Apokalupo 8 - Testamenta Áre 1983 (Toaripi PNG)

Seven totorea sasaraita peise

¹ Soka Mamoe Mere lea seven totorea sasaraita peise la tofapōpe lea mea, kauri voa o tororoōpe soa ora itai feare voa leipe.

² Aite ara Ualare ve omopa voa soi pepeita lea aneru seven la eavōpe, aeata fōfōaita u seven la erero miarōpe reha.

³ Aneru aea ta foreri, a ea aikaera muforoe itoita gold saesa mai sa ovi alitara ve maea maria voa soi pavōpe. Pōvi tola opu muforoe rauapo arero aiori, are lea opu la a ea, safu karu ve veveu o ita ilafisa, lea terona ve omopa voa peiape gold alitara ve arori voa vipai vei.

⁴ Aea lea tola opu muforoe ve aikaera, safu karu ve veveu o ita, aneru ve mai voa a eōpe mu Ualare ve omopa voa itei pataipe.

⁵ Lea mea lea aneru aikaera muforoe saesa la fareōvi, alitara ve akoela la mapōovi, saesa voa vovoisea soa’, arero mearovaeka voa tovuseōpe. Tovusea, sisorea huhururu a’, tutururu rauapo a’ a’, kevaro mavi mavi aea pupuiōvu ta pataipe.

⁶ Soka u seven ita aneru seven ere u fōfōai vei maea kekese leipe reha.

Fōfōaiape u seven

⁷ Omopa aneru areve u fōfōōpe lea soa, ōvo ita ilafisōpe lai fave aea akoela ita mearovaeka voa sisapi aea mearovaeka ve firu oroisoria ve firu farakeka aea la a sa sa’ kaleipe, aea tola ve firu oroisoria ve firu farakeka aea la a sa sa’ kaleipe, aea kavuru hako foromai ta a sa sa’ kaleipe.

⁸ Soka orakori aneru ta areve u fōfōōpe lea soa, etau usoso a sa sape raepa rovaea feare la makaikara iri voa toapōpe;

⁹ aea makaikara ve firu oroisoria ve firu farakeka aea la toarōrisa ovo leipe, aea makaikara ve iri voa roroaita makuri etau etau ve firu oroisoria ve firu farakeka aea la poesapōpe, aea vavaea foromai ve firu oroisoria ve firu farakeka aea la toa hohōroa hohōroa a’ kaleipe.

¹⁰ Soka oroisori aneru ta areve u fōfōōpe lea soa, koru rovaea kauri voa oaipe, usoso sasae a‐uri feare, aea lea koru mai foromai ve firu oroisoria ve firu farakeka aea voa, aeata ma popotoaita otioti voa oaipe.

¹¹ Lea koru ve rare Eokere reha. Oei ma foromai ve firu oroisoria ve firu farakeka aea la lei eokere leipe reha. Lei, karu rauapo lea ma la la’ hohōroōpe, ipi lea ma eokere eavia.

¹² Soka orakaraka aneru ta areve u fōfōōpe lea soa, sare ve firu oroisoria ve firu farakeka aea la toōpe, aeata papare ve firu oroisoria ve firu farakeka aea, aeata koru foromai ve firu oroisoria ve firu farakeka aea ta toōpe reha. Toa ereve firu oroisoria ve firu farakeka aea ve ovava la lei futi murumuru leipe. Lōfeare vei sare soa ve firu oroisoria ve firu farakeka aea ve ovava haeai auke leipe, aea faita soa ve firu oroisoria ve firu farakeka aea ve soa ta lōfeare leipe.

¹³ Lea mea ara ofae fofoisa, lahoapo kauri ve aru soa voa fufuka ape rovaea ita mō isōpe la mapōpe, Ahai‐e! ahai‐e! ahai‐e! U hohoi oroisoria la fōfōai vei leitita lea aneru oroisoria ereve u la fōfōaita lea soa, mearovaeka voa pepeita karu vei, ahai‐e!