Aposetolo 2 - Testamenta Áre 1983 (Toaripi PNG)

Arahoha Lareva sa forerōpe mai

¹ Pentekoste ve sare forerōpe soa ere foromai oti farakeka voa kokoruka aipepeiape.

² Uruuru hōvakao kauri voa fauka, usoso karivaripu ve uruuru feare, aea ere aipepeiape lea uvi la sukafasi soōpe.

³ Aite ere a‐uri fefeare etau rauapo la eavōpe, farafarapo elore elore harofave voa popōvōpe reha.

⁴ Ere foromai Arahoha Lareva sa soa’ ere uri hariaharia sukavaiape, Arahoha sa erero lei sukavai vei miarōpe lōfeare.

⁵ Soka mea karikara Ierusalema voa Iuda karu rauapo, Ualare la tore lei taivotaita karu, mearovaeka ve toru haroharo foromai voa foreri pepeiape.

⁶ Ere lea uruuru la mapōpe soa, karu sitavu kokoruka haihava foromai leipe reha, ipi ere karu farafarapo erero ereve elore elore uri hariaharia la sukavaiape la mapōpe eavia.

⁷ Ere horahora lei haihava ita lei, mō ōpe, Mea laua sukavaipeta karu ere foromai Galilaia karu kao ei?

⁸ Soka ereita erero ereitave elore elore uri kofa ita sukōvi mapai vei loita lea’ loi?

⁹ Ereita Paretia karu aea Media karu, aea Elama karu, aea Mesopotamia voa pepeita karu, aea Iudea karu, aea Kapadokia karu, aea Ponito karu, aea Asia karu,

¹⁰ aea Furugia karu, aea Pamefulia karu, aea Egupto karu, aea Kurene haekao lea Libia karu. Karu hea Roma voa koti roroaipeta sariva karu.

¹¹ Ereita hea Iuda karu kofa, hea Iuda safu voa roroaita karu, hea Kerete karu, hea Arabia karu. A—, ereita mea karu Ualare sa leita haihava etau vei ereitave elore elore uri hariaharia sukavaipeta la la mapaipea.

¹² Ere foromai haihava ita horahora ita lei elore elore mō ape, Mea ve eite lekōru?

¹³ A—, karu hea area sa vutea a’ mō ape, Ere uaina áre la la’ la’ maeakakare ari leipea.

¹⁴ A—, Petero eleven karu ita fareho itei, i moravi erero itoro a’ mō ōpe, Iudea maeapavora e, aeata Ierusalema voa pepeipeta karu foromai e, e mea ore leitia aea arave o mapai kofa leitia.

¹⁵ Mea karu uaina la la’ maeakakare leitia kao usoso e seseōvaipeta lea haiiri feare, ipi mea miori ve larietau soa areapo.

¹⁶ A—, peroveta vita Ioele sa o mō moipe etau meha:

¹⁷ Ualare o mō auai, Mearovaeka ve sisa sare voa ara arave Arahoha la torutoru karu foromai voa sisōvi, eve irave ita marisa ita peroveta o la a’, eve harokoulese haiako auka paea, aea eve opasora‐sora ivahia itotai roi.

¹⁸ Okofa, lea sare voa ara arave sarufa karu, heavita ita uamori ita voa, arave Arahoha la sisōvi ere peroveta o la moi roi.

¹⁹ Aea ara haihava etau la kauri arori voa aea mearovaeka ipi voa peise etau ta muiai roi; ovo aea sarita a aeata itei pataita aikaera.

²⁰ Sare ta toarōrisa murumuru lei, papare ta ovo fei mohari leiti roi. Iehova ve sare, rovaeka aea haihava ita forerai vei leitita lea soa voa.

²¹ A—, Iehova ve rare la isaita lea karu foromai la lei makuri leiti roi.

²² Israela karu e, mea o la mapaia: Iesu Nasareta karu, are Ualare sa taivotei meiape vita, ipi Ualare are vei tivi rovaea aea haihava leita peise ita la eve aru voa leiape eavia; e lea etau ta ore fae.

²³ Ualare sa usoso areve evera haikaeai aea areve ore leipe feare, mea vita la eve siahu voa miōri, e arero lei safu haveva leita karu ve mai sa satauro voa vitei paeaia reha.

²⁴ A—, Ualare arero opai ve hehea voa arero felaukea paraea lei itoia reha, ipi opai sa arero ovi aieraita ore kao.

²⁵ Ipi Davida are vei o mō ōpe: Ara Papuvita arave omopa voa peita la ofae eavaiape, ipi are arave mai toare itai voa pea vovea, araro lei lulalula levi ari vei.

²⁶ Lea vei arave hai ta lareva lei, arave uti ta hailareva o mei mei, arave maeasarōva ta haikavora auke ita peava roi.

²⁷ Ipi a arave ove la opai karu ve oti voa kiripai auke lei, aea a ave Safu Vita la levi lei puruta leiti vei.

²⁸ A makuri otiharo la araro satiriōri lei ore lei, ara ave soso la eavaita lea mea ara hailareva foromai loita reha.

²⁹ Arave paumarehari e, ara papa Davida vei o pisiri la moi meha, Are opi, arero viopi, aea areve tapu ereita voa itiiti mea sare voa eaea vovea.

³⁰ Soka are peroveta vita, aeata are ta ore leipe, Ualare sa arero otoare kere ōpe areve meavo farakeka aea la areve ipaisa lei terona voa vipai roi.

³¹ Lea vei are evera ore leipe etau, Keriso opi ata itoi lea o la mei, Keriso ta opai karu ve oti voa levi pōvi, aea areve maea ta puruta levi leiti o ta moipe.

³² Mea Iesu la Ualare sa opai voa lei itoia meha; lea etau vei ore lei vavavaita karu ela foromai meha.

³³ Soka Ualare sa areve mai toare voa arero moravi vipi aea Oa sa miarai vei evera ōpe otoare ve Arahoha Lareva ta ovi, e ofae eovi mapaipeta mea etau are sa ela voa itapi la me meha.

³⁴ Ipi Davida kauri voa patai kao, a—, eite are elore ape sa mō ōpe: Papuvita are arave Papuvita la mō moipe: Arave mai toare voa avaia,

³⁵ tetetete ara aro lei, a ave ote karu la ave mora posa sa patai ao.

³⁶ Lea vei Israela toruipi foromai ore kofa leitia, mea Iesu, e satauro voa vitei paeaia lea vita la Ualare sa lei are Papuvita aea Keriso loita meha.

Ekalesia ve oarehōva soa

³⁷ Soka ere lea o la mapōpe soa ere haiisei, ere Petero aea lea aposetolo karu haria hea ita la mō ōpe, Paumarehari e, ela leati roi?

³⁸ Petero erero tava o mō ōpe, Haiiri keroria, ero foromai la Iesu Keriso ve rare voa bapatiso leitia, eve iri kaeai la felaukea mutapaita peise vei, aea Ualare sa Arahoha Lareva ero miarai roi.

³⁹ Ipi otoare e vei moipe, aea eve atutemori vei, aeata ára voa pepeita karu foromai vei, Papuvita ereitave Ualare sa arero tai koti vei isaita lea karu vei.

⁴⁰ Lōfeare o haria rauapo ita are erero vovoro mei mei kurea mō ōpe, Mea taotao ve kaiae kiripi, makuri ovaia.

⁴¹ Soka areve o la sukaerereaiape lea karu la bapatiso leipe; lea sare voa karu 3,000 feare ere voa topiarōpe reha.

⁴² Ere haihahari ita aposetolo karu sa erero satiriaraita o la mapi, farehori pōvi, larietau farehori fofi la’ aea Ualare loki lei pepeiape.

⁴³ Soka haihava etau siahu ve peise ita rauapo aposetolo karu sa leiape, karu foromai lea vei tore ita pepeiape.

⁴⁴ Sukaerereaita karu foromai kokoruka farehori popōvi, ereve maea ve etau foromai ere kokoruka farehoria maravaiape.

⁴⁵ Ere ereve hasu aea maea ve etau ita la itaea lei miōri, lea ve tava faea karu farafarapo la miaraiape usoso ereve haikeaita mai feare.

⁴⁶ Sare foromai voa ere farehori lei Maso Uvi voa kokoruka, ereve larietau hailareva haimafu ita ereve uvi voa farehoria lalape.

⁴⁷ Ere Ualare la maeati karu foromai ta erero haiiri lareva ita lei roroaiape. Sare foromai voa Papuvita sa lei makuri leiape karu la ereve firu karu voa au topiaraiape.