Aposetolo 26 - Testamenta Áre 1983 (Toaripi PNG)

Paulo ve ovoro

¹ Soka Ageripa Paulo la mō ōpe, Soa aro miaraita meha. Ave elore etau kofa vei omoia. Lea mea Paulo areve mai sosoropi, havara la sukavuteaita o la mei mō ōpe:

² King Ageripa e, Iuda karu sa paraeaita lea havara la ave omopa voa sukavuteai vei, ara lea vei hailareva lei la me meha;

³ ipi a Iuda karu ve mai, aea ereve o serea elore elore foromai ita la ore fae; lea vei ara rapi aro loki, a arave o la haisukafori ita eapo mapaia.

⁴ Ara leiape mai arave siare soa itiiti heavita soa voa ara Ierusalema voa arave toruipi ve aru voa peiape lea mai ta Iuda karu foromai ore.

⁵ Ipi ere evera ore leipe, ere omoi haikaeai oria, ara Farisea, ereitave maso voa safu la haihahari kofa leita firu karu ve mai lōfeare leiape.

⁶ Ualare sa ereitave papa la ōpe otoare la haikaea taipeta lea vei, araro mōvoa seseōvai vei soi laipea meha.

⁷ Ereitave toruipi‐ipi firu twelve Ualare la sare ita faita ita maso tivi lei lei, lea otoare la ovai vei tai vovo roroa vovea. King e, lea au tai vovo meita haiiri vei, Iuda karu sa havara araro lea vei paraeai vovea.

⁸ Ualare sa opōpe karu la lei itoita lea la sukaerereai vei e Iuda karu foromai haiiri heafo leipeta ipi levea?

⁹ Ara evera soa hai mōri kaeaiape mai haura mōfeare, ara hasiavaita mai rauapo la lei, Iesu Nasareta karu ve rare la sukavuteai vei.

¹⁰ Ara mai lōfeare Ierusalema voa leiape. Ara siahu maso harofave karu voa ovi, Ualare ve karu rauapo la dibura uvi voa sasaukaiape, aea erero paeaiape lea soa voa ara ta lea mai voa haiiri usoso o ape.

¹¹ Soa rauapo ara sa sunako uvi foromai voa erero lei teavi sa’ erero lei haisora lei, ere Iesu la sukaerereaita la avoa ari vei, lōri kureaiape. Ara erero kitou foromai leiape lea vei, ara erero ivara eokere ita larivataiape soa toruipi hariaharia karikara karikara voa.

Saulo haiiri kerori Keriso ve karu leipe fari

¹² Lōfeare mai leiti vei ara maso harofave karu ve rare ita siahu ita Damasko karikara voa kavōpe.

¹³ King e, sare koko soa voa otiharo voa, ara kauri voa forerōpe ovava sosorusosoru rovaea, sare ve sosorusosoru la sapataipe ovava, araro aea ara ita farehoria kavaiape karu ita la haea eakoa toepōpe la ofae eavōpe.

¹⁴ Ela farehoria mea voa putoi puavōpe, aea ara mō isōpe i la Heberu uri moipe la mapōpe, Saulo e, Saulo e, a araro haisora leiti vei aitetaipeta ipi levea? Ave mora la tola opa marekeke sa sukaita, a—, a hehea leiti roi.

¹⁵ Soka ara mō ōpe, Papuvita e, a ita leisa? Aea Papuvita mō ōpe, Ara Iesu; a araro haisora leiti vei aitetaipea.

¹⁶ A—, itei, ave mora sa soi pavaia. Ara aro tai foreraita ipi meha, aro lei a arave tivi vita leiti vei; a ofae eavaita lea etau, aeata ara aite voa aro muia a ofae aite eavai vei leita lea etau ita la o pisiri omoi vei.

¹⁷ Ara Israela karu voa aeata ara aro itapai vei leipeta lea toruipi hariaharia karu voa aro kiva lei, ere aro levi hasiavai roi.

¹⁸ A sa ereve ofae la lei feferopea, ere murumuru kiripi ovava voa kerori vei; aea Satani ve siahu ta kiripi Ualare tai kerori vei, aea ipi ere araro sukaerereaita lea vei ereve iri kaiae la felaukea mutapi, ere ereve hasu la ovai roi Ualare sa haikaea ovaita lea karu ita farehoria.

¹⁹ Lea vei, King Ageripa e, ara ofae eavōpe lea kauri etau la kaeava ari kasirau.

²⁰ A—, ara omopa Damasko karikara voa, aea aite Ierusalema voa, aea Iudea mea foromai voa, aea toru hariaharia karu ita la itoro a’, ere ereve kaiae vei haiiri kerori Ualare tai forerai vei, aeata ere haiiri kerorita eite la muiai vei ereve leita mai voa.

²¹ Ipi ara sa lōfeare vei itoro ape lea vei, Iuda karu araro Maso Uvi voa mai sa sukafori paea, aea araro paea opai vei eli vovea.

²² A—, itiiti mea sare voa Ualare sa araro toari pea vovea. Soka ara mōvoa soi laipea, karu foromai, seika ita rovaea ita la okofa la omoi vei. Ara etau haria la moi sore, peroveta karu aeata Mose sa moiape aite forerai vei leita etau vei, lea haria.

²³ Etau meha: Keriso hehea omopa lei, aeata opai voa oarehōva ata itoita vita leiti roi, aea are ovava ve o Israela karu aeata toru hariaharia karu ita la lei ovava leiti vei itoro ari roi.

²⁴ Paulo havara la sukavuteaita lōfeare o la mei, Fesetusi i rovaea ita mō isa moipe, Paulo e, a maeakakare kofa! Ave elore maea satiriarōpe ore rovaea sa aro lei maeakakare loi.

²⁵ Paulo mō ōpe, Fesetusi lareva e, ara maeakakare kao! Ara okofa la haisukafori moi vovea.

²⁶ Ipi king mea etau foromai ore, ara laua arero ta ape karōva ita sukavai. Ipi ara haiiri roroka lei hai mō kaeaipea, mea etau foromai, farakeka are voa milafukai kasirau ipi mea etau murufa oti voa leiti kasirau.

²⁷ King Ageripa e, a peroveta karu ve o la sukaerereai ei? A sukaerereai vo mea vovea, lea ara ore.

²⁸ Lō mei Ageripa Paulo la mō ōpe, Kureaita soa harua voa a araro Keriso ve firu karu leiti vei haikaeaipea.

²⁹ Paulo mō ōpe, Ara Ualare la loki, soa harua varo, soa savori varo, a haria kao, a—, iso sare araro mapaipeta karu foromai ta, ara ita usoso feare leiti vei, a—, mea fasaita etau auke ita oria.

³⁰ Soka king itoipe, gavana ita, Berenike ita, ere ita aipepeiape karu ta reha.

³¹ Ere lōvoa kiripi laua elore elore sukōvi mō ōpe, Mea vita paeaita tava varo, dibura tava varo ovai vei lōfeare mai leiti kasirau.

³² Aea Ageripa are Fesetusi la mō ōpe, Mea vita Kaisara sa seseōvai vei loki leiti auke oria, arero paraeai lare.