Aposetolo 19 - Testamenta Áre 1983 (Toaripi PNG)

Paulo Efeso voa

¹ Soka Apolosi Korinito voa peiape lea soa, Paulo kiriape otioti ve aru soa voa sariva lei isei isei, Efeso voa foreri satiriaraita karu hea la sukaea,

² erero lalasi mō leipe, E sukaerereōpe lea soa e Safu Arahoha Lareva la ovōpe ei? Ere tava o mō ōpe, Kao, Safu Arahoha Lareva peita varo, ela lea la ore leiti sore.

³ Paulo mō ōpe, E leivo bapatiso leipe? Ere mō ōpe, Ioane ve bapatiso voa.

⁴ Soka Paulo mō ōpe, Ioane kaiae kiripi haiiri kerorita bapatiso karu la leiape, aea are Israela karu ta o mei ere areve aite voa kotipeta vita la sukaerereai vei, eite Iesu reha.

⁵ Ere lea o la mapōpe soa, erero Papuvita Iesu ve rare voa bapatiso leipe reha.

⁶ Paulo areve mai posa oraka erero miavōpe lea mea, Safu Arahoha Lareva erero tai foreri, ere uri hahauhahau rauapo ita sukōvi, peroveta o ta ape.

⁷ Ere foromai usoso karu twelve feare.

⁸ Soka papare oroisoria voa Paulo sunako uvi voa oropi oropi, ape karōva ita itoro a’ a’, Ualare ve basileia vei o elore elore i ta voa i a’ karu la kureaiape.

⁹ Ipi karu hea sa ōvafae kere lei, kaeava a’, makuri ve otiharo vei kokorukaita karu ve omopa voa o maealolo ōpe. Lea vei Paulo erero kiripi, Iesu la sukaerereaita karu la are ita fareōvi, aea saresare foromai Turano ve satiriaraita uvi voa o elore elore mei sukavaiape.

¹⁰ Lea mai sisoro orakoria voa lōri leiape; lōfeare vei Asia voa pepeiape karu foromai, Iuda karu aeata Helene karu ita Papuvita ve o la mapaiape.

Sikeva ve atute seven

¹¹ Ualare haihava leita etau soa haria rauapo la Paulo ve mai sa leiape.

¹² Karu Paulo ve muko aeata areve maea voa mopaita puta hea la maravi, maea eka karu tai ovi te eka lōri lei paraea, aea harisu maealolo ta lei erero kiripi soeaiape.

¹³ Soka lō tera lō iti leiape Iuda kaeavuru karu hea ta Papuvita Iesu ve rare ita lōfeare leiti vei seseōvaiape. Ere harisu maealolo sa toaiape karu voa o mōri moiape, Ara Paulo sa itoro oita lea Iesu ve rare vei aro haisa la moipea meha.

¹⁴ Iuda karu seven, ere foromai maso harofave vita Sikeva ve atute, ere ta mai lōfeare leipe.

¹⁵ A—, lea harisu maealolo tava o erero mō ōpe, Ara Iesu ore, aea ara Paulo ve fari ta ore, a—, eo, e lavea?

¹⁶ Harisu maealolo sa peita lea vita erero tai forea, ivara eokere ita arero totoa sapataipe. Ere foromai maea paseare lei, maea ovo furi a’ lea uvi kiripi oroōpe.

¹⁷ Mea fari Efeso voa pepeiape karu foromai, Iuda karu aeata Helene karu ita voa fafarapi, ere foromai tore lei, Papuvita Iesu ve rare la marase rovaea ape.

¹⁸ Iesu la sukaerereaita karu rauapo ta koti, ere leiape mai la pisiri vavavaiape.

¹⁹ Aea kaeavuru tivi leiape lea karu rauapo ereve buka la maravi kokoruka, karu foromai ve soso voa a sa vifei sa’ kaleipe, lea buka ve tava seseōvi mutipe soa silva moni koru 50,000 reha.

²⁰ Lōfeare voa Papuvita ve o fafarapi aea rofo au topiaraiape.

Efeso karikara voa leipe heohea

²¹ Lea leiape etau ve aite voa, Paulo haiiri kekese leipe Makedonia aea Akaia ita ve aru voa sariva lei Ierusalema voa terai vei. Are mō ōpe, Lōvoa te roroka leiti ao, aite ara te Roma karikara ta ofae eavai vei.

²² Soka are arero toaraita karu oraka Timoteo auka Erasto ita Makedonia voa itapi kavōpe, a—, are kofa Asia voa soa taheka serei peiape.

²³ Soka lea soa voa Efeso karikara lavukakaeōpe ipi Papuvita ve Mai vei.

²⁴ Silva etau pisosita vita aea, rare Demetrio, are ualare rare Diana ve maso uvi ve ove etau kaekae la pisosiape, aea lea tivi voa areve tivi karu firu moni tava rovaea maravaiape.

²⁵ Soka are erero aea tivi soso usoso leita karu haria ita la kokoruka mō ōpe, Karu e, e ore ereitave pisoso mea tivi voa forera vovea.

²⁶ E ofae eovi aeata la mapaipea, mea vita Paulo, Efeso voa haria kao, a—, soa haekao Asia foromai voa, karu rauapo ve haiiri la lei kerori, o mō ō vovea, Karu ve mai sa pisosita ualare ere ualare kofa kao.

²⁷ Soka haikavora etau meha, ereitave mea tivi merava leitita varo, aea etau aeata meha, ualare rovaeka Diana ve maso uvi ta eite auke lei, aea Asia karu foromai aea mearovaeka ve karu ita sa maso toaita lea ualare areve sosorusosoru soa ta fareōvi kaleiti roi.

²⁸ Ere lea o la mapōpe lea mea, ere kitou rovaea lei, i rovaea mō isa moiape, Efeso ve Diana are rovaeka.

²⁹ Soka karikara foromai lavukakaea, ere haiiri farakeka lei, ere Paulo ita fareho sariva leiape Makedonia karu oraka, Gaio auka Aristareko ita la mai sa sukafori, karikara havōu uvi rovaea iri voa aruovi soea oropōpe.

³⁰ Paulo karikara karu tai oropai vei leipe soa, satiriaraita karu haiarara lei arero sukelapi sasaukōpe.

³¹ Aea Asia kiva harofave karu hea ta reha, arero moraitai leipe lea karu, are havōu uvi voa levi orapai vei lea o la arero tai itapōpe.

³² Soka karu hea o haria la isa moiape, karu hea ta o haria, ipi lea kokoruka leiape karu haiiri sa kapekapeōpe eavia; karu rauapo ere sa koti roroaita ipi haveva leipe.

³³ Iuda karu ere Alesana la omopa voa sukavuteōpe, lea vei karu rauapo hai mō seseōvōpe, lea kokorukai ve ipi Alesana voa. Soka Alesana areve mai lō toa lō toa lei, kaiae la sukavuteaita o la itoro ari haikaeōpe.

³⁴ A—, are Iuda karu ere lea la ore leipe lea vei heohea rovaea ere foromai voa pataipe reha. Ere ora soa orakoria varo i farakeka mō isaiape, Efeso ve Diana are rovaeka!

³⁵ Aite voa karikara ve karoro ukaita vita are karu sitavu ve ape karakara la lei safuta mō ōpe, Efeso karu e, karu foromai ore Efeso eite Diana rovaeka ve maso uvi, aeata kauri voa oaipe safu fave koru ita la kiva leita karikara.

³⁶ Lea etau la horahora auke leitita lea vei, e haisukafori pavaita lōfeare haura, aea maeakakare sa leita lea etau levi leitia.

³⁷ Ipi e mōvoa lariōvi kotita mea karu oraka, ereuka ereitave ualare ve maso uvi ve etau torea leiti kao, aeata o maeamariti are vei ta omoi kao.

³⁸ Soka Demetrio aea are ita fareho tivi leita karu havara karu la paraeai haikaeait’ oria, kōto laua seseōvaita sare sare ia, aeata kōto seseōvaita karu ta lōvoa. Karu ereve elore elore havara paraeaita ore.

³⁹ A—, e etau haria la seseōvai haikaeaipeta, a—, lea la karikara karu metameta safu sa moita lea kokorukaita soa voa seseōvai roi.

⁴⁰ Ipi haikavora meha, Roma gavana havara mea sare ve eite auke karakara vei ereitaro paraeaita varo. Ereita mea lavukakaea kokoruka leipeta mea mai ve eite vei o haura moita ore kao.

⁴¹ Are lea o mei roroka lei, karu la maria voa itapi fafaraipe.