2 Tesalonika 2 - Testamenta Áre 1983 (Toaripi PNG)

Safu meovaita vita

¹ Soka, paumarehari e, ela ero loki la leipea, ipi ereitave Papuvita Iesu Keriso ve kotita soa aea ereita arero tai kokorukaita lea soa vei.

² A—, e karu hea ve o Papuvita ve sare koti roroka lea o vei eve haiiri voa lulalula utohoa levi aria aea hai levi isoia. Lea o karu sa peroveta o voa moita varo, itoro o voa arita varo, elave karoro feare voa muti moita varo.

³ Karu lōfeare o hahauhahau sa ero levi vuteaia. Ipi lea sare levi forerai roi tetete karu foromai rauapo kofa sa Ualare la sukavutea kōutoai ao, aea safu la meovaita vita, Ualare sa saroroapai vei leitita lea vita pisirikao forerai ao.

⁴ Are ualare rare aravaita lea etau etau aea karu sa maso toaita lea etau foromai la sukavutea, aea lea etau foromai ve arori voa areve maea la moravai roi. Are ta Ualare kofa ve maso oti voa te avi, areve elore maea la Ualare rare aravi aiseseava roi.

⁵ E haisafaipea ei? ara e ita fareho peiape soa, ara lea etau ero omoiape.

⁶ A—, lea otoare soa faitora forerai vei sukelapaita etau ia, aeata e lea etau ore. Eite soa kofa voa lea safu meovaita vita pisiri lei forerai roi.

⁷ Ipi safu meovaita mai ve siahu murufa tivi la leipea, a—, arero pisiri lei levi oapai roi tetete arero sukelapaita lea vita la fareovai ao.

⁸ Lea soa voa safu meovaita vita pisirikao forerai roi; a—, Papuvita Iesu sa kotita lea mea are areve ape maruru sa arero fōfōa opi, areve soso sosorusosoru sa muia, arero lōri lei kaleiti roi.

⁹ Soka mea safu meovaita vita are Satani sa miaraita siahu ita foreri, aea siahu ve peise aea haihava leita etau apeva maeamaea foromai sa lohalai leiti roi.

¹⁰ Are areve lohalai leita mai hariaharia ita sa saroroapi opai vei leitita lea karu la apeva vuteai roi; ipi ere erero fareōvi makuri leiti vei leitita ovoro ve okofa la mapi hailareva leiti vei hariarara eavia.

¹¹ Lea vei Ualare lohalai vuteaita haiiri erero miōri, ere apeva vuteaita lea o la sukaerereai vei.

¹² Lōfeare vei okofa la sukaerereai auke leitita, a—, kaiae mai voa hailareva leitita lea karu foromai la seseōvi kaiae tava miarai roi.

Kere popōvaia

¹³ Soka paumarehari e, Papuvita sa haikakare leita karu e, ela soa foromai Ualare la e vei maeati vovea. Ipi Ualare omopa kofa soa voa ero haikaea maravōpe, ero fareōvi lei makuri leiti vei, areve Arahoha ve siahu sa ero lei areve safu karu leiti vei, e okofa la sukaerereaita eavia.

¹⁴ Are ero isōpe ela sa ero Ovoro Lareva la itoro ōpe lea soa voa, e ta ereitave Papuvita Iesu Keriso ve sosorusosoru voa soa ovai vei.

¹⁵ Lōfeare vei, paumarehari e, kere ita popōvi, ela elave itoro o voa aeata elave omopa karoro voa ero lei ore leita lea satiriaraita o la seseari kere ita roroava.

¹⁶ Ereitave Papuvita Iesu Keriso, are kofa, aea ereitave Oa Ualare ereitaro haikakare ari, aea ereitaro maeaforoe lei, peita rofo leita siahu aea taita haiiri lareva ereitaro miarōpe lea Ualare,

¹⁷ eve haiiri la rofo foromai leiti vei kureai peava, e leita mai lareva voa aeata o voa rofo ita lei vovo roroava.