2 Timoteo 4 - Testamenta Áre 1983 (Toaripi PNG)

¹ Ualare ve soso voa aea Keriso Iesu ve soso voa, makuri karu aea opai karu ita la seseōvi tava miaraita lea Vita, aea are forerai vei leipeta aea are basileia harofave Vita leiti vei leipeta lea vei, ara aro kureai a mai mōfeare leiti vei,

² ovoro la itoro aria, soa lareva voa, aeata soa maealolo voa, haihahari ita itoro au ae peava, karu ve haiiri la lei kerori, erero o erere a’, erero rofo leiti vei kureaia, morarita mai foromai ita erero au satiriarai peava.

³ Ipi soa aea forerai roi lea mea, karu erero satiriaraita lea o ve haura la levi mapai roi, a—, ere ereve elore haikaeaita mai la lei, satiriaraita papukaru la kokoruka ereve haikaeaita o la erero lei ore leiti vei.

⁴ Ere ereve ōvauta ovoro kofa ve o la mapai vei haiarara lei sasauka, fari merava la mapai vei lei vovo roroava roi.

⁵ A—, a etau foromai voa haisukafori lei, tivi ve hehea voa kere lei, aea Ovoro Lareva la itoro a’, Ualare sa aro miarōpe lea tivi la lei kekese leitia.

⁶ Ipi arave ovo faitora usoso maso etau feare, sisapi omopa posaseai vei la leipea; arave maea leiti soa foreraita meha.

⁷ Ara mare lareva hauka hauka roroka lei, ara arave loreape oita soa ta roroka loita meha; ara sukaerereaita mai la kakeva lei la mea.

⁸ Faitora haura leita mai vei topaita lea kekeva la ara vei kekese lei la eaea; Papuvita, seseōvaita Vita haura sa lea kekeva lea Sare kofa voa araro miōri topai roi; aea araro haria kasirau, a—, are sa foreraita soa la haikakare lei tai vovo roroaita lea karu foromai vei ta reha.

Elore maea vei moita o

⁹ Araro tai utohoa iti vei haiiri rofo leitia.

¹⁰ Ipi Demasi mea faitora soa ve mearovaeka la haikakare lei, araro kiripi Tesalonika voa kavaita; Keresene ta Galatia voa kavaita, Tito ta Dalamatia voa.

¹¹ Luka sa haria ara ita fareho laipea. Mareko la a ita fareho lariōvi tiria, ipi araro toarai vei are sa lareva.

¹² Ara Tukiko la Efeso voa itapi isaita.

¹³ Ara sa Troasa voa Kapo ve oti voa kiripaia lea arori puta la, a itita lea soa voa laita ovi itia; aea buka ta reha, a—, haikaeaita etau kofa animala ruru buka.

¹⁴ Alesana, auri koavi tivi leitita vita, araro kaiae rovaea leitita; are sa leitia lea etau vei Papuvita sa tava arero miarai roi.

¹⁵ Lea vita la a kiva kofa leitia, ipi are ereitave ovoro la o kere rovaea ita sukavuteaia eavia.

¹⁶ Arave omopa kōto soa voa karu aea arave laua la toarai kao; ere foromai araro kiripaita. Maeaforoe! Ualare erero rapi lea mai vei kaiae o levi moia.

¹⁷ A—, Papuvita araro tai pōvi araro lei rofo leitita, ara Ovoro Lareva foromai la itoro aria reha, toru hariaharia karu foromai sa mapai vei. Araro liona ve ape voa fareōvi makuri lei laipea.

¹⁸ Papuvita sa maealolo leita etau foromai voa araro fareōvi, aea areve kauri basileia voa araro lareva ita lei forerai roi. Arero lei sosorusosoru lei peava. Amene.

Sisa o

¹⁹ Maeaforoe o Perisika auka Akuila ita aea Onesiforo ve uvi karu ita la moia.

²⁰ Erasto are Korinito voa seraita; Terofimo eka sa lei, ara arero Mileto voa kiripaita.

²¹ Vevekoko pisahu sa forerai auke leipeta mea soa voa utohoa iti vei haiiri rofo leitia. Eubulo aea Pudene aea Linusu aea Klaudia aea paumarehari foromai ita maeaforoe o aro la moipea.

²² Papuvita ave arahoha ita farehoria lei peava. Haiforoe leita meru e ita farehoria lei peava.