Aposetolo 23 - Testamenta Áre 1983 (Toaripi PNG)

¹ Paulo lea kokorukaita karu la fofoisa mō ōpe, Paumarehari e, ara haiiri haura foromai la ovi Ualare ve soso voa makuri lei vovo meiape itiiti iso sare voa.

² Lō mei, maso harofave vita Ananiasi are Paulo ve maea maria voa soi pepeiape karu la omoipe, ere areve ape la toai vei.

³ Soka Paulo arero mō ōpe, Ualare ta aro toai roi, oro sa toa sea leita fave lōva e; a ta safu ovi araro seseōvai vei aisesea, a—, a safu o sa o erere arita mai la hasiōvi, a araro toai vei la moipea meha ei?

⁴ Haekao soi pepeiape karu arero mō ōpe, A ta Ualare ve maso harofave vita la o haiiri aipea ei?

⁵ Paulo mō ōpe, Paumarehari e, are maso harofave vita, ara lea la ore kofa leitia kao; ipi o mō uka la eaea, Ave karu ve kiva harofave vita la a o maealolo levi aria.

⁶ Soka lea karu itai Sadukea karu, itai aea ta Farisea karu, Paulo lea la ofae eovi ore lei, are lea kokorukai voa i mō isa moipe, Paumarehari e, ara Farisea karu aeata Farisea karu ve atute; ipi karu opi ata itoita lea o vei aeata lea la taipeta lea vei, araro mōvoa la seseōvaipea meha.

⁷ Are sa lea o la moipe lea vei, Farisea karu Sadukea karu ita o serea itai itai elore elore irori ape, aea lea kokorukai tofei itai itai leipe.

⁸ Ipi Sadukea karu o mō aritore, Karu opi ata itoita ore kasirau; aea aneru ta kasirau, aea arahoha ta kasirau; a—, Farisea karu mōfeare la ore lei haikaea moi vovea lea etau oroisoria ia.

⁹ Soka heohea rovaea pataipe reha; aea Farisea ve firu voa topiaraiape Safu Karoro ore karu itotea, o kere serea ita mei mei mō ape, Ela mea vita ve kaiae eavaia kakeite kofa. Arahoha arero sa moipe varo, ō aneru sa moipe varo, kaiae leavoa?

¹⁰ O serea ve heohea rovaea lei, karu Paulo la mai paea aruovi arero torerapai ave, maola harofave vita lea vei tore lei, are o maola karu firu la mei ere fauka ereve aru voa arero irori ita fareōvi, arero maola karu ve kora iri voa lariōvi patai vei.

¹¹ Lea faita soa voa Papuvita foreri Paulo tai pea mō ōpe, Rofo leitia! A sa ara voa ore leita fari mea Ierusalema voa vavavi roroka lei, lōfeare a Roma voa ta lōri vavavai roi.

Iuda karu Paulo la paea opai otiharo elipe

¹² Miori soa Iuda karu hea murufakao kokoruka sukōvi, Ualare ve rare ita otoare a’ o mōri ōpe, ere larietau ma ita la levi lari roi tetete ere Paulo la paeai ao.

¹³ Lea otoare ōpe karu firu mai mutipe soa forty ve arori voa.

¹⁴ Ere maso harofave karu opasora‐sora karu ita tai te mō ōpe, Ela farehoria Ualare ve rare ita otoare elore elore mō auai, Ela larietau taheka aeata levi lari roi tetete ela Paulo la paeai ao.

¹⁵ Lea vei eo aea kaunsila karu ita maola harofave vita la harapai o itapi moia, ere Paulo la ero tai lariōvi fauka vei, ipi eve haiiri sa arero ata seseōvai vei. Ela arero paeai vei otiharo voa everori kekese lei tai vei, are mōvoa levi forerai roi.

¹⁶ A—, Paulo ve arivu lea maola avai o la mapi, are maola karu ve kora iri voa oropi, Paulo la omoipe reha.

¹⁷ Soka Paulo maola kapena aea la isa mō ōpe, Mea harokou la maola harofave vita tai lariōvi teraia, are fari ia arero omoi vei.

¹⁸ Soka are arero maola harofave vita tai lariōvi te mō ōpe, Lea dibura karu Paulo araro isa loki lei mō auai, Ara mea harokou aro tai lariōvai vei ipi are fari ia aro omoi vei.

¹⁹ Soka maola harofave vita arero mairi lariōvi murufa oti voa ereuka hariakao oropi pōvi, arero lalasi mō leipe, A araro omoi vei mapaita fari lekōru?

²⁰ Lei are mō ōpe, Iuda karu haiiri farakeka lei, Paulo la ereve kokorukai voa vevere lariōvi fauka vei, ere areve laua la ata lareva ita seseōvai haikaeaipeta eavia.

²¹ Etau farakeka, a ereve kureaita o la levi mapaia; ipi karu forty ve arori voa maola avai mai are vei laua kekese lei roroka, ere paeai o a’ elore elore fasi otoare kere mō auai, ere larietau aea ma ita la levi lari roi, tetete ere arero paeai ao. Ere maea kekese lei, ave o vei la taipea.

²² Maola harofave vita lea harokou la mea o mei itapōpe, A sa araro moipeta mea o karu farakeka aeata levi moia. Lō mei are arero paraea faukōpe.

Paulo la Gavana Feliki tai itapi isaipe

²³ Soka maola harofave vita areve maola kapena karu oraka la isa mō ōpe, Maola karu 200 la kekese leitia, ere soa Kaisarea voa mora isai vei, aeata hōsi maola karu 70, aeata hora ita maola karu 200, ere mea faita ora nine voa maea lei isai vei.

²⁴ Hōsi hea ta ovi Paulo sa forea avi, areve makuri lareva ita arero gavana karu Feliki tai lariōvi isai vei.

²⁵ Are karoro ta mōri ukōpe:

²⁶ Arao, Klaudio Lusia mea karoro ukai Gavana Rovaea Feliki vei. A eapo reha.

²⁷ Mea vita Iuda karu sa sukafori paea arero paea opai vei leitia lea mea, ara maola karu firu ita erero tai foreri arero fareovaita, are Roma basileia karu ara lea la mapaia eavia.

²⁸ Ere arero paraeaia lea havara ve ipi la ore leiti vei, ara arero ereve kaunsila ve kokorukai voa lariōvaita.

²⁹ Ara eovi ore leitita, ere arero paraeaia lea havara ve ipi ereve elore Safu ve o serea oita etau aea vei; lea havara maealolo kasirau, paea opai tava, aeata fasaita tava arero lea vei miarai vei.

³⁰ Ara fari mapai karu hea arero i paeai o otoare a’ kekese lei roroka; ara lea vei arero aro tai utohoa itapai, aea havara paraeaita karu ta omoi, ere isei paraeai haikaeaipeta havara la ave soso voa paraeai vei.

³¹ Soka usoso erero omoipe lea o feare, maola karu firu Paulo la toari lariōvi, faita voa isei Antipatri karikara voa forerōpe.

³² Aite sare voa ere seseravi ereve maola oti Ierusalema voa ata kerori papatavōpe, a—, hōsi karu sa are ita maea ata lei isaipe.

³³ Ere Kaisarea voa forera, lea karoro gavana rovaea la miōri, Paulo ta arero tai lariōvi are sa kiva leiti vei miarōpe.

³⁴ Gavana karu karoro muti roroka lei, are Paulo la lalasi mō leipe, A lela karu? Are Kilikia ve soa ve karu lea la ore lei,

³⁵ are mō ōpe, Aro havara paraeaita karu foromai sa foreraita soa, ara ave laua la lōri mapi seseōvai roi. Are o ta mei ere Heroda sa turōpe lea uvi rovaea voa arero kiva lei pavai vei.