Aposetolo 18 - Testamenta Áre 1983 (Toaripi PNG)

Paulo Korinito voa

¹ Lea ve aite voa Paulo Atena kiripi, Korinito voa isaipe.

² Lōvoa are Iuda karu farakeka aea la sukaeōpe, areve rare Akuila, are Ponito voa mi ōpe karu; are areve ua Perisika ita Italia kiripi kotipe, ipi Roma Kaisara Klaudio Iuda karu foromai Roma karikara kiripai vei omoipe eavia.

³ Paulo ereukaro tai te, ereuka ita fareho peiape, ipi ere farehoria tivi usoso karu eavia. Ereve moni tivi falai uvi pisosita tivi reha.

⁴ Are Sabati sare foromai voa sunako uvi voa te Iuda karu, Helene karu ita la kureai vei itoro ape.

⁵ Soka Silasi auka Timoteo ita Makedonia kiripi Korinito voa forerōpe soa, Paulo ve tivi farakeka meha, haihahari ita itoro a’ a’, Iuda karu la o pisiri ovava kofa ita mō satiriaraiape, Iesu are Keriso reha.

⁶ A—, ere lea o la sukavutea o kaeai arero ōpe lea mea, are areve maea puta la pailalaea erero mō ōpe. Eve ovo eve elore harofave voa lei eaeava; mea arave kaiae kao. Soa faitora ara ero kiripi toruipi haria karu tai te ata itoro ari roi.

⁷ Soka are lōvoa kiripi, Ualare la maso toaita vita rare Titio Iusto ve uvi voa te pavōpe; areve uvi sunako uvi ita seseari peiape.

⁸ Sunako ve harofave vita rare Kerispo, areve uvi karu foromai ita Papuvita la sukaerereōpe. Korinito karu sitavu ta Paulo ve itoro o la mapi sukaererea, aea erere bapatiso ta leiape.

⁹ Paulo faita aea voa auka paea, Papuvita arero mō ōpe, Tore levi leitia, a—, laua sukavai vei haisora levi leitia;

¹⁰ ipi ara a ita fareho lei lei vovo meava roi, aea karu aro hasiavai vei levi leiti roi; ipi mea karikara voa arave karu rauapo eavia.

¹¹ Lea vei Paulo sisoro farakeka aeata papare six lōvoa peiape, ereve aru voa Ualare ve o la satiriaraiape.

¹² Soka Galio are Akaia voa Roma gavana tivi leiti vei koti forerōpe lea mea, Iuda karu haiiri farakeka lei, Paulo la ivara mai ita arero kōto oti voa lariōvi,

¹³ mō ōpe, Mea vita karu la kurea vovea ere mai haria ita Ualare la maso toai vei, lea mai safu o sa moita mai feare kao.

¹⁴ Paulo areve ape fapai vei leipe lea mea, Galio are Iuda karu la utohoa mō ōpe, Iuda karu e, mea laua ve ipi kaiae vei varo, ō karu sa leita maeahahauhahau vei varo, ara e voa metakao mapaita lea mai sa haura.

¹⁵ A—, lea o serea elore elore, rare rauapo, aeata eve haria safu vei, lea etau e haria ofae eavaia; ara lea etau ve seseōvaita vita leiti vei haikaeaia kao.

¹⁶ Lō mei are erero kōto oti voa larivati maria voa forerōpe.

¹⁷ Soka ere foromai sunako harofave vita, Sosetene la sukafori paea, arero kōto uvi ve omopa voa teavi sape, A—, Galio lea leipe mai la haiiri seseōvai kasirau.

Paulo Antioka voa ata keroripe

¹⁸ Lea ve aite voa Paulo sare rauapo lōvoa peiape, aite are paumarehari la foforoe au avai‐o o mei, are Perisika auka Akuila ita ita fareho vavaea voa forea Suria voa terai vei sariva leipe. Kenekerea voa, vavaea voa forea vei leipe lea soa voa are areve maea la lei safu lei, areve haro‐tui ta ovōpe, ipi are otoare ia.

¹⁹ Ere Efeso karikara voa foreri pōvi, lea karu oraka lōvoa seraipe. Soka Paulo Efeso ve sunako aea voa oropi, Iuda karu ita o mei seseōvaiape.

²⁰ Ere arero soa taheka lōvoa pei vei loki leipe, a—, are haiiri usoso leiti kao.

²¹ Are erero foforoe au avai‐o o ita mei mō ōpe, Ualare sa haikaeai oria, ara ero tai ata koti roi. Soka are vavaea voa ata forea Efeso kiripi, maea lei terōpe reha.

²² Are Kaisarea voa fauka pōvi, Ierusalema voa pataipe lea mea, are ekalesia karu sukaea erero foforoe o ita mei, Antioka voa lōri kavōpe.

Paulo ve oroisoria sariva

²³ Are lōvoa soa taheka savori peiape. Aite are maea lei, Galatia ve soa aeata Furugia ve soa ve aru voa sariva lei kei kei, Iesu la sukaerereaita karu foromai la rofo leiti vei kureaiape.

²⁴ Soka Iuda karu farakeka aea rare Apolosi, Efeso voa forerōpe. Are Alesanderea karikara voa mi ōpe karu, aeata haiore rovaea; are Safu Karoro voa malasa kofa.

²⁵ Arero karu sa Papuvita ve otiharo la arero satiriōri, aea are haiiri haihahari rovaea lei, o Iesu ve mai vei okofa ita haisukafori laua sukōvi satiriaraiape. Etau farakeka are Ioane ve bapatiso la haria ore leipe.

²⁶ Soka are o sunako voa itoro ape karōva ita ape. A—, Perisika auka Akuila ita arero mapi, ereuka arero ereukave uvi voa lariōvi, te Ualare ve otiharo haura kofa arero satiriarōpe reha.

²⁷ Soka Apolosi Akaia voa ufai vei haikaeōpe lea mea, Efeso paumarehari arero toarai vei karoro ukōpe, Akaia voa Iesu la sukaerereaita karu o mei ere arero maeafukapai vei. Are lōvoa forerōpe lea mea, Ualare ve maeaforoe ve meru sa lei sukaerereaita lea karu la are lareva ita toaraiape.

²⁸ Ipi are Iuda karu ita karikara pisiri voa o elore elore i a’ arero sapatei, Iesu are Keriso lea o ve okofa la Safu Karoro sa ovi erero muiōpe.