Apokalupo 9 - Testamenta Áre 1983 (Toaripi PNG)

Five u la fōfōōpe soa

¹ Soka five aneru areve u la fōfōōpe lea mea, ara koru farakeka aea la eavōpe, are kauri voa oei mearovaeka voa iavi, soa auke toru‐uta karera ve ki arero miarōpe reha.

² Miōri are lea toru‐uta karera la fapi, aea aikaera lea toru‐uta voa patei forerōpe usoso kemo rovaeka ve aikaera feare; aea sare ve ovava aea kauri arori ita la lea aikaera sa sukafasi murumuru leipe.

³ Lei, puka sitavu sitavu lea aikaera voa foreri mearovaeka voa roroaiape; aea siahu usoso a‐misa sa mearovaeka voa leitita siahu la erero miarōpe.

⁴ A—, o ta erero mōri moipe, ere mearovaeka ve kavuru, aea rorore faita etau, aea tola aea la levi hasiavai vei; a—, ereve harihari‐fave voa Ualare ve sasaraita peise la ovai auke leita lea karu la haria hasiavaia.

⁵ Lea puka la moipe o aea ta mōfeare, ere karu la levi paeai vei, a—, papare five voa erero lei hehea leiti vei, lea hehea usoso a‐misa sa sarita hehea feare, are sa karu la sarita lea mea.

⁶ Lea sare sare voa karu ere opai vei elita soa voa, arero levi sukaeai roi; ere opai vei haikakare lei, a—, eite opai ere voa kiripi soeai roi.

⁷ Lea puka ve maea ere usoso maola vei kekese leita hōsi ve maea fefeare leipe; aea ereve harofave voa etau gold kekeva fefeare topi, aea ereve soso karu ve soso fefeare.

⁸ Ere tui usoso uamori ve tui fefeare ia, aea ereve tao usoso liona ve tao fefeare ta reha.

⁹ Ere tete‐tete ia usoso haiposa la aieraita auri fefeare, aea ereve avako ve fufufufu usoso marehaukai vei oroavaita kariota ve tutururu fefeare.

¹⁰ Ereve uke usoso a‐misa ve uke, tao tao ita fefeare ia; aea karu la lei papare five voa hehea leiti vei lea siahu ereve uke voa.

¹¹ Ere harofave vita ia, are lea toru‐uta karera ve aneru reha; areve rare Heberu uri voa Abadono, a—, Helene uri voa areve rare Apoluono.

¹² Omopa kofa hasiavaita soa kaleitita reha: a—, ofae eavaia, hasiavaita soa oraka ta utohoa forerai vei la leipea.

Six u la fōfōōpe soa

¹³ Soka six aneru areve u la fōfōōpe lea mea, ara Ualare ve omopa voa peiape gold alitara ve lalave orakaraka voa forerōpe i‐ape la mapōpe.

¹⁴ Lea i‐ape are u ita six aneru la mō ōpe, Euferate Mai rovaea voa fasi pepeita aneru orakaraka la felaukea paparaeaia.

¹⁵ Soka lea aneru orakaraka la felaukea paparaeōpe lea ora, aea lea sare, aea lea papare, aea lea sisoro vei kekese lei pepeiape ere mearovaeka ve karu oroiso oroiso firufiru voa farakeka farakeka la paea paea ari vei.

¹⁶ Ereve hōsi ita maola karu ve rauapo ta ara mapōpe: ere 200,000,000 reha.

¹⁷ Soka ara arave haiako auka voa lea hōsi la mōfefeare eavōpe: erero foforea avaiape lea karu haiposa la aieraita auri ia, maea‐mohari usoso sasoita a fefeare, aea maea‐uru usoso iakinta fave fefeare, aea maea‐koavi usoso solifara fefeare. Lea hōsi ve harofave ere liona ve harofave fefeare, aea a aea aikaera aea solifara ereve ape voa foreraiape.

¹⁸ Lea hasiavaita etau oroisoria, sosoita a aea aikaera aea solifara, ereve ape voa foreraiape lea etau sa mearovaeka ve karu oroiso oroiso firufiru voa farakeka farakeka la poesapōpe.

¹⁹ Ipi lea hōsi ve siahu ereve ape voa aeata ereve uke voa ta reha. Eite ereve uke ere usoso haro ita ikaroa fefeare, aea ere lea haro sa karu la toa hasiavaiape.

²⁰ Mearovaeka ve karu hohoi, lea hasiavaita etau sa paeai auke leipe lea karu, ere ereve mai sa leita lea tivi voa haiiri kerori kasirau. Ere harisu, aea gold aea silva aea auri koavi aea fave aea tola sa pisosita apeva ualare ve ove la maso toaita mai paraeai kasirau. Eite lea ove ere ofae eavaita mai aea mapaita mai aea mora kerorita mai ore kasirau.

²¹ Lea karu ta ere karu la paeaita, aea maeasiri, aea herei, aea torea leitita mai vei haiiri kerori kasirau.