Aposetolo 21 - Testamenta Áre 1983 (Toaripi PNG)

Paulo Ierusalema voa pataipe

¹ Ela erero haieae ita kiripōpe lea mea, ela vavaea voa forea, auvia suka Koso voa haurakao soeōpe. Aite sare ela Rodo voa soea, lōvoa kiripi Patara voa pataipe.

² Lōvoa ela Fenisia voa ufai vei leipe vavaea la sukaea, ela are voa ata forea terōpe.

³ Ela Kupero firu la ofae sa eovi, aite ela mai ava itai voa foapi soea vo arero kiripi ufi Suria voa kei, Turo voa patei heoheōpe, ipi lea vavaea areve etauroro faipe karikara reha.

⁴ Ela pōvi Iesu la sukaerereaita karu hea lōvoa eli sukaea, ela sare seven lōvoa pepeiape. Lea sukaerereaita karu ere Arahoha sa Paulo la are Ierusalema voa levi patai vei o moipe.

⁵ Soka ela lōvoa avi taiape soa sa kaleipe lea mea, ela maea lei sariva ata leipe reha. Lea karu foromai, ereve uamori ita atutemori ita, elaro karikara maria voa toilalōpe, miri voa ela foromai sukakoka avi Ualare la loki lei,

⁶ aea eapo o elore elore mei roroka lei, ela vavaea voa au foreōpe, a—, ere elore elore oti voa ata keroripe.

⁷ Ela sariva ata lei Turo kiripi Tolemaisi voa patei, paumarehari la eapo o mei, ere ita farehoria sare farakeka pavōpe.

⁸ Lea aite sare ela maea lei Kaisarea voa foreri, Filipi, Ovoro Lareva itoro arita vita ve uvi voa oropōpe; aposetolo karu la toaraita lea karu seven voa karu aea are reha. Ela are ita farehoria pavōpe.

⁹ Soka Filipi marisa orakaraka ia; mea marisa ere vita kasirau; aea ere ta Ualare ve ovoro la itoro ape.

¹⁰ Ela sare hea lōvoa pavōpe soa, peroveta karu rare Agabo, Iudea voa kiripi faukōpe.

¹¹ Are elaro tai forera, Paulo ve sofa kava la felaukea ovi, areve elore mora oraka ita mai oraka ita la fasi mō ōpe, Safu Arahoha Lareva o mō auai, Mea kava ve papuvita kofa la Iuda karu sa Ierusalema voa mōfeare fasi, arero toruipi haria karu ve mai voa miarai roi.

¹² Ela lea o la mapi, ela lōvoa pepeiape karu ita Paulo la loki o ita kureōpe are Ierusalema voa levi patai vei.

¹³ A—, are tava o mō ōpe, E fi a’ arave haiiri la lei tofai vei leipeta ipi levea? Ipi ara haiiri kekese loi, Papuvita Iesu ve rare vei fasai vei lea haria kao, a—, Ierusalema voa opaita ta reha.

¹⁴ Soka are lea kureaita o la haikaeai auke leipe lea vei, ela o aea la topiarai auke lei mō ōpe, Soka Papuvita sa haikaeaita mai lōri leitia.

¹⁵ Soka lea sare hea ve aite voa, ela elave etauroro la fasi, Ierusalema voa patei maea leipe.

¹⁶ Kaisarea voa pepea Iesu la sukereraita karu hea ela ita farehoria patei, elaro Menasona, Kupero karu ve uvi voa lariōvōpe ela lōvoa pavai vei; are everori Iesu la sukaererea vovo meiape vita aea reha.

¹⁷ Soka ela Ierusalema voa forerōpe lea mea, paumarehari elaro hailareva ita maeafukapōpe.

¹⁸ Lea aite sare voa Paulo ela ita Iakobo tai te oropōpe, ekalesia opasora‐sora karu foromai ta lōvoa kokoruka aipepeiape.

¹⁹ Paulo foforoe o erero mei roroka lei, are Ualare sa toruipi hariaharia karu ve aru voa areve tivi voa lei foreraiape etau foromai ve fari la erero omoipe.

²⁰ Ere lea la mapi, hailareva lei, Ualare la maeatipe. Aite ere Paulo la mō ōpe, Marehari e, a ofae eovi ore leitia, Papuvita la sukaererea vo roroaita karu thousand rauapo Iuda karu voa laepepea, aea ere foromai Mose ve safu o la kiva leiti vei haihahari lei vovea.

²¹ Ere a vei fari mōfeare mapi ore loi, a toruipi hariaharia ve aru voa pepeita lea Iuda karu la Mose ve safu o la kiripai vei satiriaraitore, aea ere areve atutemori la peritome levi leiti vei, aea Iuda karu ve papa mai ta kiripai vei.

²² A kotia lea fari la ere foromai ore lei roroka. Soka ereita leafeare leiti roi?

²³ Mai meha, ela sa o aro mōri moita mea o feare leitia. Elave oti voa karu orakaraka Ualare la otoare a’ maea la safu lei laepepea.

²⁴ A mea karu la lariōvi ere ita fareho Maso Uvi voa te, areve tava la miaraia, ere ereve haro‐tui lōfeare sa lei ovai vei. Lōfeare leitita soa, karu foromai lea la ofae eovi ore leiti roi, ere a vei mapaipeta lea fari eite kao, a—, a ta Mose ve safu mai la kiva lei vovo mea vovea.

²⁵ A—, ipi Iesu la sukerereaita toruipi hariaharia karu vei, ela elave seseōvi kekese leita o ita karoro la everori itapi, o mōri ukōpe, Ere apeva ualare ve maso ove etau voa omopa posaseaita larietau, aea ovo ita etau, aea faihohōroaita etau ita la haute lei aea herei mai ta sukavuteai vei.

²⁶ Soka lea aite sare voa Paulo lea karu orakaraka la lariōvi, areve maea la ere ita farehoria lei ovava lei, Maso Uvi iri voa te maea la lei ovava lei roroka leiti sare, aea maso ve meru ere farafarapo vei omopa posaseai sare ita la omoi vei.

Ierusalema karu Paulo la mai paea sukaforōpe

²⁷ Soka lea sare seven kaleiti vei leipe lea mea, Asia voa pepeiape Iuda karu arero Maso Uvi voa ofae eovi, karu sitavu la kurea, ereve mai sa arero utohoa paea sukafori,

²⁸ i mō isa moipe, Israela karu e, toaraia! Mea vita oti hariaharia voa karu foromai la satiriara vovea ere Israela karu, aea Mose ve safu aea mea Maso Uvi ita la sukavuteai vei. Aeata meha, are Helene karu hea ta Maso Uvi voa lariōvi koti, mea safu oti la lei merava loi.

²⁹ Lea o ve ipi omopa soa voa ere arero Terofimo, Efeso karu ita fareho karikara voa ofae eovi, aea ere hai mōri seseōvōpe are arero Maso Uvi iri voa ta lariōvōpe varo.

³⁰ Karikara foromai lavukakaeōpe reha; karu foromai oroavi koti, Paulo la mai sa lōri ovi arero Maso Uvi voa paitaravi pisiri voa foreri, ere Maso Uvi ve utape foromai la utohoa sasaukōpe.

³¹ Ere arero paeai vei leipe lea soa, Ierusalema foromai lavukakaeōpe fari la Roma maola karu firu ve harofave vita sa mapōpe.

³² Mapi are utohoa maola karu hea ereve kapena karu ita la lariōvi, karu sitavu tai oroōpe. Soka ere lea harofave vita aea maola karu ita la ofae eavōpe lea mea, ere Paulo la teavi sa’ sa’ kiripōpe.

³³ Lea maola harofave vita haekao lei Paulo la mai paea, arero auri horou oraka sa fasai vei moipe. Aite are lalasi mō leipe, Are lela karu? aeata, Are lekōru la leipe?

³⁴ Karu sitavu voa, hea o haria isa moiape, hea ta o haria. Ipi hohororo rovaea eavia, are okofa la mapaita ore auke lei, are areve maola karu la o mei, ere Paulo la maola uvi iri voa lariōvi patai vei.

³⁵ Ere arero lariōvi, pasisa voa forerōpe soa lea maola karu ere Paulo la fareōvi au taiovi pataipe, ipi karu sitavu kitou foromai lei irori irori ape eavia.

³⁶ Karu sitavu aitetei i mō isa moiape, Arero au paeaia!

Paulo Ierusalema karu la itoro ōpe

³⁷ Soka maola karu Paulo la maola uvi iri voa taiovai vei leipe soa, are maola harofave vita la lalasi mō leipe, Ara rapi aro o eapo omoita leafeare? Maola harofave vita mō ōpe, A Helene uri ore ei?

³⁸ Lea Egupto karu a meha ei? mea sare ve omopa voa gavana karu la sukavuteai vei karu la kurea, karu la murufa paeaita karu 4,000 la furuka merava voa lariōvi kavaita ei?

³⁹ A—, Paulo mō ōpe, Ara Iuda karu, arave karikara Tareso, Kilikia ve soa voa reha, are fari seika karikara kao. Ara aro loki soa a sa araro miaraia, ara mea karu sitavu la o omoi vei.

⁴⁰ Are mō ōpe, Lareva. Soka Paulo pasisa voa soi pōvi, areve mai karu la lō muia lō muia lei, ere safuta lareva lei, are Heberu uri erero isa mō ōpe.