2 Timoteo 2 - Testamenta Áre 1983 (Toaripi PNG)

Keriso Iesu ve maola karu kofa

¹ Lea vei, arave atute e, Keriso Iesu sa miaraita haiforoe leita meru voa rofo lei vovo meava.

² Ore leita karu rauapo ve soso voa ara aro mei, a mapaiape lea ovoro la ovi karu kofa la omei, ere ta karu haria la satiriōri lei ore leiti vei.

³ Ela ita fareho hehea lei vovo meava, Keriso Iesu ve maola karu kofa feare.

⁴ Maola karu are karikara ve etau maeamaea leiti vei areve haiiri topiarai sore, ipi areve haiiri are maola karu leiti vei areve rare la ukōpe lea kapena vita la lei hailareva leiti vei.

⁵ Havohu ve soa voa karu loreape arita, are loreape ve safu la kakeva auke leitita, a—, kekeva tava areve harofave voa levi topai roi.

⁶ Forōva arita karu areve tivi pasou ve tava meha, forōva oti ve fare toare la omopa are sa lari roi.

⁷ Ara moipeta mea o la haiiri voa seseōvaia, ipi Papuvita etau foromai voa haiore aro miarai roi.

⁸ Iesu Keriso la haikaeaia, opai voa lei itoipe lea Vita; are Davida ve meavumōla, usoso ara sa itoro arita lea Ovoro Lareva feare.

⁹ Lea Ovoro Lareva vei ara hehea ita, kaiae leita karu feare, auri horou sa fasi laipea; a—, Ualare ve o la fasi sasaukaita ore kao.

¹⁰ Lea vei Ualare sa haikaea maravaita lea karu vei ara hehea foromai la morari vovea, erero fareōvi makuri lei, ere Keriso Iesu voa peita sosorusosoru ta ovai vei.

¹¹ Mea o foromai okofa: Ereita are ita farehoria opaita, a—, ereita are ita farehoria ta makuri lei roroava roi;

¹² ereita rofo ita lei roroaita, a—, ereita are ita farehoria harofave lei roroava roi; ereita arero avoa ō vovo roroaita, a—, are ta ereitaro avoa ari roi;

¹³ ereita are ita ōpe otoare la apeva lei roroaita, a—, are otoare la okofa ita lei mea vovea, ipi are areve elore maea la avoa arita ore kasirau.

¹⁴ Lōfeare etau vei erero lei haikaeaia, aea Ualare ve soso voa o kere erero omoia, ere o serea elore elore levi ari vei; ipi lōfeare mai voa lareva forerai sore, a—, mapaita karu la lei lavukakaea vovea.

¹⁵ Haihahari ita leitia a ave elore maea la lei haura lei, maeamariti leiti auke tivi leita vita Ualare la muiai vei, ipi a okofa ve o la mai haura ita satiriaraita eavia.

¹⁶ O maealolo aea maeakakare laua la kōutoa meava, ipi lōfeare mai la malasa leitita karu ere kaiae rovaea voa roroava roi.

¹⁷ Lōfeare laua usoso tare siaviri feare fafarapa fafarapa ari roi. Humenaio auka Fileto ita lōfeare o la satiriarai vovea.

¹⁸ Ereuka okofa la kiripi, o mō ō vovea, Opi ata itoita soa roroka, aea karu hea ve sukaerereaita haiiri la lōfeare sa lei mavitoa la roroa.

¹⁹ Etau farakeka, Ualare ve ipi oti kere lei eaea vovea; are mea sasaraita peise ia, Papuvita areve elore karu la ore; o aeata meha, Papuvita ve rare la moita lea karu foromai mai kaiae la kiripaia.

²⁰ Uvi rovaea voa gold saesa aea silva saesa sa haria siseia kao, a—, tola saesa aeata sauka saesa ta reha; lea etau ve ipi maeatita tivi vei, aea mea etau maeati auke tivi vei.

²¹ A—, karu areve haiiri voa maealolo la fareōvi ovava leitita, a—, are maeatita tivi ve saesa feare toarōrisa, safu lei, uvi Papuvita sa haikaeaita etau la lei, tivi lareva maeamaea foromai vei kekese ita leiti roi.

²² Soka harokoulese ve maeasarōva sa haikaeaita mai la kiripaia, a—, haura leita mai, sukaerereaita haiiri, haikakare aea tairu ita lei vovo meava, haiiri ovava ita Papuvita la isa loki lei roroaita lea karu ita farehoria roroava.

²³ Maeakakare aea eite auke o serea elore elore ita la haiarara lei kōutoa meava; a ore lōfeare o voa ape sosori foreraitore.

²⁴ A—, Papuvita ve sarufa karu kofa are sosori muru karu kao; a—, karu foromai voa haimafu lei, are o pisiri ita karu la satiriōri, erero morari,

²⁵ arero sukavuteaita lea karu la o mafu ita kureaia. Ualare sa ereve haiiri la lei kerorita varo, ere okofa la lōri mapi ore leiti roi.

²⁶ Lōfeare Diabolo sa ere are sa haikaeaita mai la leiti vei erero maravi totorea popōvi, a—, ere areve fitōva voa felaukea paparaea safaukai roi.