Apokalupo 18 - Testamenta Áre 1983 (Toaripi PNG)

Babulono la toa foforukōpe

¹ Lea etau ve aite voa ara aneru aea siahu rovaea ovi, kauri voa fauka forerōpe la ofae eavōpe. Areve sosorusosoru sa mearovaeka voa haea lei ovava leipe.

² Are ape rovaea ita mō isōpe, Babulono rovaea putoita meha, are putoita meha! Are faitora harisu sa pepeita oti lei la eaea, aea arahoha maea sisiaviri sa roroaita oti; ori maealolo aea ivara eokere hariaharia lōvoa forea laepepea.

³ Ipi toruipi‐ipi foromai areve herei ve uaina rauapo la la’, aea mearovaeka ve king karu ere are ita herei mai la lei lei, aea mearovaeka ve etau la maeamaea itaea leitita karu ere areve haiarori pisoso sa erero lei pisoso rovaea lei la roroa.

⁴ Lea mea ara i‐ape aea kauri voa foreri mō moipe la mapōpe, Arave karu e, arero kiripi oroaia, e are ita fareho mai kaiae leiti ave, e are ita fareho hehea leiti ave.

⁵ Ipi areve kaiae toea toea patei soa kauri voa forerai, aea Ualare areve mai maealolo la haisafaia kasirau.

⁶ Are sa miaraiape lea mai feare arero ta miaraia, aea areve leita mai vei tava soa orakoria topiari arero miaraia. Are karu haria sa lari vei korarōpe lea kōkuveisa voa lōfeare soa orakoria are sa lari vei ta koraraia.

⁷ Are elore maea la lei sosorusosoru lei aea haiarori pisoso leipe lōfeare, hehea lei haieae leita soa ta arero miaraia. Ipi are areve elore haiiri voa o mō moitore, Ara papuōvu rovaea feare lei laisesea; ara ua vitōva kasirau, ara maea tu ta levi leiti roi.

⁸ Lea vei arero hasiavaita etau sare farakeka voa forerai roi, paeaita eka aea tepe fi aeata posera reha. Arero a sa sa’ haroavai roi, ipi arero seseōvi tava miaraita lea Papuvita Ualare are siahu ia.

⁹ Mearovaeka ve king karu, herei lei aea haiarori mai are ita fareho leiape lea king, ere are vei ovororo sisapi fi savoi roi, ere sa arero sarita a ve aikaera la fofoisaita lea mea.

¹⁰ Ere arero hehea leitita lea etau la tore lei ára‐ita popōvi o mō ari roi, Ahai‐e, ahai‐e, Babulono e! Karikara rovaea kofa, rofo karikara! Ora farakeka voa aro seseōvaita tava miōri roroka loita meha.

¹¹ Mearovaeka ve etau maeamaea itaea leita karu ta ovororo sisapi fi ari roi, ipi ereve etau maeamaea la ata itaea lei maravai vei karu kasirau.

¹² Gold etau, aea silva, aea pisoso fave sosorusosoru, aea isave fare, aea puta kere mohari‐maea‐uru, aea siliko puta, aea puta mohari ita; tola muforoe maeamaea, aea elefanta kea sa pisosita etau foromai, tava rovaea tola, aea auri, aea auri koavi aea fave maea‐sea sa pisosita etau foromai;

¹³ aea tola ruru aea tola opu muforoe, mirisōvu aea horovoso, aea a eaita tola opu muforoe, aea ivuru aea hore; aeata uaina aea teoro, aeata faloa lareva aea uti, boromakao aea mamoe, hōsi aea kariota, aea fasaita sarufa karu, aea karu ve makuri ta reha.

¹⁴ A sa maravai vei haikakare leita etau etau a voa veverapi kaloita meha, aea ave tapare etau etau aea ave sosorusosoru ita aro kiripi oroavi kaloita reha, ata levi sukaeai roi.

¹⁵ Lea etau la itaea lei miaraita karu, ere lōfeare sa lei pisoso leiape lea karu, ere arero hehea leita etau la tore lei ára‐ita popōvi, ovororo sisapi, ape rovaea ita fi savei mō ari roi.

¹⁶ Ahai‐e, ahai‐e, karikara rovaeka e! A puta kere mohari‐maea‐uru aea mohari kofa mopi, gold etau aea pisoso fave sosorusosoru aea isave fave ita maea moupa ara vovo meiape.

¹⁷ Ora farakeka voa ave lea pisoso foromai kaloita meha. Aea vavaea papukaru foromai, aea makaikara voa roroaita karu, aea vavaea tivi karu aea ma voa sariva lei itaea leitita karu, ere ára‐ita popōvi,

¹⁸ fi ape. Ere arero sasape aikaera la fofoisa mō isa moiape, Lea karikara rovaea feare karikara aea leavoa?

¹⁹ Ere ereve harofave voa tetere sa turi, ovororo sisapi fi savei mō isa moiape, Ahai‐e, ahai‐e, karikara rovaeka e! Areve itaea lei maravaiape tava rovaea vei, vavaea sa makaikara voa roroaiape lea karu ere pisoso leiape. Ora farakeka voa arero saroroapi oti meara loita meha.

²⁰ Kauri e, arero saroroapaita lea vei hailareva leitia! Ualare ve karu, aea aposetolo karu aea peroveta karu ita, hailareva leitia! Ipi Ualare arero seseōvi tava e vei arero miaraita meha.

²¹ Lea mea aneru rofo eokere aea fave aea la moravōpe, uiti fare rorokea faihohōroaita fave rovaea feare, aea arero makaikara voa toapi mō ōpe, Mōfeare ivara eokere mai ita lea karikara rovaeka Babulono la toa hohōroa, aea arero ata levi eavai roi.

²² Kitara toaita fi aea karu sa feraita fara, aea mioho fōfōaita sesesese aea u fōfōaita ioruru a voa ata levi mapai roi. Tivi hariaharia maiore karu la a voa ata levi sukaeai roi. Uiti fare la rorokea faihohōroaita fave ve kekeara a voa ata levi mapai roi.

²³ Lamepa ve ovava a voa ata levi haeai roi. Ua laeaita vita aea ua are ita ve ape o la a voa ata levi mapai roi. Ipi ave etau maeamaea itaea leita karu ere mearovaeka voa karu metameta lei roroaiape, aea toruipi‐ipi foromai la ave kaeavuru sa apeva vuteaiape.

²⁴ Ipi Babulono voa peroveta karu aea Ualare ve karu ita ve ovo, aeata mearovaeka voa paeaiape lea karu foromai ve ovo ita la lōvoa eavōpe.