Apokalupo 12 - Testamenta Áre 1983 (Toaripi PNG)

Maola kauri voa

¹ Lea soa haihava etau rovaea kauri voa muiōpe, ua aea, areve mopaita etau sare reha, aea papare areve mora posa ve ora voa, aea areve harofave voa koru twelve kekeva topōpe.

² Are ére sora, aea are avasa patei, mi ari vei hehea lei, maea fi ōpe.

³ Haihava etau aea ta kauri voa muiōpe; eli maea‐mohari rovaea la ofae eavōpe, are harofave seven, aea kea ten ta ia, aea areve lea harofave seven voa kekeva seven topōpe.

⁴ Are areve uke sa kauri ve koru oroiso oroiso firufiru voa farakeka farakeka la aruovi fari erero mearovaeka voa toapi sisapōpe. Soka lea eli are mi ari vei leita lea ua ve omopa voa soi pōvi, lea ua mi a’, are areve lea mere la paea lari vei.

⁵ Lea mea lea ua atute la mi ōpe, are aite soa auri kaika la ovi toruipi‐ipi karu foromai la haisa kiva leiti vei leitita lea vita. A—, eite areve lea mere la toapi ovi patei Ualare tai areve terona voa miavōpe.

⁶ A—, lea ua furuka merava voa soea, Ualare sa are vei pisosi kekese leipe lea oti voa pavōpe, lōvoa sare 1,260 voa lea ua la savua kiva leiti vei.

⁷ Soka maola kauri voa leipe reha; lei Mikaele aea areve aneru ita mare eli ita haukōpe reha. Hauka, eli aea areve aneru ita ta eakoa mare ta

⁸ hauka, eite ere sapatai kao, aea ere ereve oti kauri voa veverapōpe reha.

⁹ Soka lea eli rovaea, evera soa voa peiape lea ikaroa, Diabolo aeata Satani rare la aravōpe, mearovaeka foromai la apeva sa vuteaita lea vita la mearovaeka voa toapi faukōpe, aea areve aneru ta are ita farehoria toapi fafukōpe.

¹⁰ Lea mea ara i‐ape rovaea kauri voa mō isōpe la mapōpe, Faitora ereitave Ualare ve makuri leita soa aea areve siahu aea areve basileia, aea areve lea Keriso ve harofave soa foreraita meha; ipi ereitave Ualare ve omopa voa sare ita faita ita ereitave paumarehari la havara paraea vovo meita lea vita la ipi voa toapi faukaita meha.

¹¹ Ere Mamoe Mere ve ovo ita aea ere okofa moita lea ovoro ita sa diabolo la sapataita meha. Erero paeai vei leipe soa ere ereve elore makuri la haikakare leiti kasirau.

¹² Kauri foromai e, aea lōvoa pepeita karu e, hailareva leitia! A—, mearovaeka vei aea makaikara vei, ahai‐e! Ipi diabolo kitou rovaea ita ero tai fauka foreraita meha, ipi are ore areve soa harua loi.

¹³ Soka lea eli ofae eovi arero mearovaeka voa toapi faukōpe la ore leipe lea mea, are lea atute la mi ōpe ua la ivara eokere ita aitetaipe.

¹⁴ A—, lahoapo rovaeka ve avako oraka la lea ua la miarōpe, are lea ikaroa ve soso voa safauka areve oti furuka merava voa fufuka, sisoro oroisoria aea maea itua voa arero savua kiva leiti vei, lea ikaroa sa arero hasiavaita ore auke oti voa.

¹⁵ Lea ikaroa lea ua la aitetei, areve ape voa ma elori sa suka sisōvaiape, usoso mai ma sa foreaita feare, ma ve loroa sa lea ua la ovi fareovai vei.

¹⁶ A—, mearovaeka lea ua la toari, areve ape fapi, lea eli sa areve ape voa suka sisōvaiape mai ma la au arapōpe.

¹⁷ Soka eli lea ua la kitou lei, mare areve atutemori haria ita haukai vei terōpe, Ualare ve safu la kiva lei, ovoro Iesu vei fafarapaita lea karu.

¹⁸ Soka lea eli makaikara ve miri voa soi peiape.