Apokalupo 21 - Testamenta Áre 1983 (Toaripi PNG)

Kauri are aeata mearovaeka are

¹ Soka ara kauri are aeata mearovaeka are ita la ofae eavōpe, ipi lea omopa kofa kauri, aea lea omopa kofa mearovaeka veverapi, makaikara ta ata moeai kasirau.

² Aea ara lea safu karikara, Ierusalema are, Ualare la kiripi kauri voa faukaiape la ofae eavōpe, usoso laeai vei leita ua are, areve vita sukaeai vei maea la uka kekese leita feare.

³ Lea mea ara i‐ape rovaea kauri voa mō isōpe la mapōpe, Ofae eavaia, Ualare ve pavaita oti karu voa la eaea, aea are ere ita farehoria pōvi, ere areve karu leiti roi, aea Ualare, are kofa ere ita farehoria lei, ereve Ualare lei peava roi.

⁴ Are ovororo foromai ereve ofae voa roroa ovai roi, aea opai ata levi leiti roi, tepe fi aea fi o aea hehea ta ata levi leiti roi; ipi lea omopa kofa etau foromai veverapi kaleita meha.

⁵ Lea mea terona voa aiseseita lea Ualare mō ōpe, Ofae eavaia, ara etau foromai la lei are la leipea. Aea are mō ōpe, Ukaia, ipi mea o karu sa sukaerereaita o, aeata okofa.

⁶ Are araro ta mō ōpe, Roroka loita meha. Ara Alefa aeata Omega, omopa kofa meiape Vita aeata aite kofa mei Vita. Kōvōre‐tolo leita karu la ara makuri ve ma popotoaita oti voa ma tava auke ita arero miarai roi.

⁷ Sapataita lea karu sa mea etau la ara voa ovai roi: ara areve Ualare leiti roi, aea are ta arave atute lei meava roi.

⁸ A—, tore lei roroaita, aea sukaerereai auke leita lea karu, aea karu maealolo, aea karu la paeaita karu, aea herei karu, aea maeasiri karu, aea apeva ualare ve ove la maso toaita karu, aea apeva karu foromai, ereve soa sarita a aea solifara sitoi voa leiti roi; orakori opaita soa reha.

Ierusalema áre

⁹ Aite voa aneru aea, lea sisa hasiavaita etau seven sa soōpe saesa seven ita aneru seven ve farakeka aea, araro tai foreri araro o mei mō ōpe, Kotiria, ara lea ua áre, Mamoe Mere ve ua la aro muiai roi.

¹⁰ Lō mei are araro Arahoha sa fareōvi, raepa koa rovaea voa vipi, safu karikara Ierusalema, Ualare la kiripi kauri voa faukaiape la araro muiōpe.

¹¹ Are Ualare ve sosorusosoru ita lei, areve maea misuru usoso pisoso fave sosorusosoru, iasapara fave feare, aea are ovava‐ovava‐ka.

¹² Are fave lōva rovaea aeata koa ia. Areve otiape‐ape twelve, aea lea otiape‐ape voa aneru twelve sa kiva lei pepeiape, Israela ve susumori ve toruipi‐ipi twelve ve rare rare lea otiape‐ape voa uka siseiape.

¹³ Karikara ve itai farafarapo voa otiape‐ape oroiso oroiso reha: mauta itai oroisoria, maruru itai oroisoria, diho itai oroisoria, aea avora itai ta oroisoria.

¹⁴ Lea karikara ve fave lōva ve ipi fave twelve ia, aea lea fave voa Mamoe Mere ve aposetolo karu twelve ve rare rare la uka siseiape.

¹⁵ Soka araro o moiape lea aneru are seseōvaita sirivo gold ia, lea karikara aea areve otiape‐ape aea areve fave lōva ita ve rovaea la seseōvai vei.

¹⁶ Seseōvi seseōvi lea karikara itai itai orakaraka usoso leipe. Lea aneru areve sirivo la ovi karikara la seseōvōpe, kilometre 2,400 reha. Areve savori aeata areve pisasa aeata areve koa usoso kofa turi peiape.

¹⁷ Are ta areve fave lōva la seseōvōpe, metre 60 reha, usoso karu sa seseōvi, aneru sa leitita lea mai feare.

¹⁸ Lea lōva la turōpe etau iasapara reha, aea karikara la turōpe etau gold kofa, are ovava‐ovava‐ka.

¹⁹ Karikara lōva ve ipi la pisoso fave sosorusosoru hariaharia sa moupa arōpe. Omopa kofa oti iasapara reha, orakoria safaira, oroisoria agate, orakaraka emeralda,

²⁰ five onika, six sardiusi, seven kerusolite, eight berila, nine topasi, ten kerusoparo, eleven iakinta, twelve ametusa.

²¹ Lea otiape‐ape twelve ere isave fare twelve reha; lea otiape farafarapo isave fare farafarapo sa leipe; aea lea karikara pisiri gold kofa sa leipe, are ovava‐ovava‐ka.

²² Karikara ve iri voa ara maso uvi la ofae eavai kasirau, ipi Papuvita Ualare, Rofa Rovaekapo Vita, aea Mamoe Mere ita areve maso uvi reha.

²³ Lea karikara sare aeata papare arero haea ovava leiti vei haikaeai kasirau, ipi Ualare ve sosorusosoru sa arero haea ovava leititore, aea areve lamepa Mamoe Mere reha.

²⁴ Toruipi‐ipi karu foromai areve ovava voa kerori vo roroava roi; aea are voa mearovaeka ve king karu ereve sosorusosoru la totamaravi forerai roi.

²⁵ Sare soa voa areve otiape‐ape levi sasaukai peava roi; aea lōvoa faita ta kasirau.

²⁶ Ere toruipi‐ipi ve sosorusosoru etau aea ereve pisoso etau ita la lea karikara ve iri voa totamaravi oropai roi.

²⁷ A—, etau maealolo merava, ō maeamariti mai la leita karu, ō apeva karu lōvoa levi oropai roi, a—, Mamoe Mere ve makuri ve buka voa ereve rare rare la uka siseita lea karu sa haria.