Apokalupo 7 - Testamenta Áre 1983 (Toaripi PNG)

Israela karu 144,000

¹ Lea ve aite voa ara aneru orakaraka la ofae eavōpe; ere mearovaeka ve tao orakaraka voa soi popōvi, mearovaeka ve fareovaita mea orakaraka la mai sa paea ererea i a’ pepeiape, fareovaita mea mearovaeka voa aea makaikara voa aea tola aea voa toa levi fareovai vei.

² Lea soa ara aneru aea la mairimairi itai voa patei forerōpe la ofae eavōpe; are makuri lei vovo meita Ualare ve sasaraita peise ia. Are ape rovaea ita mearovaeka aea makaikara ita la hasiavaita siahu miarōpe lea aneru orakaraka la mō isa moipe,

³ Mearovaeka aea makaikara aea tola ita la lehaia levi hasiavaia, ereita ereitave Ualare ve sarufa karu la ereve harihari‐fave voa peise sasari sasari roroka leiti ao.

⁴ Lōfeare peise ita sasaraiape lea karu ve rauapo ta ara mapōpe; ere Israela ve susumori ve toruipi‐ipi foromai voa maravi sasaraiape karu 144,000;

⁵ Iuda ve toruipi voa 12,000; Reubena ve toruipi voa 12,000; Gada ve toruipi voa 12,000;

⁶ Asere ve toruipi voa 12,000; Nafatali ve toruipi voa 12,000; Manase ve toruipi voa 12,000;

⁷ Simeona ve toruipi voa 12,000; Levi ve toruipi voa 12,000; Isakara ve toruipi voa 12,000;

⁸ Sebulunu ve toruipi voa 12,000; Iosefa ve toruipi voa 12,000; Beniamina ve toruipi voa 12,000;

Karu sitavu rovaekapo

⁹ Lea ve aite voa ara ofae fofoisa, karu sa mai muti ore auke leitita karu sitavu rovaekapo la eavōpe; ere basileia aea toruipi‐ipi aea karikara haroharo aea uri hariaharia foromaiapo voa foreri, terona ve omopa voa aea Mamoe Mere ve soso voa, puta maea‐sea mopi mopi aea la tolo mai sa maravi soi pepeiape.

¹⁰ Soi pepea ere ape rovaea ita mō isa moiape, Lei makuri leita siahu ereitave Ualare, terona voa aiseseita lea Vita voa aea Mamoe Mere ita voa la eaea.

¹¹ Lea terona aea opasora‐sora karu aea lea makuri etau orakaraka la eakoa toepi soi pepeiape aneru foromai, ere lea terona ve omopa voa soso oti havuopi iavi, Ualare la maso toa,

¹² mō ape, Amene. Lei lareva leita o aea sosorusosoru aea haiore aea maeatita o aea marase o aea siahu aea rofo ita ereitave Ualare la miaraia, soa sarapai auke lei pepe peava. Amene.

¹³ Lea mea lea opasora karu farakeka aea araro lalasi lei mō ōpe, Puta maea‐sea mopi pepeipeta mea karu lavea? Aea ere leavoa foreri pepea?

¹⁴ Lei, ara tava o mō ōpe, Karu lareva e, ore vita eapo a reha. Aea are araro mō ōpe, Haisora rovaea la kiripi foreraipeta karu ere meha, ereve maea puta la ere Mamoe Mere ve ovo voa mauka lei maea‐sea loita meha.

¹⁵ Lea vei ere Ualare ve terona ve omopa voa soi popōvi, ere areve maso uvi voa sare ita faita ita maso tivi la leipea, aea terona voa aiseseita Ualare ereve harotōvu leiti roi.

¹⁶ Ere eroa ata levi sari roi, aea ere kōvōre‐tolo ata levi leiti roi; sare varo hehea varo erero levi toai roi.

¹⁷ Ipi lea terona ve aru voa meita lea Mamoe Mere erero mamoe feare kiva lei vovo meava roi, aea are makuri ma ve popotoaita otioti voa erero lariōvai roi; aea Ualare ovororo foromai ereve ofae voa roroa maravai roi.