Biblia Todo Logo
Bìoball air-loidhne

- Sanasan -

Apokalupo 15 - Testamenta Áre 1983 (Toaripi PNG)


Aite kofa hasiavaita etau seven

1 Soka ara haihava etau aea la kauri voa ofae eavōpe, are etau rovaeka aea soa haria kofa; aneru seven hasiavaita etau seven ia; ere sisa hasiavaita etau reha, ipi ere voa Ualare ve kitou la muia muia kaleita reha.

2 Lea mea ara makaikara ma‐ove feare a ita ilafisōpe la ofae eavōpe. Ara lea animala ivara eokere aea areve ove etau aea areve rare ve numera ita la sapataita karu ta ofae eavōpe, ere lea ma‐ove feare makaikara ve miri voa soi popōvi, Ualare sa miaraita kitara ereve mai voa.

3 Lea mea ere Ualare ve sarufa vita Mose ve fara, aeata Mamoe Mere ve fara ita la mō ferōpe, Papuvita Ualare, Rofo Rovaekapo Vita e, ave leita etau ere metameta aeata haihava etau reha: Toruipi‐ipi karu foromai ve King, ave leita mai haura aeata okofa ita reha.

4 Papuvita e, aro tore auke karu leisa? Ave rare la maeati auke karu leisa? Ipi a haria safu lei mea vovea. Torutoru karu foromai forera aro maso toai roi, ipi ave haura leita mai pisiri lei muiaita meha.

5 Lea ve aite voa ara ofae fofoisa, maso uvi kauri voa fapōpe la eavōpe, aea otoare oroasi ve harotōvu areve iri voa peiape.

6 Aea aneru seven, hasiavaita etau seven ita lea aneru, maso uvi kiripi pisiri voa forerōpe; ere puta kere ovava aea seasea‐eite mopi ereve haiposa voa gold kava sa haea eakoa toepi roroaiape.

7 Soka makuri etau orakaraka ve farakeka aea are gold saesa seven, peita makuri ve Ualare ve kitou sa sisōvi soōpe saesa la fari lea aneru seven la aiorōpe.

8 Aiori, Ualare ve sosorusosoru aea areve siahu voa forerōpe aikaera sa lea maso uvi la sukafasi soōpe; aea karu farakeka aea lea maso uvi voa oropaita ore leiti kasirau tetete lea aneru seven ve hasiavaita etau seven sa kaleipe lea soa voa.

Published by the Bible Society of Papua New Guinea in 1983.

British & Foreign Bible Society
Lean sinn:



Sanasan