Apokalupo 13 - Testamenta Áre 1983 (Toaripi PNG)

Makaikara voa patei forerōpe animala ivara eokere

¹ Lea mea ara animala ivara eokere aea makaikara ve iri voa patei forerōpe la ofae eavōpe; are kea ten aeata harofave seven ia, aea areve kea ten voa kekeva ten topi, aea areve harofave seven voa Ualare la lei maealolo leita rare uka siseiape.

² Ara eavōpe lea animala ivara eokere are furuka pusi rovaea feare, areve mora ita mai ita usoso bea ve fefeare, aea areve ape usoso liona ve ape feare reha. Soka lea eli areve rofo, aea areve terona, aea areve siahu rovaea ita la ovi lea animala la miarōpe.

³ Ara areve harofave farakeka aea la ofae eovōpe, are opōpe siaviri feare ia, a—, eite areve lea siaviri evera serapi, lareva lei serare leipe. Mearovaeka karu foromai haihava ita lea animala la aitetei roroaiape.

⁴ Karu foromai lea eli la maso toaiape ipi are sa areve siahu lea animala la miarōpe eavia. Ere lea animala ta maso toa mō ape, Mea animala ita feare leisa? Mare are ita haukai vei rofo vita leisa?

⁵ Ape farakeka lea animala ivara eokere la miarōpe, aea are haiarori ita Ualare la o maealolo ape. Aea siahu ta arero miarōpe are sa papare forty‐two voa harofave vita leiti vei.

⁶ Lea mea are areve ape fapi Ualare ve rare, aea areve peita oti ita la o maealolo a’, aea kauri voa pepeita lea karu ta o maealolo ape.

⁷ Aea are mare safu karu ita hauka, erero sapatai vei soa arero miarōpe. Siahu ta arero miarōpe toruipi‐ipi karu foromai aea karu hariaharia aea uri hariaharia aea basileia foromaiapo ita ve harofave vita leiti vei.

⁸ Aea paea opōpe Mamoe Mere ve makuri buka voa ereve rare mearovaeka ve oarehōva soa ve omopa voa ukai auke lei mearovaeka voa roroaita lea karu foromaiapo sa lea animala la maso toai roi.

⁹ Karu aea mapaita ōvauta ita oria, mea o la mapaia.

¹⁰ Fasi taravai vei karu erero fasi taravi terai roi; marehaukaita soi sa paeai karu, erero marehaukaita soi sa paeai roi.

Mearovaeka voa patei forerōpe animala ivara eokere

¹¹ Soka ara animala ivara eokere aea la mearovaeka ve iri voa patei forerōpe la ofae eavōpe, are kea oraka ia, usoso mamoe mere aea ve kea feare; aea are lea eli sa moipe o feare o moiape.

¹² Are lea omopa animala ve soso voa areve lea siahu foromai la ovai tivi leiti vei, aea mearovaeka aea are voa pepeita lea karu la haisa mei ere lea omopa animala, areve opōpe siaviri serapi lareva leipe lea animala la maso toai vei.

¹³ Are haihava leita etau metameta la lei, sarita a la lei kauri voa fauka mearovaeka ve karu ve soso voa lei forera vovea. Are lea omopa animala ve soso voa haihava etau etau la lei,

¹⁴ mearovaeka voa pepeita karu la apeva sa vutea, erero ta haisa o mei marehaukaita soi sa suka sarapi, a—, makuri ata leipe lea animala ve ove etau la ere sa pisosi vei.

¹⁵ Are ta siahu la ovi lea animala ve ove etau la ape maruru la miōri, lea animala ve ove etau la lei o feare omoi vei, areve ove etau la maso toai auke leita lea karu la paeai o omoi vei.

¹⁶ Aea are karu foromai, kaekae aeata metameta, pisoso karu aeata karu merava, pisiri lei roroaita karu aea fasaita sarufa karu, erero foromaiapo ereve mai toare voa ō ereve harihari‐fave voa haisa foa sari vei.

¹⁷ Ipi lea foa sari auke leita lea karu etau la itaea lei ovai aea miarai vei levi leiti vei, a—, lea animala ve rare ō areve rare ve numera ve foa ita karu sa haria.

¹⁸ Haiore etau meha: haisesera leita lea karu animala ivara eokere ve numera la mutia, ipi are karu aea ve rare ve numera. Areve numera meha: 666.