Apokalupo 1 - Testamenta Áre 1983 (Toaripi PNG)

Ioane la muiōpe etau

¹ Iesu Keriso sa muiōpe ovoro meha, Ualare sa arero miarōpe, forerai vei leita etau etau la areve sarufa karu la muiai vei. Keriso areve aneru la areve sarufa vita Ioane tai itapōpe lea o la arero omoi vei,

² aea Ioane sa eovi ore leipe etau foromai, aea Ualare ve o aea Iesu Keriso vei moipe lea o ita la are o mei muiōpe.

³ Mea peroveta o la mutita lea karu lareva ia, aea mea o la mapaita lea karu ere ta lareva ia, aea mea buka voa uka siseita o la kakeva leitita lea karu ta lareva ia; ipi mea etau foromai forerai soa hōi loi.

Maeaforoe o Asia voa pepeita ekalesia seven veia

⁴ Arao, Ioane ve karoro meha, Asia voa pepeita ekalesia seven veia. Meipeta, aea meiape, aea forerai vei leipeta lea Ualare, aea areve terona ve omopa voa pepeita lea arahoha seven ita,

⁵ aea Iesu Keriso, etau la ore lei okofa o moita Vita, opai voa epi meita Atute toare, mearovaeka ve king foromai ve lea harofave Vita ita sa miaraita haiforoe leita meru tairu ita la ovaia. Are ereitaro haikakare ari, aea areve ovo sa ereitave iri kaiae voa ereitaro felaukea paparaea,

⁶ ereitaro lei basileia ve maso tivi karu areve Oa Ualare vei lei la roroa; sosorusosoru aea basileia ve siahu ita areve reha, pepe lōri peava. Amene.

⁷ Ofae eavaia, are mea‐e voa forea la kotipea; ofae foromai arero fofoisai roi, aea arero sukafaropōpe lea karu ta reha; mearovaeka ve toruipi‐ipi karu foromai are vei fi savoi roi. Okofa ta reha. Amene.

⁸ Papuvita Ualare o mō auai, Ara Alefa aeata Omega. Are meipeta, aea meiape, aea forerai vei leipeta lea Vita, Rofo Rovaekapo Ualare.

⁹ Arao, Ioane, eve paua, aea Iesu sa ereitaro isaita lea haisora aea basileia aea au morarita mai voa eve maeapavora vita, firu aea rare Patamoso voa fasi peiape, ipi Ualare ve o vei, aea ipi ara o Iesu vei itoro ape lea vei.

¹⁰ Ara Papuvita ve sare voa Arahoha ita meiape lea mea, ara i‐ape rovaea arave avea‐taia voa mapōpe, u ve fi feare isa mei,

¹¹ mō ōpe, A ofae eavaipeta mea etau la buka voa ukaia, aea arero ekalesia seven voa itapaia, Efeso voa, aea Semurana voa, aea Peregamo voa, aea Tuatira voa, aea Saradisi voa, aea Filadelefia voa, aea Laodikea voa.

¹² Lea mea ara aiterori a’ araro omoiape lea ape‐i la ofae eavai vei. Soka ara eavōpe soa ara a‐mopi sasoita gold etau seven la eavōpe reha,

¹³ aea lea a‐mopi sasoita etau ve aru voa, ara karu farakeka, karu ve atute ve soso feare la ofae eavōpe, areve maea puta savori soa fauka areve mora ipi voa, aea areve haiposa voa gold kava sa haea eakoa toepi peiape.

¹⁴ Areve harofave aea areve tui ita mamoe ve maea‐sea feare lei, oro ve sea feare leipe; aea areve ofae oraka a‐uri feare.

¹⁵ Areve mora oraka kevarokevaro, a voa ea horeaita auri koavi feare leipe, aea areve i‐ape usoso aroaro ma ve seseaita hohororo feare leipe.

¹⁶ Areve mai toare ve ére voa koru seven ia. Tao itai itai marehaukaita soi mare farakeka areve ape iri voa sukapi forera foeiape. Areve soso usoso sare sa siahu rovaeka ita haeaita sasaresasare feare leipe.

¹⁷ Ara arero ofae eavōpe lea mea, ara usoso opaita karu feare lei, areve mora ipi voa au putoipe. Putei, are areve mai toare araro miavi mō ōpe, Tore levi leitia; ara omopa kofa Vita, aeata aite kofa Vita,

¹⁸ aea makuri lei vovo meita lea Vita; ara opōpe, a—, ara makuri lei, soa sarapai auke lei pepe peava roi. Ara ta arave mai voa opai aea opai karu ve oti ita ve ki ia.

¹⁹ Soka a ofae eavaipeta etau, faitora etau aea aite soa voa forerai vei leita lea etau etau la ukaia.

²⁰ A arave mai toare ve ére voa eavaita lea koru seven ve hohore ve eite aea lea a‐mopi sasoita gold etau seven ita ve eite meha: lea koru seven ere ekalesia firufiru seven ve aneru, aea lea a‐mopi sasoita etau seven ere lea ekalesia seven reha.