Aposetolo 6 - Testamenta Áre 1983 (Toaripi PNG)

Aposetolo karu la toaraita karu seven

¹ Soka lea sare sare voa, Iesu la sukaerereaita karu sa rauapo leiape lea soa, Helene uri malasa lei sukavaita Iuda karu ere o ruruku Heberu uri sukavaita Iuda karu vei ōpe, ipi saresare larietau faeafaea a’ miaraita soa voa ereve ua lelesi lelesi ereve firu kofa maravai auke leiape eavia.

² Soka aposetolo karu twelve ere Iesu la sukaerereaita karu foromai la isa kokoruka mō ōpe, Ela Ualare ve ovoro fafarapaita mai la kiripi, saresare larietau faeaita tivi la leitita lareva kao.

³ Lea vei, paumarehari e, karu seven la e voa eli maravaia, fari lareva karu, Safu Arahoha haiore ita sa soa’ roroaita lea karu, aea ela mea tivi erero miarai roi.

⁴ A—, elao, ela soa foromai veveu lei haihahari ita Ualare ve o la fafarapai peava roi.

⁵ Karu foromai lea o vei hailareva leipe. Ere eli maravōpe karu aea Setefana, are haiiri foromai ita sukaererea Safu Arahoha ita sa so‐oita vita; aeata Filipi, aea Porokorusu, aea Nikanoro, aea Timono, aea Paramenasa, aeata Nikolausi, are Antioka karikara karu, a—, are Iuda karu ve mai la lei meiape.

⁶ Ere lea karu seven la Aposetolo karu ve omopa voa vipi, aposetolo karu veveu lei roroka lei, ere ereve mai ereve harofave voa miavōpe.

⁷ Soka Papuvita ve o fafarapi, aea Iesu la sukaerereaita karu Ierusalema voa au topiari sitavu sitavu leiape, aea maso tivi karu rauapo ta lea satiriaraita o la kakeva leiape.

Setefana ve fari

⁸ Soka Setefana, Ualare sa miaraita rofo siahu ita sa soa’, haihava leita etau etau, siahu ve peise metameta ita la karu ve aru voa leiape.

⁹ A—, karu hea sa arero sukavutea haiarara leiape. Ere fasaita tivi voa paraeōpe karu firu ve sunako karu hea, Kurene aea Alesanderea karikara karu. Ere aea Kikilia aea Asia ita ve soa ve karu, Setefana ita o serea elore elore ape;

¹⁰ a—, ere are ita laua sukavaita lea haiore, Safu Arahoha ita la sukelapai vei usoso leiti kao.

¹¹ Soka lea vei ere karu hea la murufa kurea ere havara apeva paraea mō ari vei, Ela sa are Mose aea Ualare la aria o maealolo la mapaita.

¹² Lōfeare vei ere karikara karu, opasorasora ita, Safu Karoro ore karu ita la lei kitou lei, ere arero irori ita mai paea, kaunisila karu ve kokorukai voa lariōvōpe.

¹³ Ere havara apeva paraeaita karu hea la mei pōvi mō ōpe, Mea vita mea safu Maso Uvi aea safu o ita la hasiavaita o a’ poitapai sore.

¹⁴ Ela areve mea o ta mapai, o meha, Iesu, Nasareta karu, mea Safu Oti la toa foforuka, aea Mose sa ereitaro miarōpe lea leita mai ta toarōrisa lei mai haria leiti roi.

¹⁵ Kaunsila oti voa aipepeiape lea karu foromai arero ofae fofoisa, areve soso, aneru ve soso feare leipe la eavōpe.