2 Petero 3 - Testamenta Áre 1983 (Toaripi PNG)

Papuvita ata koti roi

¹ Haikakare paumarehari e, ara e vei ukaita orakori karoro meha. Ereuka orakoria voa arave haiiri ero lei, e haiiri ovava ita e ore leita lea o la ata seseōvai vei.

² E safu peroveta karu sa evera moiape lea o, aea ereitave Papuvita, ereitaro lei makuri leita lea Vita ve o, eve aposetolo karu ve ape sa, e leiti vei moiape lea o la ata lei haikaeai vei.

³ A—, mea etau omopa ore leitia, soa sarapaita sare sare voa ereve elore haikakare maealolo ita roroaita lea karu hea forerai roi. Ere ero area sa vutea a’

⁴ o mō ari roi, Are sa ata koti ōpe lea otoare leavoa? Ipi ereitave oa‐ita sa ivutu iroropaiape soa itiiti faitora, etau foromai la pisosiape soa itiiti faitora, etau foromai ere lei vovo roroaiape lea mai fefeare lōri la leipea.

⁵ Ere ōvafae kere lei, mea etau la ore leiti vei kōutoa la roroa, evera kofa soa Ualare o sa mei aea kauri mearovaeka ita la pisosipe. Mearovaeka ma voa elori patei forerōpe aea ma sa mearovaeka la eakoa toepōpe.

⁶ A—, evera soa eaeiape lea mearovaeka la ma sa ovi aieri saroroapōpe.

⁷ A—, mea faitora siseipeta kauri mearovaeka ita Ualare ve o sa kiva lei laisisea, a sa sa’ haroavi kaleiti vei seseōvi tava miaraita sare voa, Ualare la taivotai auke lei roroaita karu la saroroapaita lea soa voa.

⁸ Haikakare paumarehari e, mea o farakeka la hai levi safaia, Papuvita voa sare farakeka are usoso sisoro 1,000 feare, aea sisoro 1,000 are usoso sare farakeka feare.

⁹ Papuvita sa otoare ōpe lea etau la leiti vei lekaleka leiti sore, usoso karu hea sa seseōvaita lea lekaleka feare; a—, are ero au morari vovea, ipi are haikaeai kao karu farakeka aea la saroroapai vei; a—, are haikaeai karu foromai ere haiiri kerori, ereve kaiae la kiripai vei.

¹⁰ A—, Papuvita ve Sare torea leita karu sa foreraita feare koti roi. Lea sare voa kauri poporora rovaea ita kaleiti roi, etau foromai hehea rovaea sa toa horeai roi, mearovaeka ta areve arori voa roroaita etau foromai ita la a sa sa’ kaleiti roi.

¹¹ Soka lea etau foromai lōfeare mai ita saroroapi kaleitita, a—, e mai leafeare karu leiti vei ei? Mai meha, eve makuri la lei safu lei, Ualare la seseari,

¹² aea Ualare ve Sare foreraita soa la haihahari rovaea ita tai vovo roroava. Lea Sare voa kauri a sa sa’ haroavi kaleiti roi, aea koru foromai ta hehea rovaea sa toa horeai roi.

¹³ A—, usoso Ualare ve lea otoare feare, ereita kauri áre aea mearovaeka áre la la taipea; mai haura lei roroaita karu sa lōvoa popōvai roi.

¹⁴ Lea vei, haikakare paumarehari e, e lea Sare la tai vovo roroaita soa voa, e haihahari kofa lei Ualare ita tairu lei, maita maealolo auke ita aeata kaiae auke ita roroai vei areve soso voa.

¹⁵ E haiiri mōfeare seseōvaia, Papuvita sa au morarita lea mai, fareōvi makuri leitita maeaforoe ve mai reha; elave haikakare leita marehari Paulo, arero miarōpe lea haiovoro voa, e vei ukōpe karoro ta lōfeare.

¹⁶ Areve karoro foromai voa are mea etau vei o lōfefeare ukaiape. Are ukaiape o hea ve eite la ore leiti vei heafo ia, aea haihaveva aea horahora karu ere lea o la mavitoa eite kaiae ita moi vovea, ere Safu Buka ve o hea la leitita lea mai feare. Lōfeare voa ere ereve elore maea la lei saroroapa vovea.

¹⁷ A—, eo, arave haikakare paumarehari e, e lea la everori ore lei, e kiva lei vovo roroava, safu miroapaita karu sa ereve eae seseōvaita haiiri ita ero kurea, eve haiiri ve rofo sisapai ave.

¹⁸ A—, e ereitave Papuvita, ereitaro fareōvi makuri leita Vita, Iesu Keriso ve haiforoe leita meru aea haiore voa asi roroava. Are voa sosorusosoru leitia, faitora soa voa aeata lōri lei pepe peava. Amene.