Aposetolo 25 - Testamenta Áre 1983 (Toaripi PNG)

Paulo Fesetusi ve omopa voa

¹ Soka Fesetusi areve gavana tivi leiti oti voa foreri pōvi, sare oroisoria leipe aite voa are Kaisarea kiripi Ierusalema voa pataipe.

² Patei maso harofave karu aea Iuda karu ve harofave karu ita maeahahauhahau lei o Paulo vei arero harapi moipe, are erero maeaforoe leiti vei ere loki mō leipe:

³ are Paulo la Ierusalema voa itapi patai vei; a—, eite ere otiharo voa maola avi arero paeai vei.

⁴ Soka Fesetusi tava o mō ōpe, Paulo Kaisarea voa fasi pea vovea, aea soa si kao ara ta lōvoa ata isai roi.

⁵ Eve harofave karu ara ita farehoria fauka, kaiae lea vita voa eaeita, a—, ere havara arero lōvoa paraeai vei.

⁶ Soka Fesetusi ere ita sare eight varo ten varo lōvoa ata pea roroka lei, are Kaisarea voa isaipe. Aite sare voa are kōto oti voa avi, Paulo la lariōvi koti vei o moipe.

⁷ Are forerōpe lea mea, Ierusalema voa pepea fafukōpe lea karu arero eakoa toepi, popōvi havara rauapo pasou kofa arero paraeaiape, a—, lea la lei okofa leiti vei ere ore leiti kao.

⁸ Soka Paulo lea havara rauapo la sukavutea mō ōpe, Ara Iuda karu ve safu mai aeata Maso Uvi ita la hasiavai sore, aeata ara Kaisara la kaiae leiti kasirau.

⁹ A—, Fesetusi ipi Iuda karu la lei ere erero lareva o ari vei, tava o Paulo la mō ōpe, A Ierusalema voa patei lōvoa mea paraeaita havara la arave omopa voa seseōvai vei haikaeaipea ei?

¹⁰ A—, Paulo mō ōpe, Ara Kaisara ve siahu voa seseōvaita posa ve omopa voa soi laipea meha, Kaisara sa araro seseōvaita haura reha. Ara Iuda karu la kaiae leiti kasirau, a ta lea la ore fae.

¹¹ Ara kaiae leiti oria, aea ara leipe etau ve tava opai lea haura oria, a—, ara opai vei haiarara kao. A—, ere araro paraeaita havara eite auke oria, a—, araro ereve mai voa miarai vei usoso leita karu kasirau. Araro itapi Kaisara sa seseōvai vei ara lalasi la leipea.

¹² Lea mea Fesetusi seseōvi toaraita karu ita laua elore elore sukōvi roroka lei, are tava o mō ōpe, A Kaisara sa seseōvai vei lalasi leipeta, lea vei aro Kaisara tai itapai roi.

Paulo Ageripa auka Berenike ita ve omopa voa

¹³ Soka sare hea kaleipe, King Ageripa auka Berenike ita, Fesetusi la sukaea eapo o ari vei, Kaisarea voa koti forerōpe.

¹⁴ Foreri ereuka sare hea lōvoa pepeiape lea vei Fesetusi o Paulo vei king la mō ōpe, Feliki sa dibura voa kiripōpe karu farakeka aea mōvoa ia.

¹⁵ Ara Ierusalema voa pataia soa, maso harofave karu aea Iuda opasora‐sora karu ita sa o are vei araro moita, araro loki lei ara kaiae tava arero miarai vei.

¹⁶ A—, ara tava o erero mō arita, Ela Roma karu ve mai lōfeare kasirau, kaiae tava karu la auraka miaraita. A—, havara paraea kaiae ovaita karu, aea arero havara paraeaita lea karu ita fareho itai itai pōvi, are lea havara la sukavuteaita soa ovai ao — elave mai haura lōfeare.

¹⁷ Soka ere araro tai foreraia soa, ara si leiti kao, a—, lea aite sare voa ara kōto soa ovi, lea karu la lariōvi koti vei moia reha.

¹⁸ Etau farakeka lea havara paraeaita karu itei, arave elore haiiri sa seseōvaita kaiae ere lōfeare havara paraeai kasirau.

¹⁹ A—, ere are ita o serea elore elore arita ipi ereve elore maso toaita mai vei, ipi aea ta karu farakeka rare Iesu, are opōpe, a—, Paulo ve o meha, Are makuri lei laipea.

²⁰ Soka ara lea etau la seseōvai vei horahora a’, ara Paulo la lalasi leitita, are Ierusalema voa kei lea etau lōvoa seseōvai vei haikaeaita varo.

²¹ A—, Paulo araro loki leitita are arave kiva voa pōvi, are Augusto tai isei lōvoa seseōvai vei. Soka ara arero kiva leiti o moita tetete ara arero Kaisara tai itapai roi.

²² Lō mei Ageripa are Fesetusi la mō ōpe, Ara ta lea karu ve o mapai vei hai la kaeaipea. Fesetusi mō ōpe, Soka a areve o vevere mapai roi.

²³ Soka lea aite sare voa Ageripa auka Berenike ita king la taivotaita mai ita, maola harofave karu ita, karikara ve harofave karu ita farehoria kokorukai rovaea uvi voa oropi, Fesetusi o mei, ere Paulo la lariōvi kotipe.

²⁴ Koti Fesetusi mō ōpe, King Ageripa e, aea mōvoa pepeipeta karu foromai e; e mea vita la ofae eavaia, Ierusalema voa aeata mōvoa pepeita Iuda karu foromai o serea ita araro loki lei, i rovaea araro are vei mō isa vovea, are ata makuri leiti vei lareva kao.

²⁵ A—, ara arero paeaita kaiae la are voa eavai kasirau, aea ipi are Augusto tai itapi seseōvai vei loki leitia lea vei, ara arero itapai vei haiiri kekese lei roroka.

²⁶ Etau farakeka ara papuvita tai itapai vei ukai o kofa la sukaea auke leitita, lea vei, ara arero eve omopa voa lariōvaita meha, aea ave soso voa ta reha, King Ageripa e; ipi arero seseōvi roroka leita soa, ara o la ukai vei lōri ovai roi.

²⁷ Ipi arave seseōvaipeta haiiri mōfeare, dibura karu la havara eite kofa lei ukai auke ita itapaita lea mai haura kasirau.