keriso Iesu voa lei okofa lei kekese leipe lōfeare.

¹² Ereita maea karōva rofo ita lei Ualare ve omopa voa oropai vei Keriso voa, ipi ereita sa arero sukaerereaita eavia.

¹³ Lea vei ara ero loki la leipea, ara e vei heafo leipeta etau vei haiiri levi totopaia, ipi lea ve eite eve sosorusosoru vei.

Paulo ve loki o

¹⁴ Lea vei ara Oa voa omopa voa sukakoka avi,

¹⁵ kauri voa aeata mearovaeka voa pepeita toruipi‐ipi foromai areve rare la aravaita lea Oa,

¹⁶ arero loki lei, areve sosorusosoru ve pisoso etau rauapo fefeare, are areve Arahoha sa siahu ero miarai vei, eve iri karu la lei rofo rovaea leiti vei,

¹⁷ aeata e sa sukaerereaita lea vei, Keriso eve haiiri voa pavai roi. E ta haikakare voa usoso seaupaita likilea aea kere vipaita uvi ve ipi otioti fefeare,

¹⁸ e Ualare ve karu ita farehoria siahu ovi, Keriso ve haikakare ve pisasa aeata savori aeata toru ita la seseōvi ore leiti vei,

¹⁹ aea areve haikakare la ore leiti vei, karu ve haiore la ovi aieraita lea haikakare, aea lōfeare Ualare ve so‐oita etau ero ta sisōvi soari veia.

²⁰ Ereitave haiiri voa siahu ita tivi leitita Ualare, are ta ereitave loki o aea ereitave seseōvaita haiiri foromai ita la topiari arori kofa voa lei, ereitave iri voa tivi lōri leiti roi;

²¹ sosorusosoru Ualare la leiti vei ekalesia voa aea Keriso Iesu voa taotao asease foromai voa, soa sarapai auke lei pepe peava. Amene.