2 Tesalonika 3 - Testamenta Áre 1983 (Toaripi PNG)

Kureaita ovoro

¹ Soka paumarehari e, hohoi o meha: ela vei Ualare la loki lei peava, Papuvita ve o lavelave fafarapi, otioti foromai voa usoso e voa, karu sa maeatita o ita mapi kekeva leiti vei.

² Aeata ela vei, Ualare la loki lei, are elaro haiiri kaiae aea mai maealolo leita karu voa fareōvi lei makuri leiti vei, ipi karu hea sa haria Ovoro Lareva la sukaerereaipea.

³ A—, Papuvita are okofa, aea are sa ero lei rofo lei, kaiae foromai voa ero fareōvi kiva leiti roi.

⁴ Ela Papuvita voa e vei mōfeare sukaerereai vovea, ela ero omoita lea etau la e la leipea, aeata erero lōri lei peava roi.

⁵ Papuvita sa eve haiiri la Ualare ve haikakare voa aea Keriso ve lula auke haiiri kere voa lariōvai peava.

⁶ Paumarehari e, ela Papuvita Iesu Keriso ve rare voa ero haisa moi, tivi paraea merava lei meita, aea ela sa ero lei ore leipe lea satiriaraita o feare leiti auke lei meita lōfeare karu e voa e kōutoaia.

⁷ Ipi e ore kofa, usoso ela sa leiape lea mai feare, e ta ruruiaita, haura reha; ipi ela e voa pepeiape lea soa ela tivi paparaea haiarara leiti kasirau.

⁸ Ela larietau karu ve mai voa tava auke ita ovi lari kasirau; a—, sare faita ita heafo lei, maeauti sisapaita tivi la leiape, ela pasou e karu farakeka aea sa leiti vei leiti kasirau.

⁹ Eite ela siahu ia karu la lalasi lei elaro savuai vei; a—, ela lōfeare leiti kao ipi mai lareva ero muiai vei, e ta lōfeare mai leiti vei.

¹⁰ Ela e ita fareho pepeiape lea mea ela ero haisa mō moiape, Karu tivi haiarara leitit’ oria, are larietau ta levi laria.

¹¹ Ipi ela mea fari e voa roroaita karu hea vei mapi roroka, ere maea tivi leiti sore, a—, ere lō te sukava lō iti sukava lei auraka auea kerori vovo roroa vovea.

¹² Lōfeare mai la leitita karu la ela Papuvita Iesu Keriso ve rare voa haisa mei aeata kurea, ere tivi haisukafori lei ereve elore elore larietau kofa la lōri lari vei.

¹³ A—, eo, paumarehari e, leita mai lareva vei haisora levi leitia.

¹⁴ Karu hea elave mea karoro voa uka siseipeta o la kakeva levi leitita varo. Lōfeare leitit’ oria, lea karu la rare ita o pisiri mei, etau aea la are ita farehoria leiti vei levi leitia, arero lei maeamariti leiti vei.

¹⁵ Etau farakeka arero karu haria feare levi sukavuteaia, a—, arero maeapavora karu feare kureaia.

Sisa o

¹⁶ Tairu ve Papuvita, are kofa sa tairu soa foromai voa aea otioti foromai voa ero miarai peava. Papuvita e foromai ita fareho lei peava.

¹⁷ Mea maeaforoe o la arao, Paulo, arave elore mai kofa sa ukai. Arave karoro foromai ve peise vei ara mōfeare uka vovea.

¹⁸ Ereitave Papuvita Iesu Keriso ve haiforoe leita meru e foromai ita farehoria lei peava.