Aposetolo 24 - Testamenta Áre 1983 (Toaripi PNG)

Paulo Feliki ve omopa voa

¹ Soka sare five kaleipe lea mea, maso harofave vita Ananiasi, aea opasora‐sora hea ita, aeata Teretulo, ereve ipaisa lei itoro oita vita ita lōvoa fauka foreri, ere havara Paulo vei paraea gavana la omoipe.

² Teretulo la isōpe lea mea, are Paulo la paraeaita havara o mō ōpe: Feliki, karu lareva kofa e, ipi ave haiore vei ela soa savori tairu ita pepea vovea; aea ipi ave kiva vei mea toruipi‐ipi karu sa pepeita mai ve lareva la topiaraipea.

³ Soa foromai voa aeata otioti foromai voa ela hailareva rovaea ita mea etau ova vovea.

⁴ A—, ela o si levi moi roi, ela aro lei haisora leiti ave, a elave o taheka la eapo au mapaia.

⁵ O ve ipi meha: ela mea vita la ofae eovi ore loi, are karu maealolo kofa, mearovaeka foromai voa pepeita Iuda karu la lavukakaea vovea, aea are Nasarene firu karu la taravaita vita.

⁶ Are ta Maso Uvi la lei merava leiti vei haikaeaita, a—, ela lea vei arero sukafori paeaita. [Ela usoso elave safu mai feare arero seseōvai vei haikaeaita,

⁷ a—, maola harofave vita Lusia, arero elave mai voa irori rovaea lei fareōvi,

⁸ aea aro tai itapi ela arero havara mōvoa paraeai o ta moita reha.] A haria arero seseōvaia, ela sa arero havara paraeaia lea etau foromai okofa, a lea la ofae eovi ore leiti roi.

⁹ Iuda karu ere areve o la toari mō ōpe, Lea o foromai okofa reha.

¹⁰ Gavana haro sa au vuteōpe Paulo la laua sukavai vei. Soka Paulo havara la sukavuteaita o la mei mō ōpe, Ara ore a sisoro rauapo mea toruipi karu voa seseōvi tava miaraita tivi leiape aeata lei vovea. Soka ara paraeaita havara la sukavuteaita o, hailareva ita lea vei la moi meha.

¹¹ Sare twelve haria ara mōvoa pea kiripi Ierusalema voa pataita maso toai vei. A karu la lalasi leitita, a—, a lea la ore leiti roi.

¹² Maso Uvi voa, karu ita o serea a’, aea sunako uvi voa aea karikara voa karu la lavukakaeai, ere araro lōri leitia la ofae eavai kasirau.

¹³ Ere ave omopa voa faitora araro paraeaipeta mea havara vei eite la okofa ita lei ore leiti kasirau.

¹⁴ Ara mea la aro faitora la vavavai, ere sa kaiae o aipeta mai ara elave papa ve Ualare la maso tivi lei mea vovea, ipi ara ta Safu Buka voa aeata peroveta buka voa uka siseita lea o foromai la sukaererea vovea.

¹⁵ Ara etau Ualare voa haikaea tai vovea, usoso mea karu sa haikaea taipeta lea haiiri feare, etau meha, haura karu, haura auke karu ita opi ata itoi roi.

¹⁶ Lea vei, Ualare ve soso voa aeata karu ve omopa voa, ara kaiae ore auke haiiri la ovai vei, ara arave maea la kiva rofo ita lei vovea.

¹⁷ Sisoro rauapo maria voa meme kotia soa ara meru moni, maso ve meru ita la arave toruipi‐ipi vei Ierusalema voa ovi pataita.

¹⁸ Lea soa ere araro lei ovava leita mai la lei roroka lei Maso Uvi voa ofae eavaita, karu sitavu ita fareho leiti kao, lavukakaeai ta kasirau; a—, Asia voa foreraia Iuda karu hea ta lōvoa,

¹⁹ ere araro havara paraeai haikaeaita, a—, ere araro havara ave soso voa paraeai vei foreraita lea ta haura.

²⁰ A—, ara kaunsila ve kokorukai ve aru voa foreraia soa, ara leitia kaiae larelekōru varo mea karu ere haria sa lea la omoi vei.

²¹ A—, ara ereve aru voa pōvi ara sa mōri isa moia lea i farakeka vei varo, Ipi opi ata itoita lea o vei, araro iso sare eve aru voa la seseōvaipea meha.

²² Soka Feliki are Papuvita ve Mai la ore kofa feare lei, lea vei are ereve laua la sasauka, mō ōpe, Maola harofave vita Lusia kotita lea soa ara eve laua la eli eovi roroka leiti roi.

²³ Are maola kapena karu la o mei Paulo la kiva lei, a—, arero kere kofa levi sasaukaia, aea paumarehari arero toarai vei ta o erere levi ari vei.

²⁴ Sare hea aite voa Feliki areve ua Drusila ita kotipe; lea ua Iuda ua. Are Paulo vei o itapi, aea Paulo sa koti moipe o Iesu Keriso la sukaerereaita mai vei ta mapōpe.

²⁵ A—, Paulo mai haura vei, aea haisukafori lei meita mai vei, aeata aite forerai seseōvi tava miaraita soa vei laua sukavaiape lea mea, Feliki tore lei, tava o mō ōpe, Faitora teraia; usoso leita soa voa ara aro araro tai koti vei ata isai roi.

²⁶ A—, eite areve haiiri Paulo sa moni arero miarai vei. Lea vei are arero tai koti vei arero haelarehaelare isa are ita laua sukavaiape.

²⁷ Soka sisoro orakoria kaleipe lea mea, Porokio Fesetusi are Feliki ve ipaisa lei gavana leipe. Feliki are Paulo la dibura oti voa kiripōpe ipi Iuda karu la lei ere arero lareva o ari vei haikaeōpe eavia.