Apokalupo 22 - Testamenta Áre 1983 (Toaripi PNG)

Ualare ve terona

¹ Lea soa lea aneru makuri ma ve mai ovava‐eka kofa la araro muiope; are Ualare aea Mamoe Mere ve terona voa popotoa foreri,

² karikara ve pisiri ve aru voa tarerea terōpe. Lea mai poe itai itai voa makuri ve tola sa pepeiape; are fare soa twelve sisoro farafarapo voa taiape, papare farafarapo voa soa farakeka lōfefeare taiape; aeata lea tola ve tolotolo sa toruipi‐ipi karu ve eka la lei lareva lei vei.

³ Ualare sa hasiavaita o ōpe etau aea lōvoa eaei kasirau, a—, Ualare aea Mamoe Mere ve terona sa lōvoa peava roi. Areve sarufa karu arero maso toai roi;

⁴ ere areve soso la ofae eovi, aea areve rare sa ereve harihari‐fave voa uka siseiava roi.

⁵ Faita muru ata levi leiti roi; aea ere lamepa ō sare ve ovava hai levi kaeai roi, ipi Papuvita Ualare sa ovava ere vei haeai roi; aeata ere basileia harofave karu lei vovo roroava roi.

Papuvita Iesu la kotipea

⁶ Soka lea aneru araro o mō moipe, Mea o karu sa sukaerereaita o, aeata okofa. Papuvita, areve Arahoha la peroveta karu la miaraita lea Ualare, areve aneru la itapi laipea, utohoa forerai vei leipeta etau etau la areve sarufa karu la muiai vei.

⁷ Mapaia, ara utohoa koti vei la leipea. Mea buka ve peroveta o la kakeva leitita lea karu lareva ia.

⁸ Lea etau la mapi aeata ofae eavaiape vita, arao, Ioane meha. Soka ara mapi lea etau la ofae eavōpe lea mea, ara erero araro muiōpe lea aneru ve mora ipi voa soso oti havuopi iavōpe arero maso toai vei.

⁹ A—, are araro mō ōpe, A lōfeare levi leitia. Ara ta sarufa vita aea, ao aeata ave paumarehari lea peroveta karu, aea mea buka ve o la kakeva leitita lea karu ita farehoria. Ualare la maso toaia.

¹⁰ Are o aeata araro mō ōpe, Mea buka ve peroveta o la levi arorisaia, ipi soa haekao loi.

¹¹ Mai maealolo leita lea karu are mai maealolo lei vovo meava, aea haiiri sirisiri ita meita lea karu are ta lōri meava, a—, haura ita meita lea karu, are haura lei vovo meava, aea safu mai la leita lea karu, safu mai ta lei vovo meava.

¹² Ofae eavia, ara utohoa koti vei la leipea; ara tava miaraita etau ita la mea, karu foromai la farafarapo miarai vei usoso are sa leiape lea mai feare.

¹³ Ara Alefa aeata Omega, ara oarehōva soa voa meiape aeata sisa soa voa meava roi, ara omopa kofa meiape Vita aeata aite kofa mei Vita.

¹⁴ Ereve maea puta la maukaita lea karu ere lareva ia, ipi ere makuri tola ve fare la larita ore, aeata ere karikara ve otiape‐ape voa alaeai vei siahu ia.

¹⁵ A—, ave fefeare karu, aea maeasiri karu, aea herei karu, aea karu la paeaita karu, aea apeva ualare ve ove la maso toaita karu, aea apeva la haikakare lei arita lea karu foromai ere koravasa voa.

¹⁶ Arao, Iesu, ara arave aneru la lea ovoro ita ekalesia firufiru foromai vei aro tai itapaita meha. Ara Davida ve likilea aeata meavumōla, aeata mea ōpai koru sosorusosoru.

¹⁷ Arahoha aea Vita laeai vei leipeta lea ua are o mō auai, Kotia. Mea o la mapaita lea karu ta o mō aria, Kotia. Kōvōre‐tola leita karu ta kotia; ma haikaeaita lea karu makuri ve ma la tava auke ita ovi laria.

¹⁸ Ara mea buka ve peroveta o la mapaita lea karu foromai la kureai: karu o aea la ovi erero topiaraita, a—, Ualare mea buka voa uka siseita lea hasiavaita etau ta ovi are voa topiarai roi.

¹⁹ Aea karu mea buka ve peroveta o voa o hea la fareovaita, a—, Ualare areve soa la makuri ve tola voa aea safu karikara voa, mea buka voa uka siseita lea soasoa voa fareovai roi.

²⁰ Mea etau la ore lei okofa moita lea Vita mō auai, Okofa, ara utohoa koti vei la leipea. Amene. Papuvita Iesu e, kotia!

²¹ Papuvita Iesu Keriso ve haiforoe leita meru karu foromai ita lei peava.