3 Ioane 1 - Testamenta Áre 1983 (Toaripi PNG)

¹ Ara ekalesia opasora vita sa itapaita karoro meha, haikakare leita Gaio veia, ara okofa ita aro haikakare leititore.

² Haikakare leita marehari e, ara haikaeai rovaea etau foromai voa a lareva ita mei vei, aeata a maea lareva lei eka auke ita mei vei, usoso ave ove sa lareva ita peita lōfeare.

³ Ipi paumarehari hea koti, ave meita mai ve okofa ve fari la araro omoipe lea mea, ara hailareva rovaea leipe reha. Eite a soa foromai okofa ve mai voa mea vovea.

⁴ Ara voa sapataita hailareva rovaea kofa meha, arave atutemori ere okofa ve otiharo voa roroaita fari la mapai vei.

Gaio la maeatita o

⁵ Haikakare leita marehari e, a ereitave ekalesia paumarehari hea, aeata a sa malasa auke karu ita la maeafukapaita lea vei, a voa sukaerereaita tivi kofa reha.

⁶ Lea karu ere mea ekalesia firu ve omopa voa ave haikakare ve fari la moi vovea. Ereve sariva voa lōfefeare karu la eapo toari favi toari lōri toilalai vei, ereita sa tivi leita lea Ualare sa haikaeaita mai feare.

⁷ Ipi ere elore elore oti la kiripi Iesu Keriso ve rare la itoro ari vei sariva lei vovo la roroa, aea arero sukaerereai auke leitita lea karu voa etau aea ovai sore.

⁸ Lōfefeare karu la toaraita mai haura reha, ereita okofa ita tivi farehoria leiti veia.

Diotrefese aea Demetrio ita ve fari

⁹ Ara ekalesia firu tai karoro harua uka itapōpe; a—, eite Diotrefese, ere voa elore maea harofave leiti haikaeaita lea vita, ara sa moita o la haiarara leititore.

¹⁰ A—, ara sa foreraita lea mea, ara are sa leita lea mai la ero lei haikaeakaea ari roi. Are o kaiae ita arave fari la o hahe a’ araro sukavutea vovea. Are lōfeare mai ita haiiri usoso auke lei, are elore maea paumarehari la maeafukapai haiarara, aeata meha, erero maeafukapai haikaeaita lea karu la are o erere a’, erero ekalesia voa sukavutea maria karu lei vovea.

¹¹ Haikakare leita marehari e, mai kaiae la maea levi ruruiaia, a—, lareva ita mai la maea ruruiaia. Mai lareva la leita lea karu are Ualare ve karu; a—, mai kaiae la leita lea karu are Ualare la ofae eavai sore.

¹² Karu foromai Demetrio ve mai la ore lei o lareva moi vovea, aea areve leita mai ve okofa sa areve lareva la muia vovea. Ela ta lōfeare la ore lei moi vovea, aea a ore, ela sa moita lea o okofa reha.

Sisa o

¹³ Ara o rauapo ia aro tai uka itapai vei, a—, ara lea o peni ita inika ita sa ukai haikaeai kofa kao.

¹⁴ A—, arave haiiri meha, aro utohoa ofae eavai vei, aea elaka soso tataea laua sukavai roi.

¹⁵ Tairu a ita lei peava. Paumarehari maeaforoe o aro la moipea. Paumarehari lōvoa rare ita mei maeaforoe o moia.