Apokalupo 5 - Testamenta Áre 1983 (Toaripi PNG)

Irurukeōpe karoro foea aeata Mamoe Mere

¹ Soka ara terona voa aiseseiape lea Vita ve mai toare voa irurukeōpe karoro foea la eavōpe, areve iri voa aeata kōu voa ukōpe karoro ia, aea soa seven totoreaita peise ita arero sasarōpe.

² Aea ara aneru rofo aea ta ofae eavōpe, are ape rovaea ita itoro a’ mō ōpe, Leisa usoso mea irurukeaita karoro foea la felaukea, areve totoreaita peise la tofapai vei ei?

³ A—, kauri voa aea mearovaeka voa aea mearovaeka ve ora voa ore leita karu kasirau lea karoro foea la felaukea areve iri voa ofae eavai vei.

⁴ Soka ara fi foromai ōpe, ipi karu farakeka aea usoso leiti kasirau lea karoro foea la felaukea areve iri voa ofae eavai vei.

⁵ Lea mea lea opasora aea araro mō ōpe, Fi levi aria, Iuda toruipi ve Liona, Davida ve Likilea, are sa sapatei la mea; are lea karoro foea felaukea, areve totoreaita peise seven la tofapaita ore.

⁶ Soka lea terona aea makuri etau orakaraka ve aru pisiri voa, aeata lea opasora‐sora ve aru voa, ara Mamoe Mere soi peiape la eavōpe, arero paea opōpe soso feare leipe. Are kea seven aea ofae seven ta ia, lea ofae ere Ualare ve arahoha seven, mearovaeka foromai voa itapi roroaita arahoha reha.

⁷ Soka are te terona voa aiseseita lea Vita ve mai toare voa lea karoro foea la ovōpe.

⁸ Are sa lea karoro foea la ovōpe soa, lea makuri etau orakaraka aea opasora‐sora twenty‐four ita ere Mamoe Mere ve omopa voa sukakoka avōpe reha. Ere farafarapo ereve elore elore kitara aeata elore elore gold saesa ia; lea saesa voa a ea aikaera muforoe sa soōpe, safu karu ve veveu toaita o reha.

⁹ Ere fara áre mō ferōpe, A lea karoro foea la ovi areve totoreaita peise la tofapai vei usoso; ipi aro paea opi, aea a ave ovo sa lei toruipi‐ipi foromai, uri foromai, karikara haroharo foromai, aea basileia foromai voa karu la itaea lei, a sa Ualare vei totamaravi laipea.

¹⁰ A sa erero lei, ere basileia ve harofave karu aeata maso tivi karu ereitave Ualare vei leiti vei; aeata ere mearovaeka voa arori kofa karu ta leiti roi.

¹¹ Lea mea ara ofae fofoisa, aea aneru sitavu ve i‐ape la mapōpe; ere terona aea makuri etau orakaraka aea opasora‐sora ita la eakoa toepi soi pepeiape, ere siviri siviri‐eiteapo.

¹² Ere i‐ape rovaea ita isa mō moipe, Mamoe Mere arero paea opōpe, a—, eite are faitora usoso siahu aea pisoso aea haiovoro aea rofo aea marase o aea sosorusosoru aea maeatita o ita la maravai vei.

¹³ Aea ara pisosiape etau foromai, kauri voa, aea mearovaeka voa aea mearovaeka ve ora voa aea makaikara voa aea ereve iri voa roroaita etau etau foromai sa i mō isa moipe la mapōpe, Terona voa aiseseita Ualare aea Mamoe Mere ita la o sa lei lareva lei aea maeatia, aea lei sosorusosoru ta lei, siahu ereukaro miarai peava.

¹⁴ Aea lea makuri etau orakaraka mō ōpe, Amene. Aea lea opasora‐sora sukakoka avi maso toōpe reha.