Apokalupo 6 - Testamenta Áre 1983 (Toaripi PNG)

Karoro foea la totoreaita peise

¹ Soka ara Mamoe Mere la ofae eavōpe, are lea totoreaita peise seven ve farakeka la tofapōpe lea mea, ara lea makuri etau farakeka aea sa sisorea ve huhururu ita o mō isōpe la mapōpe, Kotia!

² Lō isa, ara hōsi maea‐sea farakeka aea la eavōpe; are voa forea aiseseiape vita apo ia. Kekeva arero miōri, aea are siahu ita sapatai vei maea leipe reha.

³ Soka are orakori totoreaita peise la tofapōpe lea mea, ara lea orakori makuri etau sa o mō isōpe la mapōpe, Kotia!

⁴ Lō isa, hōsi mohari farakeka aea forerōpe reha; are voa forea aiseseiape vita la siahu miarōpe tairu la mearovaeka voa fareovai vei, lea vei karu ere elore elore paea opai vei; aea marehaukaita soi rovaea arero ta miarōpe.

⁵ Soka are oroisori totoreaita peise la tofapōpe lea mea, ara lea oroisori makuri etau sa mō isōpe la mapōpe, Kotia! Lō isa, ara hōsi maea‐uru farakeka aea la eavōpe; are voa forea aiseseiape vita areve mai voa pasou la seseōvaita etau ia.

⁶ Ara lea makuri etau orakaraka ve aru voa i‐ape feare mō isōpe la mapōpe, Uiti seseōvaita oroasi farakeka ve tava silva moni koru farakeka, aea bali seseōvaita oroasi oroisoria ve tava silva moni koru farakeka. A—, olive tola aea vine tola ita la levi hasiavaia.

⁷ Soka are orakaraka totoreaita peise la tofapōpe lea mea, ara lea orakaraka makuri etau sa mō isōpe la mapōpe, Kotia!

⁸ Lō isa, ara hōsi maea‐seoro farakeka aea la eavōpe; are voa forea aiseseiape vita ve rare Opai, aea Hiehe‐iri arero aitetaipe. Siahu ereukaro miarōpe mearovaeka la firu orakaraka faea firu farakeka voa papukaru lei, ereuka marehaukaita soi sa aeata posera sa aea fafarapaita eka sa aeata mearovaeka ve fara ivara eokere animala ita sa karu la lōri poesapai vei.

⁹ Soka are five totoreaita peise la tofapōpe lea mea, ara alitara ve hiairi voa Ualare ve o la itoro a’, lea o ve okofa la muiaiape lea vei paea opaiape lea karu ve ove la ofae eavōpe.

¹⁰ Ere ape rovaea ita mō isa moipe, Papuvita rovaeka e, Safu ita okofa ita, a soa leasauka mearovaeka voa pepeita karu la seseōvi, tava elave ovo vei erero miarai roi ei?

¹¹ Soka puta maea‐sea erero farafarapo la miōri, aeata ere soa taheka aea ta haiorai vei o erero omoipe, pepepe ereve maeapavora sarufa karu aea ereve paumarehari ita la erero feare paeai vei leitita lea karu ve rauapo la paea paea kekese leiti ao.

¹² Soka are six totoreaita peise la tofapōpe lea mea, ara ofae eavōpe soa, pupuiōvu rovaeka patei, sare murumuru lei, pute puta maea‐uru feare leipe, aea papare rovaea ta ovo feare fei maea‐mohari leipe.

¹³ Koru mearovaeka voa sisapōpe usoso haue tola areve fare hari sa sisapaita feare, fareovaita mea rovaea sa arero pailalaeaita lea mea.

¹⁴ Kauri ta usoso kite feare irurukea veverapi kaleipe, aea raepa foromai aea firufiru foromai ita la ereve oti kofa voa lei kikia kikia a’ fari kaleipe.

¹⁵ Lea mea mearovaeka ve king karu, aea basileia ve karu metameta, aea maola harofave karu, aea pisoso karu, aea rofo karu, aea fasaita sarufa karu, aea pisiri lei roroaita karu, ere foromai raepa fave uta‐uta voa aea raepa fave metameta ora voa arafuka arafuka ōpe.

¹⁶ Ere raepa aea fave ita la mō isa moiape, Elave arori voa foforuka aieraia, terona voa aiseseita lea Vita ve soso voa aea lea Mamoe Mere ve kitou voa elaro lei arorisaia.

¹⁷ Ipi ereukave kitou ve sare rovaea foreraita meha, aea soi pavai vei ore leita karu leisa?