Apokalupo 11 - Testamenta Áre 1983 (Toaripi PNG)

Peroveta karu oraka

¹ Soka seseōvaita sirivo la, mai kaika feare, araro miōri, o araro mō ōpe, Itei, Ualare ve maso uvi aea alitara ita ve rovaea la seseōvaia, aea lōvoa maso toai karu ta seseōvi mai mutia.

² A—, maso uvi ve aru‐oti‐pisiri la levi seseōvaia, ipi lea oti la toruipi‐ipi karu la miōri, ere lea safu karikara voa papare forty‐two voa mora sa sosō vovo roroava roi.

³ Ara arave ovoro la ore lei okofa moita karu oraka la siahu miarai roi, ereuka pute puta mopi, lea sare sare 1,260 voa peroveta o la itoro ari vei.

⁴ Mearovaeka ve Papuvita ve omopa voa soi pepeita olive tola oraka, aea a‐mopi sasoita etau oraka ereuka reha.

⁵ Karu sa ereukaro hasiavai haikaeaita, a—, sarita a ereukave ape voa forera, ereukave ote karu la lōri saroroapai vei. Karu farakeka aea ereukaro hasiavai haikaeaita, a—, arero lōfeare paea opai vei.

⁶ Ereuka siahu ia kauri la sasauka, ereuka peroveta o la auka itoro ōvovo roroaita lea sare sare voa, lai levi ari vei. Ereuka siahu ta ia ma otioti la toarōrisa ovo leiti vei; aeata ereuka sa haikaeaita lea soasoa voa hasiavaita etau hariaharia la mearovaeka voa lei forerai vei.

⁷ Soka ereuka ereukave ovoro la itoro a’ a’ roroka leitita lea mea, ivara eokere animala aea soa auke toru‐uta karera voa patei foreri, ereukaro sosori toa, sapatei ereukaro paea opai vei.

⁸ Opi ereukave opaita maea oraka karikara rovaea ve karikara pisiri voa sisei vei; lea karikara ve arorisa moita rare Sodoma aea Egupto reha, lōvoa ereitave Papuvita la satauro voa paeōpe.

⁹ Sare oroisoria aea maea itua voa karu hariaharia voa, aea toruipi‐ipi voa, aea uri hariaharia voa, aea basileia hariaharia voa foreraita karu ereukave opaita maea oraka la ofae fofoisa fofoisa, ereukaro tapu voa viopai vei o erere ōpe.

¹⁰ Aea mearovaeka karu ereukave opai vei hailareva ita opasea lei, meru elore elore ilala lei aiorōpe, ipi lea peroveta karu oraka sa mearovaeka voa pepeita karu la lei kitou lei hehea leiape eavia.

¹¹ A—, lea sare oroisoria aea maea itua sa kaleipe lea mea, Ualare voa foreraita makuri ve maruru ereuka voa oropi, ereuka ereukave mora voa auka itoteōpe. Itotea ereukaro ofae ruripe lea karu ere tore foromai rovaea leipe.

¹² Lea mea ereuka i‐ape kauri voa forera ereukaro o mō moipe la mapōpe, Euka mōvoa pataia. Soka ereuka mea‐e voa forea kauri voa pataipe, ereukave ote karu ve omopa voa.

¹³ Lea ora voa pupuiōvu rovaeka patei, aea lea karikara ve firu ten ve firu farakeka aea foforukōpe reha; aea lea pupuiōvu sa pataipe lea vei karu 7,000 poesapi opōpe. Karu hohoi ere tore rovaea ita, kauri ve Ualare la maeatipe.

¹⁴ Orakori hasiavaita soa kaleitita reha; a—, ofae eavaia, oroisori hasiavaita soa utohoa forerai vei la leipea.

Seven u la fōfōōpe soa

¹⁵ Soka seven aneru areve u la fōfōōpe lea mea, i‐ape metameta kauri voa forera mō ape, Mearovaeka ve basileia ereitave Papuvita aea areve Keriso ve basileia loita meha, aea are basileia harofave Vita lei pepe peava roi.

¹⁶ Lea mea Ualare ve omopa voa ereve elore elore terona voa aipepeita lea opasora‐sora twenty‐four ere soso oti havuopi iavi, Ualare la maso toa,

¹⁷ mō ape, Papuvita, Rofo Rovaekapo Ualare e, meipeta aea meiape Ualare, ela aro maea la atipea, ipi a ave siahu rovaeka la ovi, a sa basileia harofave Vita loita meha.

¹⁸ Toruipi‐ipi kitou leiape, a—, a heohea ita, opai karu la seseōvi tava miaraita soa la lei foreri, Peroveta aea safu karu, ave lea sarufa karu aeata ave rare la taivotaita lea karu kaekae ita metameta ita la tava lareva miaraita soa foreraita meha; aeata mearovaeka la saroroapaita lea karu la saroroapai tava miaraita soa ta meha.

¹⁹ Lea mea Ualare ve maso uvi kauri voa fapi, aea areve maso uvi voa eaeita areve otoare ve lea oroasi la pisirikao muiōpe reha. Lea mea kevaro mavi mavi, tutururu rauapo a’ a’, sisorea ta huhururu a’ a’, pupuiōvu ta patei, lai fave metameta ta ape.