2 Timoteo 3 - Testamenta Áre 1983 (Toaripi PNG)

Sisa sare sare voa foreri leiti mai

¹ A—, mea la ore leitia, sisa sare sare voa haisora leita soasoa forerai roi.

² Ipi karu ereve elore elore maea la haikakare arai roi; ere moni la haikakare; ere maeamarōva, maea ruapōpe, ape laua maeamariti, oalou‐ita la kaeava, maeatita haveva, safu miroapai,

³ haimafu auke, totoeai auke, havara apeva, haisukafori roroai sore, ere ivara eokere, mai lareva la kaifa,

⁴ kivaia lei, ovoro mapai auke, haiiri maeamarōva sa fefesi, mearovaeka ve hailareva leita etau la haikakare, a—, Ualare la haikakare arai auke lei vovo roroava roi.

⁵ Ere Ualare la maso toaita mai leiti roi, a—, eite ere areve siahu la avoa ari roi. Lōfeare karu la haiarara lei kōutoaia.

⁶ Ereve karu hea uvi iri voa kekevari oropi, maeakakare uamori ve haiiri la kurea lariōvai vovea. Lea uamori ereve iri kaiae ve pasou sa safori, ereve haikaeaita haiiri hariaharia sa erero lei ere mai kaiae lōri lei vovea.

⁷ Ere karu foromai sa satiriaraita lea o hariaharia la mapa vovea, a—, ereve haiiri okofa ve haiore voa forerai sore.

⁸ Soka usoso Ianese auka Iamberese ita sa Mose la sukelapōpe lōfeare, lea karu ta okofa la sukavutea vovea; ereve haiiri maealolo kofa, aea ereve sukaerereaita haiiri ta apeva.

⁹ A—, ere soa savori levi roroava roi, ipi ereve maeakakare pisiri lei karu foromai sa eovi ore leiti roi, usoso Ianese auka Iamberese ita tai forerōpe etau feare.

Sisa ovoro

¹⁰ Soka a arave satiriaraita o la ore, arave leita mai, arave haikaeaita mai, sukaerereaita haiiri, morarita mai, arave haikakare, lula auke haiiri kere,

¹¹ araro haisora leiti vei larivataita soasoa, aea arave hehea, Antioka voa, Ikoniuma voa, aea Lusitera voa araro leiape lea etau, aea araro hasiavai vei aitetaiape lea etau foromai ita la a ore; a—, Papuvita sa lea etau foromai voa araro fareovōpe.

¹² Eite ereve haiiri Keriso Iesu voa Ualare sa haikaeaita mai la leiti vei lea karu, ere hasiavaita mai ta sukaeai roi.

¹³ A—, mai kaiae la leitita karu aeata apeva karu ere maealolo voa maealolo aeata topiari, maealolo foromai lei, karu la apeva vuteai roi, aea karu ta erero apeva vuteai roi.

¹⁴ A—, ao, a aro satiriaraiape aea okofa ore leita lea etau voa peava, ipi lea etau la aro satiriaraiape lea karu la a ore.

¹⁵ Soa ave seika soa voa a Safu Karoro ve o la malasa leiape; lea Karoro voa aro lei haiore ovi, a Keriso Iesu voa meita lea fareōvi makuri leita soa la ovai vei, sukaerereaita haiiri la sukaeaia lōfeare.

¹⁶ Ipi Ualare ve siahu sa mei ukaiape lea Karoro foromai lareva ia, karu la satiriarai vei, kaiae la sukavuteai vei, o kaiae la ipopea haura leiti vei, aeata mai haura la satiriarai vei.

¹⁷ Ualare ve karu la lōfeare voa lei kekese leiti vei, etau foromai arero miōri kalei, are tivi lareva foromai leiti vei.