Apokalupo 3 - Testamenta Áre 1983 (Toaripi PNG)

Ovoro ipi Saradisi ekalesia veia

¹ Saradisi voa peita ekalesia ve aneru la o mō ukaia: Ualare ve arahoha seven aea koru seven ita meita lea Vita ve o meha. Ara ave leita mai ore fae; a makuri leitita rare ia, a—, eite a opi la eaea.

² Ovoako leitia, aea ave iri voa siseipeta etau hohoi, opai vei leipeta lea etau la kiva kofa lei, rofo miaraia. Ipi ara ave leita etau lareva ita kekese leitita la arave Ualare ve omopa voa eavai sore.

³ Aro satiriōri ore lei a mapaiape lea ovoro la haikaeaia; aeata lea ovoro la kakeva lei, haiiri keroria. A itoi auke leitit’ oria, ara torea karu sa foreraita mai feare koti roi.

⁴ A—, Saradisi voa, ave karu fafareso ereve maea puta sirisiri auke ita laepepea. Ere puta maea‐sea mopi, ara ita fareho kerori vovo roroava roi, ipi ere karu lareva eavia.

⁵ Sapataita lea karu are puta maea‐sea lōfeare la mopai roi; ara areve rare la makuri ve buka voa levi sasukai roi, a—, arave Oa ve soso voa aea areve aneru ve soso voa lea karu ve rare la vavavai roi.

⁶ Karu mapaita ōvauta ita oria, Arahoha sa ekalesia firufiru la moita mea o la mapaia.

Ovoro ipi Filadelefia ekalesia veia

⁷ Filadelefia voa peita ekalesia ve aneru la o mō ukaia: Safu lei okofa ita meita Vita, Davida ve ki ita Vita, are fapaita, a—, karu aea sa levi sasaukai roi, aea are sasaukaita, a—, karu aea sa levi fapai roi, lea Vita ve o meha.

⁸ Ara ave leita mai la ore fae. Mapaia, ara fapi peita utape la ave omopa voa vipaita meha, karu aea lea utape la sasaukaita ore kasirau. Ara ore ave siahu rovaea kao, a—, a arave o la kakeva lei, aea arave rare la avoa aria kasirau.

⁹ Mapaia, ara Satani ve firu karu, ereve elore maea ere Iuda karu rare apeva ita aravaita lea karu la haisa mei ere koti ave mora voa sukakoka hiopi, ara sa aro haikakare araitore lea la ere ore leiti roi.

¹⁰ Ipi ara aro haisa moipe, a lulalula auke haiiri rofo ita mei vei lea o la mapi kakeva lei meita lea vei, mearovaeka foromai la seseōvaita ora voa, mearovaeka voa pepeita karu la seseōvi ore leiti vei, lea ora voa ara ta aro kiva lei, lei makuri leiti roi.

¹¹ Ara utohoa forerai roi. A ovi meita lea etau la mai kere paeaia, karu aea sa ave kekeva la fareovai ave.

¹² Sapataita lea vita, ara arero lei are arave Ualare ve maso uvi voa savoro leiti roi, aea are arero kiripi maria voa levi soeai roi peava roi. Ara arave Ualare ve rare are voa ukai roi; arave Ualare ve karikara ve rare ita, Ierusalema áre, kauri voa arave Ualare voa fauka foreraita lea karikara, aeata arave haria rare áre ta reha.

¹³ Karu mapaita ōvauta ita oria, Arahoha sa ekalesia firufiru la moita mea o la mapaia.

Ovoro ipi Laodikea ekalesia veia

¹⁴ Laodikea voa peita ekalesia ve aneru la o mō ukaia: Lea Amene rare Vita, sukaererea vovo meita, okofa ita moita Vita, Ualare sa pisosipe etau etau foromai ve oarehōva Vita, areve o meha.

¹⁵ Ara ave leita mai ore fae; a vevekoko kao aea a hehea ta kao. A vevekoko varo hehea varo leitit’ oria, a—, a hovea leiti lare.

¹⁶ A—, ipi a vevesere, hehea kao aeata vevekoko kao, ara arave ape voa aro suka sisōvai roi.

¹⁷ Ipi ave o meha, Ara pisoso vita, aea etauroro rauapo ia, aea etau aea ta haikaeaia kao. A hopa ore kasirau, a haisora vita, merava aea etau auke vita; a ofae kuku, aeata maea paseare.

¹⁸ Lea vei ara aro la kureaipea, a ara voa a voa ea hohorea ovava leitita gold la itaea lei ovaia, a pisoso vita leiti vei, aea puta maea‐sea, ave maea la mopi, ave maea paseare ve maeamariti la ofae levi eavai vei. Ofae muramura ta itaea lei ovaia, ave ofae oraka la roroa, a ofae eavai vei.

¹⁹ Ara haikakare araita lea karu la ara o haiiri mei aea toa satiriarai vovea; lea vei haihahari lei, haiiri keroria.

²⁰ Ofae eavaia, ara utape maria voa soi pōvi la totoaipea; karu arave i‐ape la mapi, utape la fapaita, a—, ara arero tai iri voa oropi, are ita farehoria larietau lari roi, aea are ta ara ita farehoria.

²¹ Sapataita lea vita are arave terona voa ara ita fareho avai vei siahu arero miarai roi, usoso ara ta sapataipe, aea arave Oa ita fáreho areve terona voa avi aiseseita lōfeare.

²² Karu mapaita ōvauta ita oria, Arahoha sa ekalesia firufiru la moita mea o la mapaia.