Aposetolo 4 - Testamenta Áre 1983 (Toaripi PNG)

Petero auka Ioane ita Kaunsila ve omopa voa

¹ Soka ereuka karikara karu la itoro ape soa, maso tivi karu, Maso Uvi ve kapena karu ita, Sadukea karu ita, ereukaro tai

² kitou ita forerōpe, ipi ereuka karu la satiriōri, Iesu sa opi ata itoia lea vei, opaita karu ta opi ata itoi roi, lea o la itoro ape.

³ Soka ere ereukaro fasi, dibura uvi voa sasaukōpe pepe aite sare voa, ipi mea aeōpe eavia.

⁴ A—, ereukave o la mapōpe karu rauapo lea o la sukaerereōpe; erero mai mutipe ere karu 5,000 feare.

⁵ Soka lea aite sare voa Iuda harofave karu, aea opasora‐sora karu, aea Safu Karoro ore karu ita Ierusalema voa kokorukai vei forerōpe.

⁶ Anasi, maso harofave vita, aeata Kaiafasi, aea Ioane ita Alesana ita, aeata maso harofave vita ve maiape karu foromai ita farehoria.

⁷ Ere ereukaro ereve aru voa vipi, ereukaro lalasi mō leipe, Euka mea etau leafeare leitita? Eve lea siahu leive aeata leive rare voa?

⁸ Lea mea Petero Safu Arahoha Lareva sa soa’ erero mō ōpe, E karikara harofave karu aea Israela ve opasora‐sora e,

⁹ mora huaveahuavea karu la lei lareva leitita lea mai vei, aea arero lei lareva leitita ipi vei elakaro seseōvai oria,

¹⁰ e foromai Israela karu foromai ita mea ore leitia, Iesu Keriso, Nasareta karu, e satauro voa vitei paea, a—, Ualare sa opai voa moravaia lea vita ve rare vei arero lei lareva lei, eve omopa voa soi pōvi me meha.

¹¹ Are eite uvi turaita karu sa haiarara leipe lea fave harotupe fave loita meha.

¹² Lei makuri leita siahu karu haria voa eaei sore, ipi kauri ve ora voa, aeata karu ve aru voa, Ualare rare haria miarai kasirau, ereitaro lei makuri leita rare farakeka sa haria reha.

¹³ Soka ere Petero auka Ioane ita ve ape karōva la mapi aea ofae eovi, aeata ere ore leipe ereuka karoro malasa auke aeata haimerava karu oraka, lea vei ere haihava lei, ereuka Iesu ve maeapavora karu lei roroaiape ere lea la haikaea ore leipe reha.

¹⁴ A—, ere maea la lei lareva leipe lea vita sa ereuka ve maea maria voa soi peiape la ofae eavōpe lea vei, ere o erere arita o ovai kasirau.

¹⁵ Soka ere ereukaro kokorukai oti la kiripi maria voa terai o moipe. Aite ere laua elore elore seseōvi mō ōpe,

¹⁶ Ereita mea karu oraka la leafeare leiti roi? Ipi Ierusalema voa pepeita karu foromai ore loi fari rovaea leita peise ereuka leitita, aea ereita lea la avoa arita ore kao.

¹⁷ A—, lea fari karu ve aru voa ata fafarapai ave, ereita o kere ita ereukaro o erere ari vei, ereuka laua lea rare vei karu farakeka aea la levi sukavai vei.

¹⁸ Soka ere ereukaro ata isa o kere ita o erere ereukaro ōpe, ereuka Iesu ve rare vei o taheka aeata levi moi vei, aeata levi satiriarai vei.

¹⁹ A—, Petero auka Ioane ita tava o erero mō ōpe, Mai haura leavoa e sa seseōvi omoia, Ualare ve soso voa eve o la mapai vei ei, ō Ualare ve o la mapai vei ei?

²⁰ Ipi elaka ofae eovi aeata mapaivota lea etau vei elaka laua sukavai auke leitita, usoso kakaeite kofa.

²¹ Soka ere o kere kofa ita ereukaro o erere ata mei roroka leipe lea mea, ere ereukaro paraea itapōpe. Ere ereukaro hasiavai mai la sukaeai kasirau, ipi karu foromai Ualare la maeatipe lea haihava leipe mai vei.

²² Ipi lea haihava peise voa lei lareva leipe lea vita ve makuri ve sisoro forty la orapōpe eavia.

Ekalesia ve veveu

²³ Soka ereukaro paraea itapōpe soa ereuka elore maeapavora karu tai te, maso harofave karu aea opasora‐sora ita sa ereukaro moiape o la erero moipe reha.

²⁴ Ere lea o la mapi ere farehoria haiiri farakeka ita Ualare la loki lei mō ōpe, Papuvita rovaeka e, kauri ita mearovaeka ita aea makaikara ita aea ereve iri voa roroaita etau etau foromai ita la pisosiape Vita a reha.

²⁵ A ta Safu Arahoha Lareva sa ave tivi vita elave papa Davida ve ape o mōri mōipe, Torutoru karu kitou lei kokorukaipeta ipi levea? aea toruipi‐ipi karu haiiri merava la seseōvaipeta ipi levea?

²⁶ Mearovaeka ve king rauapo maola maea kekese lei soi laepepea, aea harofave karu ta laua la seseōvaipea, Iehova aeata areve Keriso ita la sukavuteai vei.

²⁷ Okofa mea karikara voa Heroda auka Ponito Pilato aea toru haria karu aea Israela karu ita fareho kokorukōpe, Iesu, a sa vevetipe ave lea safu tivi Vita la sukavuteai vei.

²⁸ Kokoruka, ere ave mai aea ave evera seseōvi kekese leita haiiri la lei forerōpe reha.

²⁹ A—, faitora, Papuvita e, ereve o erere la mapi, aea ave tivi karu la lei ivara lei, ela ave o la ape karōva ita itoro ari vei.

³⁰ Ave mai ta sosoropaia, eka la lei lareva lei, aea peise aea haihava leita etau ave safu tivi Vita Iesu ve rare vei leiti vei.

³¹ Ereve loki o roroka leipe lea mea, ere kokoruka pepeiape lea oti lulalula a’, ere foromai Safu Arahoha Lareva sa soa’, Ualare ve o ape karōva ita sukavaiape.

Ekalesia karu ve pavaita mai

³² Soka lea sukaerereaita karu foromai farehoria haiiri farakeka aeata ove farakeka ita pepeiape. Ere voa karu farakeka aea areve maea ve etau vei areve elore etau o moi kasirau; a—, ere ereve etau foromai farehoria maravai vei kokorukaiape.

³³ Aposetolo karu ere ta Papuvita Iesu opi ata itoi lea o la siahu rovaea ita okofa o ita itoro ape, Ualare areve maeaforoe ve meru ta ere foromai voa foreraiape.

³⁴ Ereve aru voa merava karu aeata kasirau. Ipi karu hea mea itua ita varo uvi ita varo, ere lea la itaea lei miōri aea moni tava ere maravi,

³⁵ aposetolo karu ve mora ipi voa miavaiape. Soka karu etau haikaeaiape lea soasoa voa moni faeafaea a’ erero au miaraiape.

³⁶ Soka Kupero voa mi ōpe Levi karu aea, areve rare Iosefa, aposetolo karu sa arero rare aeata Banabasi rare aravōpe (lea rare ve eite Kureaita Vita), are ta mai lōfeare leipe.

³⁷ Are areve mea itua la itaea lei miōri, tava moni ovi aposetolo karu ve mora ipi voa miavōpe.