Aposetolo 28 - Testamenta Áre 1983 (Toaripi PNG)

Paulo Melita voa

¹ Soka ela lea firu voa makuri lareva ita patei roroka leipe soa, ela lea firu rare Melita la mapōpe.

² Lea oti voa pepeiape karu elaro maeaforoe rovaea leipe. Lai rovaea a’, vevekoko leipe lea vei, ere a sukea, elaro foromai ta maeafukapōpe.

³ Paulo a hiuka hoea a voa sukapōpe lea mea, ikaroa a ve siahu sa toa forea Paulo ve mai la tao sa vifaipe.

⁴ Lea oti ve karu ere lea ikaroa areve mai la vifaipe la ofae eovi, o elore elore mō ōpe, Okofa, karu la paeaita vita meha, are makaikara voa makuri loi, a—, mai la seseōvi tava haura miaraita ualare, arero makuri leiti vei paraeaia kao.

⁵ A—, Paulo lea etau la pailalaia oei, are maealolo leiti kasirau.

⁶ Are maea fefesita varo, putei opaita varo, ere lea la taiape; a—, ere soa savori taiape, aea are maealolo leiti auke leipe la ofae eovi, ere haiiri kerori mō ōpe, Ualare aea are reha.

⁷ Soka lea oti haekao voa, lea firu ve harofave vita ve mea sa eaeiape, areve rare Publio. Are elaro maeafukapi sare oroisoria elaro maeaforoe lei savuōpe.

⁸ Publio ve oa vevekoko eka aea e mare eka ita sa lei eaeiape. Paulo arero tai oropi, Ualare la loki lei, areve mai posa oraka are voa miavi, arero lei lareva leipe.

⁹ Lōfeare vei, lea firu voa pepeiape eka karu foromai kotiape, erero ta lei lareva leiape.

¹⁰ Ere meru etau rauapo elaro miōri miōri, aea ela vavaea aea voa forea soeōpe lea mea, ere maea ve etau rauapo ela vei vavaea voa ōpōpe.

¹¹ Papare oroisoria lōvoa kaleipe, ela Alesanderea vavaea voa forea maea lei soeōpe, lea vavaea ve peise etau Popōta Ualare, maealolo soa vei lea firu voa taiape vavaea aea reha.

¹² Ela Surakuse karikara voa foreri patei, sare oroisoria lōvoa pepeiape.

¹³ Lōvoa kiripi eakoa te Regioma voa foreri aea sare farakeka aite voa, diho itei orakori sare voa Puteoli voa forerōpe.

¹⁴ Lōvoa ela paumarehari la sukaea, ere elaro sasauka, ela sare seven ere ita farehoria popōvōpe. Lōvoa kiripi mora sariva lei kei patei ela Roma voa forerōpe.

¹⁵ Roma voa pepeiape paumarehari elave fari la mapi, ere soa Apii Foruma aea Taverono Oroisoria voa elaro sukaeai vei forerōpe. Soka Paulo erero ofae eavōpe lea mea, ere Ualare la maeati haiiri rofo leipe reha.

Paulo Roma voa

¹⁶ Ela Roma voa forerōpe soa, Roma gavana karu Paulo la o mei are uvi aea hariakao pavōpe, arero kiva leiape maola karu farakeka ita farehoria.

¹⁷ Soka sare oroisoria kaleipe soa, are Iuda opasora karu la arero tai kokorukai vei o itapōpe. Ere koti kokorukōpe lea mea, Paulo erero mō ōpe, Paumarehari e, ara Ierusalema voa pea koti dibura karu lei, Roma karu ve mai voa miōri laipea meha; eite ara ereitave karu la aea ereitave papa mai la kaiae leiti kasirau.

¹⁸ Roma gavana karu araro seseōvi, araro paraeai haikaeōpe ipi araro paeai tava miarai vei ipi kasirau.

¹⁹ Etau farakeka Iuda karu sa o kere moiape, lei vei ara Kaisara sa seseōvai vei haikaea omoipe; eite ara havara ta arave toruipi karu la paraeai vei omoi kasirau.

²⁰ Soka ara ero ofae eavai vei, aeata e ita farehoria laua sukavai ve ipi meha, araro mea auri horou sa fasi la me meha ipi Israela karu sa haikaea taita lea vita vei.

²¹ Lō mei ere tava o mō ōpe, Ela karoro a vei Iudea voa ovaia kasirau, aea paumarehari farakeka aeata ave fari omoia kasirau, aea havara maealolo aro mōvoa ta paraea kasirau.

²² A—, a sukaerereaita lea haiiri vei ela mapai haikaeai, ipi lea mai leitita firu karu vei, ela mea la ore, otioti foromai voa karu sa erero o maealolo ōvo vovea.

²³ Soka ere Paulo ita otoare sare kekese lei, ere karu rauapo lea sare voa arero sukaeai vei are peiape lea uvi voa foreraiape, aea are soa miori soa meafautu soa Ualare ve basileia vei erero okofa o mei mei, aea o Iesu vei Mose ve Safu Buka voa aeata peroveta karu ve buka hariaharia voa ovi erero kureaiape.

²⁴ Karu hea mapi sukaerereaiape; a—, karu hea sukaerereai kao.

²⁵ Soka ere ta o serea elore elore a’ furukeōpe. Paulo mea o farakeka erero moipe soa ve aite voa, Safu Arahoha Lareva peroveta vita Isaia sa eve papa vei moipe mea o okofa reha.

²⁶ Mea karu tai te mō aria: E aite mapi mapi, a—, maea tava leiti vei eite levi ovai roi; e aite ofae eovi eovi, a—, maea tava leiti vei eite levi ovai roi.

²⁷ Ipi mea karu ve hai ivavu kafearu, ereve ōvauta suru kafearu, ere ereve ofae ta kaputei roroka roi; ere ereve ofae sa etau ofae eavai ave, aea ere ereve ōvauta sa mapai ave, aea ere ereve haiiri sa lei ore lei, araro tai kerori ave, aea ara erero lei lareva leiti ave.

²⁸ Lea vei ore leitia, Ualare karu la fareōvi makuri leita o toru hariaharia karu tai itapaita meha, ere mapai roi. [

²⁹ Are lea o mei roroka lei, Iuda karu o serea rovaea elore elore a’ furukeōpe.]

³⁰ Soka Paulo sisoro orakoria kofa voa, are areve tava miarōpe uvi voa peiape, aea arero tai foreraiape karu foromai la are maeafukapaiape.

³¹ Are Ualare ve basileia vei itoro ape, aea o Iesu vei ape karōva ita satiriaraiape, karu ta arero o erere ari kasirau.