Aposetolo 22 - Testamenta Áre 1983 (Toaripi PNG)

¹ Paumarehari e, oa‐ita e, ara ero faitora moipeta o la mapaia, ara araro paraeaita lea havara apeva la sukavuteai vei.

² Ere erero Heberu uri isa moipe o la mapōpe lea mea, ere o foromai tororoōpe. Soka are mō ōpe,

³ Ara Iuda karu, Tareso, Kilikia voa mi ōpe, a—, ara mea karikara voa asi rovaea leipe, aea ara papa ve safu kere foromai la Gamaliele ve mora ipi voa satiriaraiape lea vei, ara Ualare ve tivi voa haihahari lei, lei vovo meiape, e foromai ta faitora soa lōfeare roroa.

⁴ Ara mea otiharo voa roroaita karu la haisora leiti vei aitetaiape tetete erero ta paeaiape, erero vita ita uamori ita ta fasi dibura uvi sasaukaiape.

⁵ Maso harofave karu aeata opasora‐sora karu ve kokorukaita karu foromai ita sa ore lei, arave o la okofa ere sa moita ore. Ara karoro Damasko voa pepeita Iuda paumarehari vei ovi, lea karikara voa kavōpe, ipi lōvoa pepeiape karu ta fasi erero Ierusalema voa lariōvi kaiae tava erero miarai vei.

Saulo haiiri kerori Keriso ve karu leipe fari

⁶ Soka ara sariva lei Damasko ve haekao voa forerai vei leipe lea mea, sare koko soa feare kauri voa ovava rovaeka araro utohoa haea eakoa toepōpe.

⁷ Ara mea voa putei mō isōpe i la au mapōpe, Saulo e, Saulo e, a araro haisora leiti vei aitetaipeta ipi levea?

⁸ Ara tava o mō ōpe, Papuvita e, a ita leisa? Are mō ōpe, Ara Iesu Nasareta karu, a araro haisora la leipea.

⁹ Soka arave maeapavora karu lea ovava ta ofae eavōpe, a—, araro laua sukavaiape lea vita ve o la mapai kasirau.

¹⁰ Soka ara mō ōpe, Papuvita e, ara lekōru la leiti roi? Papuvita araro mō ōpe, Itei, Damasko voa kavaia; Ualare sa haikaea a sa leiti vei leipeta lea etau foromai la aro lōvoa omoi roi.

¹¹ Ara ofae eavai maea kakapiso leipe, ipi lea ovava sosorusosoru eavia, a—, arave maeapavora karu sa araro mai sa lariōvi, Damasko voa kei forerōpe.

¹² Soka karu farakeka rare Ananiasi, Ualare la taivotei aea safu o la haihahari ita kiva leita vita, lōvoa peiape; lea karikara ve Iuda karu foromai voa are fari lareva vita.

¹³ Are araro tai foreri, arave maea maria voa soi pōvi mō ōpe, Saulo e, marehari e, ofae ata eavaia. Lea ora kofa voa arave ofae ata ovava lei, aea ara arero ofae fofoisōpe reha.

¹⁴ Aea are mō ōpe, Elaka ve papa ve Ualare aro haikaeai ovai, ipi a areve haikaeaita mai la ore lei, aea areve Haura kofa Vita la ofae eovi, aea o areve ape poe voa mapai vei.

¹⁵ Ipi a ofae eovi aea mapaia lea etau la a are vei pisiri voa muiai roi, karu foromai la lei ore leiti vei.

¹⁶ Soka a lekōru la taipea? Itei, bapatiso ovaia, aea areve rare la isa, ave iri kaiae la ma sa uka sasukaia.

¹⁷ Soka ara Ierusalema voa ata keroripe, aea ara Maso Uvi voa Ualare la loki lei peiape lea mea, ara ofae ovoako auka paea,

¹⁸ arero o mōri moipe la ofae eavōpe, Utohoari lei Ierusalema lavelave kiripi soeaia, ipi a sa ara vei lei moita o la ere levi sukaerereai roi.

¹⁹ A—, ara mō ōpe, Ere ore kofa, ara sunako uvi foromai voa aro sukaererea vo roroaiape karu la dibura uvi voa fasi aeata teavi sape.

²⁰ Aea karu sa aro ore lei okofa moita vita Setefana ve ovo la sisapōpe lea mea, ara ta haekao soi pea lea la haiiri usoso lei, arero paeōpe lea karu ve maea puta la kiva lei peiape.

²¹ A—, Papuvita araro mō ōpe, Teraia; ipi ara aro ára voa toruipi hariaharia karu tai itapai roi.

²² Soa lea o voa ere arero mapaiape, a—, are lea sisa o la mei ere i mō isa moipe, Lea vita mearovaeka voa fareovaia! Are makuri leita lareva kao.

²³ Ere kitou ita ape rovaea isa, ereve arori puta la fari toatoa a’, mea tetere lei toa furiape lea mea,

²⁴ maola harofave vita areve karu la o mei ere Paulo la maola kora iri voa lariōvi arero teavi sa’ sa’ o kere ita lalasi lei, karu sa are vei hohororo ape ve ipi la ore leiti vei.

²⁵ A—, ere arero teavi sari vei fasi roroka leipe lea mea, Paulo haekao peiape maola kapena vita la mō ōpe, Roma basileia ve siahu voa meita karu la kaiae o ari auke lei teavi sarita, lea haura ei?

²⁶ Lea o la mapi kapena vita are maola harofave vita tai te, arero mō ōpe, A lekōru la leiti vei leipea? Ipi mea vita are Roma basileia karu aea.

²⁷ Lō mei maola harofave vita Paulo tai te arero lalasi mōri leipe, Araro okofa moia, a Roma basileia karu ei? Paulo mō ōpe, A.

²⁸ Lea maola harofave vita mō ōpe, Ara moni tava rovaea Roma basileia ve siahu la itaea lei ovai vei miarōpe. A—, Paulo mō ōpe, Arave oalou ta Roma basileia karu, aea ara Roma basileia ve lea siahu ita voa mi ōpe.

²⁹ Soka arero teavi sari vei leipe karu arero utohoa kiripi terōpe; lea maola harofave vita ta tore leipe, ipi Paulo are Roma basileia karu, a—, are arero auri horou sa fasōpe eavia.

Paulo kaunsila ve kokorukai ve omopa voa

³⁰ Soka lea aite sare voa, Iuda karu sa paraeōpe havara ve ipi kofa la ore leiti vei haikaeōpe lea vei, maola harofave vita Paulo la fasaita horou la felaukea, aea maso harofave karu aea kaunsila karu foromai ita la kokorukai o mei, kokoruka Paulo la lariōvi fauka, ereve omopa voa forerōpe.