2 Timoteo 1 - Testamenta Áre 1983 (Toaripi PNG)

¹ Paulo, Keriso Iesu ve aposetolo, Ualare sa araro haikaea ovōpe lea vei, Keriso Iesu voa miaraita makuri ve otoare la itoro ari vei, ara sa itapaita karoro meha;

² ara sa haikakare leitita lea atute, Timoteo veia: Ualare aea ereitave Papuvita Keriso Iesu ita sa haiforoe leita meru aea maeaforoe aea tairu ita la aro miarai peava.

³ Ara usoso arave papa sa leiape mai feare, seseōvaita haiiri haura ita Ualare la maso toaia soasoa voa, ara faita ita sare ita aro haikaeaita lea meamea, ara Ualare la maeati vovea.

⁴ Ara ave ovororo la haikaeaia lea soa ara aro ofae eavai vei haikaeai vovea, arave hailareva la lei rovaea leiti vei.

⁵ Ara a okofa ita sukaerereaita lea mai ta haikaeai, lea sukaerereaita mai ave ueri Loisi voa aea ave lou Eunike voa evera leiape; aea ara ore lea mai faitora a voa ta la leipea.

Ave tivi

⁶ Lea vei ara aro kurea aro lei haikaeai vei, arave mai oraka sa aro mopōpe soa voa, Ualare sa ave haiiri voa miōri eaeita lea meru la a usoso a feare lei vovoeai vei.

⁷ Ipi Ualare tore leita arahoha la ereitaro miarai sore, a—, siahu leita, aea haikakare leita, aea haisukafori leita arahoha.

⁸ Lea vei o ereitave Papuvita vei moi vei maeamariti levi leitia; aeata ara vei ta reha, Keriso ve dibura karu. A—, ela ita fareho hehea leitia Ovoro Lareva ve tivi vei, usoso Ualare sa aro miaraita lea rofo feare.

⁹ Are ereitaro fareōvi makuri lei, aea safu mai ita lei vovo roroai vei ereitaro isōpe, usoso ereita sa leita lea mai feare kao, a—, are sa haikaeaita lea haiiri vei, aea areve haiforoe leita meru feare. Mearovaeka forerai auke soa voa lea haiforoe leita meru are sa Keriso Iesu voa ereitaro everori miōri kekese leipe,

¹⁰ a—, faitora lea meru la pisiri lei la muiaipea, ereitaro fareōvi makuri leita Vita, Keriso Iesu sa forerōpe lea vei. Are opai ve siahu la lei kalei, aea Ovoro Lareva voa soa sarapai auke leita makuri la ovava soa voa la muiaipea.

¹¹ Lea Ovoro Lareva la itoro ari vei Ualare sa araro lei, ara aposetolo aeata satiriaraita vita lei la mea.

¹² Lōfeare vei ara mea etau voa hehea ia, a—, eite ara maea karōva la leipea, ipi ara sa sukaerereaita lea Vita la ara ore, aeata ara ore kofa, ara areve mai voa miarōpe lea etau la are kiva leitita ore tetete lea Sare sa foreraita soa.

¹³ A arave ape voa mapaiape lea ovoro kofa voa a mai lōri leiti vei kere ita seseari, aea Keriso Iesu la sukaerereaita mai aea haikakare ita lei vovo meava.

¹⁴ Ereitave haiiri voa meita lea Safu Arahoha Lareva ve siahu voa, aro miarōpe lea etau lareva la kiva lei vovo meava.

¹⁵ A fari ore Asia voa pepeita karu foromai araro kōutoa la roroa, Fugelusu auke Heremogene ita ta ereve karu oraka reha.

¹⁶ A—, Onesiforo aea areve uvi karu ita la Papuvita sa maeaforoe leitia; ipi are araro haelarehaelare toari arave haiiri la lei ata áre lei vovea, aea are araro fasaita lea horou vei maeamariti leiti sore.

¹⁷ A—, are sa Roma voa foreraia lea soa are araro haihahari ita eli eli araro lōri sukaeaita.

¹⁸ Are Papuvita ve maeaforoe ta sukaeai vei lea Sare voa. Are sa araro Efeso voa toaraiape lea mai la a eapo foromai ore kofa.