Apokalupo 4 - Testamenta Áre 1983 (Toaripi PNG)

Kauri voa eavōpe haiako auka

¹ Lea etau ve aite voa, ara misilei fofoisa, aea ara kauri voa fapi eaeita utape la eavōpe. Ara omopa mapōpe lea i‐ape, u ve fi feare, araro mō ōpe, Mōvoa pataia, aea ara aite soa voa au forerai vei leipeta lea etau la aro muiai roi.

² Si kao, ara Arahoha ita meiape. Mea, ara auka voa eavōpe soa, terona aea kauri voa pea, aea karu farakeka aea lea terona voa aiseseiape la ofae eavōpe.

³ Lōvoa aiseseiape lea karu ve opape kevarokevaro faipe, usoso iasapara fave aea onika fave feare; aea kauri ve lavai lea terona voa miavi eakoa toepōpe usoso emeralda fave ve maea feare.

⁴ Lea terona voa terona twenty‐four sa popōvi eakoa toepōpe, aea lea terona twenty‐four voa ara opasora‐sora twenty‐four puta maea‐sea sa mopi, aea gold kekeva ereve harofave voa topi aipepeiape la ofae eavōpe.

⁵ Lea terona voa kevaro foreri mavi, tutururu a’ a’, aea sisorea huhururu ape; aea terona ve omopa voa sasae‐a seven sa sape, Ualare ve arahoha seven reha.

⁶ Aeata lea terona ve omopa voa makaikara ovava‐eka usoso ma‐ove feare ta moeiape. Terona ve itai itai voa makuri etau orakaraka sa arero eakoa toepi soi pepeiape, ereve omopa voa aea ereve aite voa ofae rauapo sa ereve maea la aieri siseiape.

⁷ Lea omopa makuri etau liona feare leipe, orakori makuri etau boromakao feare, oroisori makuri etau are karu ve soso feare, aea orakaraka makuri etau fufukaita lahoapo feare ta leipe.

⁸ Lea makuri etau orakaraka ere farafarapo avako six ia, ofae rauapo, iri ita pisiri ita voa aieri eakoa toepi siseiape. Ere sare ita faita ita voa poetapai auke ita, fara mō fera vovea, Safu, safu, safu, Papuvita Rofo Rovaekapo Ualare are reha, are meiape, aea meipeta aeata forerai vei leipeta Ualare.

⁹ Soka lea makuri etau ere terona voa aisesea, peita makuri ve Ualare la lei sosorusosoru lei, arero taivotei, aea maeatita lea meamea,

¹⁰ lea opasora‐sora karu twenty‐four ere terona voa aiseseita Ualare ve omopa voa sukakoka avi, peita makuri ve Ualare la maso toa, ereve kekeva la lea terona ve omopa voa toapa toapa a’ fara mō fera vovea,

¹¹ Elave Papuvita, elave Ualare e, a sosorusosoru lei aro maeati, siahu a sa ovai vei, mai lareva reha; ipi a etau foromai la pisosipe, aea a sa haikaeōpe lea vei ere foreri lōri la roroa.