Aposetolo 3 - Testamenta Áre 1983 (Toaripi PNG)

Mora huaveahuavea karu la lei lareva leipe

¹ Soka sare aea Petero auke Ioane ita Maso Uvi voa Ualare loki leiti vei sare sōsi veveu soa voa terōpe.

² Lōvoa utape rare Opape Maeahoa voa karu farakeka aiseseiape, soa areve miōpe soa voa mora kaiae lei meiape. Sare foromai voa karu sa arero lōvoa taiovi forera vipaiape, Maso Uvi voa oropaiape karu la meru vei avi loki leiti vei.

³ Are Petero auka Ioane ita oropōpe la ofae eavōpe soa, are ereukaro meru vei loki leipe reha.

⁴ Ereuka arero ovo i a’, Petero mō ōpe, Elakaro ofae aura fofoisai.

⁵ Soka are etau ereuka voa ovai haikaea ereukaro fofoisōpe.

⁶ A—, Petero mō ōpe, Ara moni koru rovaea ita seika ita kasirau, a—, ara ovi meipeta lea etau la ara aro miarai roi. Iesu Keriso, Nasareta karu ve rare vei mora keroria.

⁷ Lō mei are areve mai toare la mai paea, arero aruovi lei itoipe. Lea karu ve mora oraka areve mora‐hau oraka ita utohoa kere leipe reha.

⁸ Are forea itei, mora voa pōvi mora keroriape. Are ereuka ita fareho Maso Uvi voa oropi mora kerori forea forea a’ Ualare la maeatiape.

⁹ Soka karu foromai arero mora kerori Ualare la maeatipe la ofae eavōpe.

¹⁰ Eovi arero ore leipe, Opape Maeahoa utape voa meru vei avaiape vita reha, aea ere haihava foromai leipe ipi are voa leipe lea etau vei.

Petero ve itoro o Maso Uvi voa

¹¹ Soka lea mora lareva leipe vita are Petero auka Ioane ita la mairi aruovi, karu foromai haihava ita erero tai oroa kokorukōpe Solomono ve rare aravōpe lea pitaka tōvu voa.

¹² Petero lea la ofae eovi karu sitavu la itoro a’ mō ōpe, Israela karu e, e mea etau vei haihava leipeta ipi levea? E ta elakaro ofae fofoisaipeta ipi levea, elakave haria siahu ō elakave elore lareva sa mea karu la lei mora kerori kerori arita ovitao?

¹³ Abrahama, Isako, Iakobo ita ve Ualare, ereitave papa ve Ualare, are areve tivi vita Iesu la lei sosorusosoru lei mea. Eite e arero ovi gavana karu la miōri, Pilato ve omopa voa arero haiarara leitita, Pilato arero felaukea paraeai haikaeaivota lea mea.

¹⁴ A—, e lea Safu aeata haura kofa Vita la haiarara lei, karu la paeaita vita kofa la ero miarai vei loki leitita.

¹⁵ E makuri voa lariōvaita vita kofa, Ualare sa opai voa moravaia lea vita la lei paeaita; lea etau la ore lei okofa moita karu ela la roroa meha.

¹⁶ Aea Iesu ve rare ve siahu sa mea heavita la lei rofo loi. E ofae eovi ore leipeta mea etau, lea rare la sukaerereaita lea vei forerai, mea vita Iesu la sukaerereaita lea vei maea rofo lōri sukaea lareva lei la me meha, e foromai ve omopa voa.

¹⁷ Soka paumarehari e, ara ore e sa Iesu la leitia lea mai ve ipi e haveva eavia, eve harofave karu ta lōfeare.

¹⁸ Eite Ualare sa lei, peroveta karu foromai ve ape sa evera moiape, areve Keriso hehea leiti lea o lōri okofa lei kekese leitia reha.

¹⁹ Lea vei e haiiri kerori, Ualare tai ata keroria, are eve iri kaiae la sasukai vei, aea lei makuri leita pisahu Papuvita sa ero tai lei lōri forerai vei,

²⁰ aeata Ualare sa e vei evera omoiape Keriso itapai vei, eite Iesu are reha.

²¹ Arero kauri sa maeafukapi, are lōvoa peava pepepe etau foromai ata áre leiti lea soa, usoso Ualare sa lei areve peroveta sarufa karu ve ape sa moiape lea o feare.

²² Usoso Mose evera mō moipe o feare, Papuvita eve Ualare are peroveta karu farakeka aeata e vei moravai roi eve paumarehari ve aru voa, are araro ta moravōpe lōfeare. Are moita o foromai la e mapai roi.

²³ Aea lea peroveta karu la mapi kakeva auke leita lea karu foromai la Ualare ve karu voa fareōvi saroroapai roi.

²⁴ Aea peroveta karu foromai ta reha, soa Samuela aea areve aite voa foreraiape lea karu ita mea sare vei itoro ape.

²⁵ E lea peroveta karu ve meavusu, aea Ualare eve papa ita ōpe otoare voa miape karu, are Abrahama la mō ōpe, lea otoare, Ave meavumōla voa mearovaeka toru haroharo foromai la lei lareva leiti roi.

²⁶ Ualare areve tivi vita Iesu la moravi, ero tai omopa itapi, ero lei lareva lei e eve elore elore mai maealolo la kiripai vei.