Aposetolo 27 - Testamenta Áre 1983 (Toaripi PNG)

Maola karu Paulo la Roma voa lariōvi, sariva lei isaipe

¹ Ela vavaea vao forea Italia voa sariva leiti vei Roma gavana rovaea sa haiiri kekese lōri leipe soa, are Paulo aea dibura karu hea ita la Augusto aravōpe maola karu firu ve kapena vita rare Iulio sa erero kiva leiti vei miarōpe.

² Ela Asia karikara karikara voa sariva leiti vei leipe Adramutio vavaea voa forea, mai pisiri voa isaipe. Aristareko, Tesalonika karikara voa peiape Makedonia karu ta ela ita farehoria maea lei sariva leipe.

³ Aite sare voa ela Sidono karikara voa patei avōpe. Soka Iulio are Paulo la maeaforoe lei, arero paraea, are areve paumarehari tai kei ere arero toaraita mai leiti vei.

⁴ Lōvoa kiripi ela mai pisiri voa isaipe, aea ipi mea sa elave omopa voa itei sasaukōpe lea vei, ela Kupero firu ve ora hehea itai voa heōheōpe.

⁵ Ela Kilikia aeata Pamefulia ve makaikara ve aru voa ufa, ela Mura karikara Lukia ve mea voa foreri heōhea avōpe.

⁶ Lōvoa lea maola kapena vita Italia voa terai vei leipe Alesanderea vavaea la sukaea, are elaro taravi lea vavaea voa ata forerōpe.

⁷ Ela sare taheka rauapo lōvoa sariva haipiri lei, heafo rovaea lei, Kenido ve mai pisiri voa foreri, mea sa elaro omopa voa ererea, ela Kerete firu ve ora hehea voa, Salamone harihari la orapi eakoōpe.

⁸ Ela lōvoa heafo rovaea lei lei miri voa heōhea, tetete oti rare Avavu‐lareva la aravōpe lea oti voa forerōpe; lea oti Lasea karikara ve haekao voa eaeiape.

Karivaripu rovaeka

⁹ Sare rauapo lōvoa kaleipe lea vei vavaea ata sariva leiti vei usoso kao, ipi mea mealolo ve soa, larietau avoha leipe soa ta orapōpe eavia. Soka Paulo erero toaraita o mei mō ōpe,

¹⁰ Papukaru e, arave ore mōfeare, mea sariva kaiae leiti roi, etau rauapo veverapai roi, etauroro haria kasirau, a—, vavaea ita aea ereitave makuri ta reha.

¹¹ A—, maola kapena vita are vavaea pisō vita aea vavaea ve papuvita kofa ve o la mapai vei haikaeōpe, Paulo sa moipe lea o la sukaerereai kao.

¹² Aea ipi lea avavu mea rovaea soa avaita oti lareva kofa auke eavia, ereve karu rauapo haikaeōpe lōvoa kiripi isei, ere Foenika voa foreraita varo, mea maealolo ve papare hea la lōvoa avi tai vei. Lea Foenika are Kerete ve vavaea avaita avavu reha, areve ape ve soso itai diho itai voa muiōpe, ape aea avora ve itai voa.

¹³ Soka mauta levolevo sa itoipe lea mea ere ereve haikaeōpe soa la ovaita varo, ere fave mavi Kerete ve ōsopoe voa heōheōpe.

¹⁴ Heōhea, si kao karivaripu rovaeka, rare Eurokilo mearovaeka itai voa fareōvi,

¹⁵ vavaea la toa, vavaea maea avai ore auke lei, ela arero mea ita paraea soeai vei soeōpe.

¹⁶ Ela firu seika rare Kauda ve mea auke itai voa soea, ela boti seika heafo rovaea ita aruovi, fareōvi, vavaea voa vuapōpe.

¹⁷ Boti ovi patei roroka leipe soa, ere vavaea ve sofa la horou sa elarukea elarukea fasōpe. Ere Suritisa miri posa voa patei teapai tore lei, ere auvia sisopi, vavaea elore maea mea ita soea vo mei vei.

¹⁸ Lea karivaripu sa elaro foromai totoa, mea opōpe soa voa ela vavaea ve etauroro la fei, ma voa toōpe,

¹⁹ aea oroisori sare voa ere vavaea ve etau maeamaea ta maravi ma voa toōpe.

²⁰ Sare rauapo, sare aeata koru ita la ofae eavai auke lei, karivaripu ta siahu ita fareōvi, ela makuri leiti vei haiiri veverapi kaleipe.

²¹ Soka ere soa savori larietau lari auke lei, Paulo ereve aru voa itei pōvi mō ōpe, Papukaru e, e arave o mapi, Kerete kiripai auke oria, mea kaiae aea etau veverapai soa e voa levi forerai lare.

²² A—, ara ero o mō la auai, Rofo lei puavaia, karu ve makuri levi veverapai roi, a—, vavaea sa haria.

²³ Ipi mea faita soa voa, Ualare ve aneru, lea Ualare ve karu ara meha, ara ta arero maso toa vovea, areve aneru araro tai soi pōvi mō arita,

²⁴ Paulo e, tore levi leitia; a Kaisara ve omopa voa foreri pavai roi; aea mapaia, Ualare aro maeaforoe leitita lea vei, are a ita farehoria sariva leipeta mea karu foromai ve makuri ta kiva leiti roi.

²⁵ Soka papukaru e, rofo lei puavaia, ipi ara Ualare la sukaerereai, are sa araro moia lea mai etakofa lōfeare leiti roi.

²⁶ Etau farakeka ereitaro mea sa ovi mea firu aea voa patai roi.

²⁷ Soka faita fourteen leipe soa, ela Adria ve makaikara voa karivaripu sa toa larivati lōri au meiape. Apisi soa feare vavaea tivi karu miri hōiri leipe la haiiri lōri seseōvōpe.

²⁸ Ere ma ve toru la seseōvi twenty fathoms eavōpe; taheka aite voa ata seseōvi fifteen fathoms eavōpe.

²⁹ Vavaea fave voa pavaita varo ere lea vei tore lei, ere fave orakaraka evoe voa toōpe, aea mea ōpai vei haikavora ita taiape.

³⁰ Vavaea karu vavaea la kiripai vei murufakao lei, ere boti seika la ma voa paraea fave hea vavaea ve opa voa toai vei harapi leipe.

³¹ A—, Paulo maola kapena vita aea maola karu ita la mō ōpe, Lea karu sa vavaea voa pavai auke leitita, a—, ero lei makuri levi leiti roi.

³² Lō mei, maola karu boti seika ve saepaita horou la sarapi, aea arero paraea au soeōpe.

³³ Sare patai vei leipe soa voa Paulo ere larietau lari puavai vei, erero loki mō leipe. E sare fourteen larietau lari auke ita haikavora lei, etau taheka ovaia kao.

³⁴ Soka ara ero loki, larietau lalō puavaia, ipi ero lei rofo leita etau reha. Eve harotui farakeka levi veverapai roi.

³⁵ Lea o mei are larietau mai paea, Ualare la maeatipe ere foromai ve omopa voa; aite are larietau fofi lōpe.

³⁶ Lea mea ere ta foromai haiiri rofo lei, ereve larietau mai paea lalō puavōpe.

³⁷ Ela vavaea voa roroaiape karu mai mutipe foromai 276 reha.

³⁸ Larietau la’, ére popi, ere uiti ma voa toa mutapi vavaea la lei pasoa leipe.

³⁹ Soka sare pataipe lea mea, vavaea tivi karu ofae eovi lea firu la ore auke lei, a—, ere oti avavu feare miri‐folo mafu ita la ofae fofoisa, haiiri kekese leipe ere vavaea la lea miri voa lariōvi patei avaita varo lōfeare seseōvai vei.

⁴⁰ Soka ere fave foromai ve horou la saerea kiripi, pisō oraka la fasaita horou ta felaukea, omopa savoro ve auvia aruovi patei mea sa avipi, ere miri voa ukavai vei soeōpe.

⁴¹ A—, ere ma ve laroa orakoria ukakaraita oti voa foreri, ere vavaea la lei sukavutea miri posa voa pataipe; vavaea ve omopa teapi kere lei, a—, evoe aroaro rofo sa toa toharai vei leipe.

⁴² Soka maola karu ve haiiri dibura karu foromai la paeai vei, ere ma voa arivea kei miri voa patei oroai ave.

⁴³ A—, maola kapena vita Paulo la lei makuri leiti vei haikaeōpe, are lea vei erero o erere ōpe, ere dibura karu la levi paeai vei. Soka are o mōri moipe, Ma pepeapaita ore karu ma voa arivea kei miri voa everori patai vei;

⁴⁴ aea karu hohoi susu aeata vavaea ve tola maeamaea la ovi forea iavi miri voa lōri kavai vei. Soka lōfeare vei ela foromai lareva ita miri voa lōri kei pataipe.