Apokalupo 14 - Testamenta Áre 1983 (Toaripi PNG)

Mamoe Mere aea areve karu ita

¹ Lea mea ara ofae fofoisa, Mamoe Mere Siona raepa voa soi peiape la ofae eavōpe, aea are ita farehoria karu 144,000, aea areve rare aea areve Oa ve rare ereve harihari‐fave voa uka siseiape.

² Ara i‐ape kauri voa forerōpe la mapōpe, aroaro ve hohororo feare aeata sisorea ve huhururu rovaea feare. Ara mapōpe lea i‐ape are ta kitara toaita karu ereve kitara la toaita lea fi foroe feare.

³ Aea ere terona ve omopa voa, aea lea makuri etau orakaraka, aeata lea opasora‐sora ve omopa voa fara are feraitore. Lea fara karu haria sa feraita ore kasirau, lea karu 144,000 sa haria ore, mearovaeka voa itaea lei farōpe lea karu.

⁴ Ere ereve maea la uamori ita lei sirisiri auke leitita lea karu, ipi ereve maea safu lei roroka eavia. Ere Mamoe Mere sa tera vovo meita lea oti foromai voa arero aitetai vovea. Erero karu ve aru voa itaea lei farōpe, ere sa fare toare Ualare vei aea Mamoe Mere vei leiti vei.

⁵ O apeva aea ereve ape voa forerai sore, ipi ere maita maealolo auke ita roroaita karu.

⁶ Lea mea ara aneru aea ta kauri ve aru voa fufuka meiape la ofae eavōpe, peita Ovoro Lareva la mearovaeka voa pepeita karu, basileia hariaharia aea toruipi‐ipi aea uri hariaharia aea karu foromaiapo ita la itoro ari vei.

⁷ Are ape rovaea ita mō isa moipe, Ualare la tore lei arero marase aria, ipi are sa seseōvi tava miaraita ora foreraita meha; kauri aea mearovaeka, makaikara aeata ma popotoaita otioti ita la pisosiape lea Ualare la maso toaia.

⁸ Aneru aea ta, are orakori aneru, aitetei mō ōpe, Babulono rovaea, basileia foromai la lei areve herei ve uaina, Ualare ve kitou lei foreraita lea uaina la haisa larita lea karikara putoita meha, are putoita meha.

⁹ Aneru aeata, are oroisori aneru, ereukaro aitetei, ape rovaea ita mō isa moipe, Karu aea lea animala ivara eokere aea areve ove ita la maso toa, areve harihari‐fave voa ō areve mai voa foa ita oria,

¹⁰ are ta Ualare ve kitou ve uaina, etau haria aea ita ilafisai auke ita sisōvi, areve kitou ve kōkuveisa voa lari roi; aea sarita a aeata solifara ita sa arero lei hehea lei, safu aneru aea Mamoe Mere ita ve soso voa are haisora leiti roi.

¹¹ Erero hehea leitita etau ve aikaera lōri patei patei aritore, aeata lea animala aea areve ove etau ita la maso toa, areve rare ve foa ita sarita lea karu ere sare ita faita ita haiorai sore.

¹² Ualare ve karu, Ualare ve safu o la kakeva lei, aea Iesu la sukaererea vovo roroaita lea karu, ere lula auke haiiri rofo ita roroai vei haikaeaita mai reha.

¹³ Lea mea ara i‐ape kauri voa foreri mō isōpe la mapōpe, Mea ukaia: Papuvita voa opaita lea karu lareva ia, soa faitora tetete peava roi. Arahoha ta o mō auai, Alōva! ere ereve tivi pasou kiripi haisai ari vei, ipi ere sa leita lea etau ere ita fareho lei vovo la roroa.

Mearovaeka ve fare sora soa

¹⁴ Soka ara ofae fofoisa, aea mea‐e maea‐sea aea la ofae eavōpe, aea lea mea‐e voa karu farakeka aea sa aiseseiape usoso karu ve atute ve maea feare; are gold kekeva areve harofave voa topi, aea soi mare maea kaiae areve mai voa ia.

¹⁵ Aneru farakeka aea maso uvi kiripi maria voa foreri, mea‐e voa aiseseiape lea vita la ape rovaea ita‐mō isōpe, Ave soi sa tivi lei, uiti sora la foaia, ipi uiti foaita soa forerai, mearovaeka ve uiti fare sora kofa loita meha.

¹⁶ Lō mei, mea‐e voa aiseseiape lea vita areve soi sa mearovaeka voa isapi, mearovaeka ve uiti la foa kaleipe reha.

¹⁷ Soka aneru aea kauri ve maso uvi kiripi maria voa forerōpe aea are ta soi mare maea kaiae ia.

¹⁸ Lea mea aneru aea ta sarita a ve siahu ita aneru, are alitara kiripi pisiri voa foreri, soi mare ita aneru la ape rovaea ita mō isa moipe, Ave soi sa tivi lei, aea mearovaeka ve vine fare ve musu foromai la saereaia, ipi areve vine fare sora loi.

¹⁹ Soka lea aneru areve soi mearovaeka voa toatoa a’, mearovaeka ve vine fare la saerea kokoruka maravi, Ualare ve kitou ve vine fare la faihohōroaita oti rovaea voa toapōpe.

²⁰ Lea vine fare la faihohōroaita oti karikara koravasa voa; lōvoa vine fare la mora sa patei hohōroa, aea ovo lea faihohōroaita oti ve maria voa sisapi forera forera a’ soa kilometre 300 voa tarerea faukōpe, aea lea ovo ve toru usoso soa patei hōsi ve ape kava voa feare.