Apokalupo 16 - Testamenta Áre 1983 (Toaripi PNG)

Ualare ve kitou ve saesa seven

¹ Lea mea ara i‐ape rovaea maso uvi voa foreri lea aneru seven la mō isōpe la mapōpe, Te, Ualare ve kitou ve saesa seven la mearovaeka voa suka sisōvaia.

² Soka omopa aneru te areve saesa mearovaeka voa suka sisōvōpe, aea lea animala ivara eokere ve foa ita, aea areve ove etau la maso toaiape lea karu ere tare siaviri sa lei hehea rovaea leipe reha.

³ Soka lea orakori aneru ta areve saesa makaikara voa suka sisōvi, aea makaikara toarōrisa opai karu ve ovo feare lei, makaikara voa makuri lei roroaiape etau foromai la sa’ haroavi kaleipe.

⁴ Soka lea oroisori aneru areve saesa mai voa aea ma ve popotoaita otioti voa sisōvi sisōvi, ere ta ovo leipe reha.

⁵ Lea mea ara ma foromai ve harofave aneru sa mō moipe o la mapōpe. Safu Ualare e, a peipeta aeata peiape Ualare, mea seseōvi tava miaraita mai voa a haura.

⁶ Ipi ere Ualare ve karu aeata peroveta karu ita ve ovo la lei sisapaiape, aea a ovo ere lari vei erero miaraita meha. Ereve lea tava haura.

⁷ Aea ara alitara voa i‐ape mō isōpe la mapōpe, Papuvita Ualare, Rofo Rovaekapo Vita e, okofa; ave seseōvi tava miaraita mai okofa aeata haura.

⁸ Soka lea orakaraka aneru areve saesa sare voa suka sisōvi, sare la lei are karu la a sa sa’ sapukeai vei.

⁹ Sare ve siahu rovaea sa karu la lei a sa sa’ ere mea hasiavaita soasoa la lei foreraita lea Ualare ve rare vei o maealolo ape, a—, ere haiiri kerori auke ita, arero maeati kasirau.

¹⁰ Soka lea five aneru areve saesa lea animala ivara eokere ve terona voa suka sisōvi, aea areve basileia la lei murumuru leipe reha. Karu hehea lei ereve uri la tao sa putovi,

¹¹ aea ere kauri ve Ualare la o maealolo ape, ipi ere hehea aeata siaviri rauapo eavia; a—, ere sa leitita lea etau vei ere haiiri kerori kasirau.

¹² Soka lea six aneru areve saesa mai rovaea Euferate voa suka sisōvi, aea lea mai ve ma tori kaleipe, mairimairi itai voa forerai vei leita lea king ve otiharo la lei fapi kekese leiti vei.

¹³ Aea ara arahoha maea sisiaviri oroisoria, usoso pakeke fefeare, eli ve ape voa, aea lea animala ve ape voa aea apeva peroveta karu ve ape voa forerōpe la ofae eavōpe.

¹⁴ Ere arahoha maealolo‐maealolo‐eite, haihava etau etau la leitita arahoha. Mea arahoha oroisoria ere mearovaeka foromai ve king karu tai te erero kokoruka, ere Rofo Rovaekapo Ualare ve Sare rovaea voa maola leiti vei.

¹⁵ Mapaia! Ara torea karu ve mai feare murufa forerai vei la leipea. Mōfeare karu lareva ia; are ovoako lei, areve maea puta kekese ita maea maria voa miavaita, are maea paseare ita kerori vo mei ave, aea areve maeamariti la pisiri voa muiai ave.

¹⁶ Lea mea lea arahoha oroisoria ere king karu la lei kokorukōpe oti farakeka aea voa, oti rare Heberu uri voa Aramagedono reha.

¹⁷ Soka lea seven aneru areve saesa kauri ve miruru voa suka sisōvi, i‐ape rovaeka maso uvi voa aea terona voa forera mō ōpe, Roroka loita reha.

¹⁸ Lea soa kevaro mavi mavi, tutururu rauapo a’ a’, sisorea ta huhururu a’ a’, aea pupuiōvu rovaeka ta pataipe, karu mearovaeka voa oarehōva pepeiape soa itiiti faitora lōfeare pupuiōvu rovaeka patai sore.

¹⁹ Lea karikara rovaea tofei haea firu oroisoria voa leipe aea toruipi‐ipi ve karikara haroharo ta foforukaiape. Ualare are Babulono rovaeka la haikaeōpe, areve kitou ve hehea ve uaina ve kōkuveisa la arero miōri la’ haroavai vei.

²⁰ Makaikara ve firufiru foromai oroavi kalei, aea raepa raepa ta veverapi kaleipe.

²¹ Lai fave metameta, farafarapo ve pasou 50 kilo feare, kauri voa paparaea karu voa sisapōpe. Lea lai fave sa hasiavaiape lea vei, karu Ualare la o maealolo ape, ipi lea lai fave tore leitita etau soa haria‐eka eavia.